Jambyl oblysynda temirjolǵa shyǵyp ketken bir otar qoi júk poiyzynyń astynda qaldy. Oqiǵa saldarynan 70 qoidyń barlyǵy qyrylyp, poiyz qozǵalysy shamamen bir saǵatqa keshikti, dep habarlaidy dalanews.kz.
Kóliktegi politsiia departamentiniń málimetinshe, jaǵdai 2 qazan kúni tańerteń Juma men Tamdy stantsiialarynyń arasyndaǵy temirjol ýchaskesinde bolǵan. Jolǵa mal shyqqanyn baiqaǵan mashinist poiyzdy shuǵyl toqtatýǵa árekettengen. Alaida araqashyqtyqtyń jaqyn bolýyna bailanysty soqtyǵysty boldyrmaý múmkin bolmaǵan.
Oqiǵadan keiin poiyzdar qozǵalysy 48 minýtqa toqtady. Politsiia maldyń 66 jastaǵy Taraz turǵynyna tiesili ekenin anyqtady. Qoilardy temirjoldyń arnaiy bólingen aýmaǵynda jaiǵany úshin onyń ústinen ákimshilik hattama toltyryldy.
Vedomstvo deregine súiensek, 2026 jyldyń basynan beri poiyzdardyń shuǵyl tejelýine bailanysty 1166 jaǵdai tirkelgen. Sonyń 881-ine úi janýarlarynyń temirjolǵa shyǵyp ketýi sebep bolǵan.
Kólik politseileri mal ielerine janýarlardy temirjol mańynda qaraýsyz qaldyrmaý keregin eskertti. Mundai jaǵdai poiyz qozǵalysyna kedergi keltirip qana qoimai, jolaýshylar men temirjol qyzmetkerleriniń ómirine qaýip tóndirýi múmkin.
