"Endi bizdiń elden basqa memleketke qońyraý shalǵanda, sheteldikterdiń telefonynda Qazaqstan degen jazý shyǵady. Sondaı-aq halyqaralyq deńgeıdegi sıfrly servısterdi qoldanǵanda da, barlyq jerde Qazaqstan degen sıgnal shyǵady" dep jaqsy aqjoltaı jańalyqty elge jetkizgen edi.
Iá, kezinde KSRO taraǵanda, +7 halyqaralyq telefon kody eki elge birdeı bekitilgen. Qazaqstanǵa ǵana tıesili halyqaralyq kodqa qol jetkizý úshin byltyrǵy jyldan beri telekomýnıkasıa salasyndaǵy kompanıalarmen birge jan-jaqty jumys júrgizip, kelissózderdiń nátıjesinde bizdiń elge derbes +997 kody bekitildi.
Apta jańalyǵy bolǵan aqparatty qyzý talqylandy. Halyqty eleń etkizgen tyń jańalyqqa 2000 jyldardyń bas kezinde Kólik jáne komýnıkasıa mınıstri bolǵan Serik Búrkitbaev óz oıyn bildirdi dep habarlaıdy Dalanews.kz.
"Baǵdat Mýsın eshqandaı amerıka ashqan joq, qazirgi telefon kodyna meniń de tikeleı qatysym bar" dep áńgimesin bastady.
"1999 jyly men bul máselemen jeke aınalysqan bolatynmyn jáne biz Qazaqstandy +7 aımaǵynda ustaý úshin kúresip, bizge +77 eki tańbaly telefon kodyn belgiledik. Álem boıynsha árbir telefon abonentiniń jeke sáıkestendirýi kody bar. Telefon nómirleri munaı men sý sıaqty resýrs. Jáne bul resýrs jańartylmaıdy. Radıojıilik pen spýtnıktik baılanys birdeı shekteýge ıe.
Kodtaǵy birinshi sıfr memlekettiń atyn emes, abonenttiń geografıalyq ornyn bildiredi. Mysaly Soltústik Amerıkaǵa +1 nómiri berildi. Iaǵnı, Kanada men AQSH turǵyndary osylaı qoldanyp júr. Eýropaǵa +3 jáne +4 kody tıesili. Álemniń kóptegen elderi Kári qurylyqta ornalasqandyqtan eki sıfr berilgen.
Al +7 - Ortalyq Eýrazıanyń geografıalyq kody, burynǵy KSRO. Odaqtyń barlyq respýblıkalarynda bastapqyda +7 kody bolǵan, qazirgi ýaqytta tek eki el qaldy. Reseı men Qazaqstan.
Keńes úkimeti saıası kartadan bir jola kelmeske ketkennen keıin, basqa barlyq baýyrlas elder, basqa kodqa aýysty. Shyǵaryldy desem artyq aıtpaǵanym bolar.
Al biz úshin kıeli 7 sanynda saqtap qalýǵa men ózim kóp kúsh saldym. Kórshi memleketpen kelissóz júrgizip, reseılik seriktester bizge jeńildikter jasaýǵa kelisti, al biz Reseımen birge +7 sanyn saqtap qaldyq", – deıdi ol.
Eks mınıstrdiń aıtýynsha Qazaqstannan shetelge qońyraý shalǵanda «Reseı» degen belgi paıda bolsa, bul bıliktiń beıqamdyǵyn bildiredi. Biraq bul kemshilikti túzetý qıyn sharýa emes. Tek tıisti organdar men kompanıalarǵa birneshe qosymsha qujattar men ótinishter jazý arqyly ońaı túzetilýi múmkin.
Al birinshi jetiden keıin bizdiń elge de ekinshi - «jeke» jetilik berilgendikten, Qazaqstan Respýblıkasy +77 jeke sáıkestendirý kodyna ıe bolǵan. Ekinshi jeti Búrkitbaevtyń zor eńbeginiń arqasynda múmkin bolǵan eken. Qos jetige qol jetkizý ońaı bolmapty.
"Bizde esterińizde bolsa bastapqyda ekinshisi 3 sany boldy, ıaǵnı +73 kody. Bul aımaqqa Qazaqstanmen birge Ortalyq Azıa, sonymen qatar Sibirdiń bir bóligi kirdi. Azıa respýblıkalary óz betinshe ketti.
Biz reseılikterge qarjy jaǵynan shyǵynǵa bolsa da 3 sanyn 7-ge aýystyrýǵa daıyn ekenimizdi aıttyq. Biraq jumys biz oılaǵannan qıyn boldy. Sebebi qazirgi zamanǵy sıfrlyq múmkindikter áldeqaıda az boldy jáne beldi uıymdarmen elshilikterge hat joldap, budan bylaı Qazaqstannyń telefon kody +77 den bastalatynyn bárine habarladyq.
+77 kody ádeıi tańdaldy, sebebi túrkiler men Qazaqtar úshin "7" sany úlken mánge ıe.
Nanym, senimnen bólek, 7 sanyna qatysty úlken josparlarymyz boldy. Máselen men Astana úshin úsh jetiden turatyn telefon kodyn jasaýdy iske asyrǵym keldi. Osylaısha, elimizdiń astanasyna qońyraý shalý úshin +77 777, sodan keıin abonenttiń naqty telefon nómirin terý qajet bolatyn edi. Qyzmetimdi aýystyrǵannan keıin maqsatym arman kúıinde qaldy", – dep ókinishin jetkizdi.
Aıta keteıik telefon nómirleri - bul kóbeıtýge bolmaıtyn resýrs. Mysaly, qazir Qytaıda telefon bazasyn ulǵaıtý ótkir máselege aınaldy. Barlyǵy 15 sıfrmen shektelgen, oǵan terý kody kiredi.
Al telefon úsh sannan turǵan kezde qandaı tosyn syı kútip tur degenge saýalǵa Serik Búrkitbaev bylaı jaýap berdi.
"Kod sany úshten turǵanda abonenttik bazany on ese qysqartýǵa týra keledi. Eki tańbaly kodty ózgertý týraly sheshimniń artynda ne turǵanyn bilmeımin. Búginde uıaly jáne spýtnıktik halyqaralyq operatorlardyń kópshiligi qyrýar qarjy jumsasa da, kod alý múmkindigine qol jetkize almaýda. Biz 15 sannan eki emes, úsheýin alyp tastadyq. Erikti túrde.
Iá, búginde bizde abonenttik bazany ulǵaıtýdyń shuǵyl qajettiligi týyndaǵan joq bolatyn. Osy sheshimimiz arqyly Reseı budan bylaı +7 nómirine jeke dara ıe bolyp qaldy. Alaıda qazir biz úsh tańbaly kodpen Qyrǵyzstan, Ózbekstanmen jáne taǵy basqa memlekettermen bir qatardamyz.
Mınıstr Baǵdat Mýsın halyqqa elimizdiń telefon kodyn ne sebepti ózgertip jatqanyn shynaıy túrde aıtý qajet dep oılaımyn. Qazir saıasattan alys bolsam da, eldiń bolashaǵyn anyqtaıtyn úlken sheshimder onyń sońynda ne bolatynyn naqty túsindirýdi talap etedi », - dedi Serik Búrkitbaev.
Qalaı degende 3 tańbaly kodtyń jeńisi men jeńilisi aldaǵy ýaqyttyń enshisinde.
https://www.youtube.com/watch?v=M0EVhmK5YPs
