Endi jurtshylyq shahar mańyndaǵy jasyl beldeýdi atpen aralai alady. Orman aýmaǵynda qala ákimdiginiń bastamasymen jalpy uzyndyǵy 13,2 shaqyrym bolatyn atpen júrýge arnalǵan soqpaq paidalanýǵa berildi. Jasyl beldeýde atpen serýendegisi kelgender arnaiy orynǵa kelip, belgili bir ýaqyt aralyǵyna jylqyny jalǵa alýy kerek. Munda olarǵa atpen serýendeýge arnalǵan qorǵanysh kiimderi berilip, qaýipsizdik erejeleri túsindiriledi.
«Atpen júrýge arnalǵan soqpaqta qala turǵyndary men qonaqtarynyń qaýipsiz demalysy úshin barlyq jaǵdai qarastyrylǵan. Atap aitsaq, nysan aýmaǵynda 5 demalys aimaǵy, avtoturaq, modýldik ájethanalar bar. Beinebaqylaý kameralary da ornatylǵan. Soqpaqta atpen serýendeý qyzmeti jyl on eki ai kórsetiledi. Attardy kútip-baptaý, kelýshilerge qyzmet kórsetý baǵytynda 15 jańa jumys orny ashyldy. Munda kelýshilerge tabiǵat aiasynda taza aýada atpen serýendeýmen birge atqa minýdi úiretý qyzmeti de usynylady. Jaqynda áleýettik joba aiasynda densaýlyǵynda aqaýy barlarǵa arnap, ippoterapiia qyzmeti iske qosylmaq», - deidi Nur-Sultan qalasy ákimdiginiń Qorshaǵan ortany qorǵaý jáne tabiǵatty paidalaný basqarmasynyń bólim basshysy Qydyr Jienáli.
Serýendeýge arnalǵan attardy «Taitóbe» aýyl sharýashylyǵy koopertiviniń menshigi. Kooperativ tóraǵasy Murat Qasymov ta týristerge qyzmettiń erekshe túrin usynýdaǵy josparymen bólisti.
«Qazir munda 15 at bar. Olardyń qataryn ippoterapiiaǵa arnalǵan jylqylarmen tolyqtyrýdy josparlap otyrmyz.
Sonymen qatar balalarǵa arnap ponilerdi ákelemiz. Attardyń minezi árqily. Sáikesinshe kelýshilerdiń arasynda da burynnan atqa minip júrgender nemese endi úirengisi keletinder de tabylyp jatady. Olar arnaiy nusqaýshynyń kómegimen atqa minýdi úirenip shyǵady.
Sondai-aq jaz ailarynda arbaǵa, qysta shanaǵa jegýge arnalǵan attar da bar. Bir sózben aitqanda kez-kelgen talǵamdaǵy tutýshynyń kóńilinen shyǵýǵa barymyzdy salamyz. Atpen serýendeýden bólek qoǵamdyq tamaqtaný orny, qymyzhana da ashamyz», - deidi kooperativ tóraǵasy.
Elordanyń jasyl beldeýi elimizdiń Tuńǵysh Prezidenti Nursultan Nazarbaevtyń sheshimimen 1997 jyly qalany jelden qorǵaý jáne halyqtyń ómir súrýi úshin qolaily klimat qalyptastyrý maqsatynda quryldy.
Bir sózben aitqanda, jasyl beldeý aýmaǵy tabiǵat aiasynda elorda mańynda at ústinde demalys ótkizgisi keletinder úshin taptyrmas oryn bolady.
Aita keteiik, «Týristik marshrýt» dep atalatyn jańa nysan (jasyl beldeý aýmaǵyndaǵy atpen júrýge arnalǵan soqpaq jol) ornalasqan jasyl beldeý – qala qalqany. Onyń aýmaǵynda 12,1 mln-nan astam aǵash pen buta ósedi. Sol siiaqty munda qoian, túlki, qarsaq, kekilik, qyrǵaýyl jáne t.b. tirshilik etedi.
Qalanyń klimaty tym kontinentti ekenin eskersek, «jasyl beldeý» ekologiiany aitarlyqtai jaqsartyp qana qoimai, klimattyq jaǵdaidy jumsartýǵa múmkindik beredi.
