AQSh-tyń Geinsvill qalasynyń turǵyny Dominik Peidj UF Health Shands aýrýhanasyn sotqa berdi. Onyń aitýynsha, dáriger jibergen óreskel qatelik eki jasar ulynyń ólimine sebep bolǵan, dep dalanews.kz tilshisi kznews.kz saityna silteme jasap habarlaidy.
Qaiǵyly oqiǵa 2024 jyldyń 1 naýryzynda bolǵan. Dominik Peidj uly De’Markýsty toqtaýsyz jylap, tamaq ishpei, diareiadan álsiregen soń aýrýhanaǵa jetkizgen.
Tekserý barysynda balanyń qanyndaǵy kalii deńgeii 2,8 ekeni anyqtalyp, ony shuǵyl túrde tolyqtyrý qajet bolǵan.
Alaida osy sátte aýyr qatelik ketken. Dáriger Tsziabi Chen kalii fosfatynyń mólsherin 15 mmol/litr dep jazyp jibergen. Bul balaǵa qajet dozadan on ese kóp bolǵan. Negizinde kórsetkish 1,5 mmol/litr bolýy tiis edi.
Útirdiń durys qoiylmaýy saldarynan qaýipti mólsher engizilgen. Eń soraqysy – qatelikti farmatsevt te, ózge meditsina qyzmetkerleri de baiqamaǵan. Sonyń nátijesinde kishkentai bala joǵary dozany eki ret qabyldaǵan.
Ekinshi qabyldaýdan keiin De’Markýstyń aǵzasyndaǵy kalii deńgeii 7,8-ge deiin kóterilip, júregi toqtap qalǵan. Dárigerler onyń júrek soǵysyn qalpyna keltirgenimen, uzaq ýaqyt otteginiń jetispeýi miy men ishki aǵzalaryn aýyr zaqymdaǵan.
Bala eki apta boiy apparattyń kómegimen ǵana ómir súrgen. Alaida jaǵdaiy jaqsarmaǵan soń, 2024 jyldyń 18 naýryzynda ata-anasy ómirdi qamtamasyz etetin qurylǵyny ajyratý týraly aýyr sheshim qabyldaǵan.
"Sol kún áli kúnge deiin kóz aldymnan ketpeidi. Uiyqtasam da, bári túsime kirip, shoshyp oianamyn", – deidi Dominik Peidj.
