"ەندى ءبىزدىڭ ەلدەن باسقا مەملەكەتكە قوڭىراۋ شالعاندا، شەتەلدىكتەردىڭ تەلەفونىندا قازاقستان دەگەن جازۋ شىعادى. سونداي-اق حالىقارالىق دەڭگەيدەگى سيفرلى سەرۆيستەردى قولدانعاندا دا، بارلىق جەردە قازاقستان دەگەن سيگنال شىعادى" دەپ جاقسى اقجولتاي جاڭالىقتى ەلگە جەتكىزگەن ەدى.
ءيا، كەزىندە كسرو تاراعاندا، +7 حالىقارالىق تەلەفون كودى ەكى ەلگە بىردەي بەكىتىلگەن. قازاقستانعا عانا تيەسىلى حالىقارالىق كودقا قول جەتكىزۋ ءۇشىن بىلتىرعى جىلدان بەرى تەلەكوممۋنيكاسيا سالاسىنداعى كومپانيالارمەن بىرگە جان-جاقتى جۇمىس جۇرگىزىپ، كەلىسسوزدەردىڭ ناتيجەسىندە ءبىزدىڭ ەلگە دەربەس +997 كودى بەكىتىلدى.
اپتا جاڭالىعى بولعان اقپاراتتى قىزۋ تالقىلاندى. حالىقتى ەلەڭ ەتكىزگەن تىڭ جاڭالىققا 2000 جىلداردىڭ باس كەزىندە كولىك جانە كوممۋنيكاسيا ءمينيسترى بولعان سەرىك بۇركىتبايەۆ ءوز ويىن ءبىلدىردى دەپ حابارلايدى Dalanews.kz.
"باعدات مۋسين ەشقانداي امەريكا اشقان جوق، قازىرگى تەلەفون كودىنا مەنىڭ دە تىكەلەي قاتىسىم بار" دەپ اڭگىمەسىن باستادى.
"1999 جىلى مەن بۇل ماسەلەمەن جەكە اينالىسقان بولاتىنمىن جانە ءبىز قازاقستاندى +7 ايماعىندا ۇستاۋ ءۇشىن كۇرەسىپ، بىزگە +77 ەكى تاڭبالى تەلەفون كودىن بەلگىلەدىك. الەم بويىنشا ءاربىر تەلەفون ابونەنتىنىڭ جەكە سايكەستەندىرۋى كودى بار. تەلەفون نومىرلەرى مۇناي مەن سۋ سياقتى رەسۋرس. جانە بۇل رەسۋرس جاڭارتىلمايدى. راديوجيىلىك پەن سپۋتنيكتىك بايلانىس بىردەي شەكتەۋگە يە.
كودتاعى ءبىرىنشى سيفر مەملەكەتتىڭ اتىن ەمەس، ابونەنتتىڭ گەوگرافيالىق ورنىن بىلدىرەدى. مىسالى سولتۇستىك امەريكاعا +1 ءنومىرى بەرىلدى. ياعني، كانادا مەن اقش تۇرعىندارى وسىلاي قولدانىپ ءجۇر. ەۋروپاعا +3 جانە +4 كودى تيەسىلى. الەمنىڭ كوپتەگەن ەلدەرى كارى قۇرىلىقتا ورنالاسقاندىقتان ەكى سيفر بەرىلگەن.
ال +7 - ورتالىق ەۋرازيانىڭ گەوگرافيالىق كودى، بۇرىنعى كسرو. وداقتىڭ بارلىق رەسپۋبليكالارىندا باستاپقىدا +7 كودى بولعان، قازىرگى ۋاقىتتا تەك ەكى ەل قالدى. رەسەي مەن قازاقستان.
كەڭەس ۇكىمەتى ساياسي كارتادان ءبىر جولا كەلمەسكە كەتكەننەن كەيىن، باسقا بارلىق باۋىرلاس ەلدەر، باسقا كودقا اۋىستى. شىعارىلدى دەسەم ارتىق ايتپاعانىم بولار.
ال ءبىز ءۇشىن كيەلى 7 سانىندا ساقتاپ قالۋعا مەن ءوزىم كوپ كۇش سالدىم. كورشى مەملەكەتپەن كەلىسسوز جۇرگىزىپ، رەسەيلىك سەرىكتەستەر بىزگە جەڭىلدىكتەر جاساۋعا كەلىستى، ال ءبىز رەسەيمەن بىرگە +7 سانىن ساقتاپ قالدىق"، – دەيدى ول.
ەكس ءمينيستردىڭ ايتۋىنشا قازاقستاننان شەتەلگە قوڭىراۋ شالعاندا «رەسەي» دەگەن بەلگى پايدا بولسا، بۇل بيلىكتىڭ بەيقامدىعىن بىلدىرەدى. ءبىراق بۇل كەمشىلىكتى تۇزەتۋ قيىن شارۋا ەمەس. تەك ءتيىستى ورگاندار مەن كومپانيالارعا بىرنەشە قوسىمشا قۇجاتتار مەن وتىنىشتەر جازۋ ارقىلى وڭاي تۇزەتىلۋى مۇمكىن.
ال ءبىرىنشى جەتىدەن كەيىن ءبىزدىڭ ەلگە دە ەكىنشى - «جەكە» جەتىلىك بەرىلگەندىكتەن، قازاقستان رەسپۋبليكاسى +77 جەكە سايكەستەندىرۋ كودىنا يە بولعان. ەكىنشى جەتى بۇركىتبايەۆتىڭ زور ەڭبەگىنىڭ ارقاسىندا مۇمكىن بولعان ەكەن. قوس جەتىگە قول جەتكىزۋ وڭاي بولماپتى.
"بىزدە ەستەرىڭىزدە بولسا باستاپقىدا ەكىنشىسى 3 سانى بولدى، ياعني +73 كودى. بۇل ايماققا قازاقستانمەن بىرگە ورتالىق ازيا، سونىمەن قاتار ءسىبىردىڭ ءبىر بولىگى كىردى. ازيا رەسپۋبليكالارى ءوز بەتىنشە كەتتى.
ءبىز رەسەيلىكتەرگە قارجى جاعىنان شىعىنعا بولسا دا 3 سانىن 7-گە اۋىستىرۋعا دايىن ەكەنىمىزدى ايتتىق. ءبىراق جۇمىس ءبىز ويلاعاننان قيىن بولدى. سەبەبى قازىرگى زامانعى سيفرلىق مۇمكىندىكتەر الدەقايدا از بولدى جانە بەلدى ۇيىمدارمەن ەلشىلىكتەرگە حات جولداپ، بۇدان بىلاي قازاقستاننىڭ تەلەفون كودى +77 دەن باستالاتىنىن بارىنە حابارلادىق.
+77 كودى ادەيى تاڭدالدى، سەبەبى تۇركىلەر مەن قازاقتار ءۇشىن "7" سانى ۇلكەن مانگە يە.
نانىم، سەنىمنەن بولەك، 7 سانىنا قاتىستى ۇلكەن جوسپارلارىمىز بولدى. ماسەلەن مەن استانا ءۇشىن ءۇش جەتىدەن تۇراتىن تەلەفون كودىن جاساۋدى ىسكە اسىرعىم كەلدى. وسىلايشا، ەلىمىزدىڭ استاناسىنا قوڭىراۋ شالۋ ءۇشىن +77 777، سودان كەيىن ابونەنتتىڭ ناقتى تەلەفون ءنومىرىن تەرۋ قاجەت بولاتىن ەدى. قىزمەتىمدى اۋىستىرعاننان كەيىن ماقساتىم ارمان كۇيىندە قالدى"، – دەپ وكىنىشىن جەتكىزدى.
ايتا كەتەيىك تەلەفون نومىرلەرى - بۇل كوبەيتۋگە بولمايتىن رەسۋرس. مىسالى، ءقازىر قىتايدا تەلەفون بازاسىن ۇلعايتۋ وتكىر ماسەلەگە اينالدى. بارلىعى 15 سيفرمەن شەكتەلگەن، وعان تەرۋ كودى كىرەدى.
ال تەلەفون ءۇش ساننان تۇرعان كەزدە قانداي توسىن سىي كۇتىپ تۇر دەگەنگە ساۋالعا سەرىك بۇركىتبايەۆ بىلاي جاۋاپ بەردى.
"كود سانى ۇشتەن تۇرعاندا ابونەنتتىك بازانى ون ەسە قىسقارتۋعا تۋرا كەلەدى. ەكى تاڭبالى كودتى وزگەرتۋ تۋرالى شەشىمنىڭ ارتىندا نە تۇرعانىن بىلمەيمىن. بۇگىندە ۇيالى جانە سپۋتنيكتىك حالىقارالىق وپەراتورلاردىڭ كوپشىلىگى قىرۋار قارجى جۇمساسا دا، كود الۋ مۇمكىندىگىنە قول جەتكىزە الماۋدا. ءبىز 15 ساننان ەكى ەمەس، ۇشەۋىن الىپ تاستادىق. ەرىكتى تۇردە.
ءيا، بۇگىندە بىزدە ابونەنتتىك بازانى ۇلعايتۋدىڭ شۇعىل قاجەتتىلىگى تۋىنداعان جوق بولاتىن. وسى شەشىمىمىز ارقىلى رەسەي بۇدان بىلاي +7 نومىرىنە جەكە دارا يە بولىپ قالدى. الايدا ءقازىر ءبىز ءۇش تاڭبالى كودپەن قىرعىزستان، وزبەكستانمەن جانە تاعى باسقا مەملەكەتتەرمەن ءبىر قاتاردامىز.
مينيستر باعدات مۋسين حالىققا ەلىمىزدىڭ تەلەفون كودىن نە سەبەپتى وزگەرتىپ جاتقانىن شىنايى تۇردە ايتۋ قاجەت دەپ ويلايمىن. ءقازىر ساياساتتان الىس بولسام دا، ەلدىڭ بولاشاعىن انىقتايتىن ۇلكەن شەشىمدەر ونىڭ سوڭىندا نە بولاتىنىن ناقتى ءتۇسىندىرۋدى تالاپ ەتەدى »، - دەدى سەرىك بۇركىتبايەۆ.
قالاي دەگەندە 3 تاڭبالى كودتىڭ جەڭىسى مەن جەڭىلىسى الداعى ۋاقىتتىڭ ەنشىسىندە.
https://www.youtube.com/watch؟v=M0EVhmK5YPs
