Atap aitqanda, ministrlik respýblikalyq biýdjetke túsimdi molaitý úshin birqatar salyqtyq jeńildikterdi alyp tastaýdy usyndy. Alaida keńes tóraǵasy, Májilis depýtaty Amanjan Jamalovtyń aitýynsha, salyqtyq jeńildikterdi alyp tastaý baǵanyń kúrt ósýine jáne investitsiialyq ahýaldyń nasharlaýyna ákelýi múmkin. Mundai sharalardyń respýblikalyq biýdjet úshin paidasy mardymsyz.
– Ministrliktiń baiandamalaryn tyńdasań, kóp is atqarylyp jatqan sekildi, biraq aýyz toltyryp aitarlyqtai dúnie joq. Bul jeńildikterdi ne úshin alyp tastaý kerek ekeni túsiniksiz. Dárilik zattar úshin qosymsha qun salyǵy boiynsha bul jeńildiktiń ekonomikalyq áseri joq. Biraq qosymsha qun salyǵy taýardyń baǵasyna kirmei me? Jeńildikterdi alyp tastaý dári-dármek baǵasynyń ósýine ákeletini anyq, – dedi Amanjan Jamalov.
Partiianyń sailaýaldy ýádeleri aiasynda QQS mólsherlemesin saralaý qarastyrylǵan. Ulttyq ekonomika vitse-ministri Azamat Ámrin habarlaǵandai, áleýmettik mańyzy bar taýarlarǵa QQS-nyń tómendetilgen mólsherlemesin engizý, osy salyq túriniń jalpy mólsherlemesiniń ósýine alyp keledi. Alaida, Amanjan Jamalov bul máselelerdi bir-birimen bailanystyrýǵa bolmaitynyn atap ótti.
– Ótken jyly Qazaqstanda áleýmettik mańyzy bar taýarlarǵa QQS 8%-ǵa tómendetilgen mólsherleme qoldanyldy. Osylaisha, baǵanyń ósýine jol berilmedi. Qazir infliatsiianyń ósýin eskersek, bul másele asa ózekti. Nátijesine kelsek, salyq jinalymy tipti artty. Al naqty QQS tómendetilgen mólsherlemesinen bolǵan shyǵyndar, Ministrliktiń baǵalaýy boiynsha, bar bolǵany 9 mlrd. teńgeni qurady. Sondyqtan jalpy mólsherlemeni kóterý boiynsha talap qoiýdyń qajeti joq, sizderge ondai tapsyrma berilmegen, – dedi Keńes tóraǵasy Azamat Ámringe qaratyp.
Óz kezeginde Qarjy vitse-ministri Baqtiiar Qojahmetov salyqtyq jáne kedendik ákimshilendirýdi tsifrlandyrý boiynsha júrgizilip jatqan jumystar týraly baiandady.
– Ótken jyldan bastap onlain baqylaý-kassa mashinalaryn (BKM) paidalanýǵa kóshý júrgizildi. Biyl «E-salyq-Business» mobildi qosymshasy arqyly pilottyq joba júzege asyrylýda. Barlyq jerde taýar ainalymyn baqylaý úshin taýarǵa ilespe júkqujat (TIJ) engizilýde, – dedi Bahtiiar Qojahmetov.
Bul rette, Keńes tóraǵasy 2015 jyldan beri elimizde 660 myńnan astam qatysýshy tirkelgen elektrondyq shot-faktýralar júiesi (EShF) qarqyndy jumys isteitinin eske saldy.
– Siz onlain baqylaý-kassalyq mashina, elektrondyq shot-faktýra, taýarǵa ilespe júkqujat, virtýaldy qoima júieleri týraly aýyz toltyra aittyńyz. Biraq kásipkerlerden bul júielerdiń jumysyna qatysty únemi shaǵym túsedi. Óitkeni olar bir-birinen kóshiredi. Eger elektrondyq shot-faktýralar taýarlardy baqylaýdyń negizi bolsa, onda sonyń negizinde jumys júrgizilýi kerek.
Jańa júieler men pilottyq jobalar oilap tabýdyń qajeti joq. Bizneske olardy paidalaný yńǵaily bolýy úshin júielerdi ońailatý qajet. Al qazir sizder tek kásipkerlerdiń úreiin alyp júrsizder, – dedi Amanjan Jamalov.
Otyrys qorytyndysy boiynsha Ulttyq ekonomika ministrligine usynylǵan salyq jeńildikteriniń tizbesin qaita qaraý, sondai-aq óndiristik jáne áleýmettik mańyzy bar taýarlarǵa QQS mólsherlemelerin saralaý boiynsha naqty usynystar engizý usynyldy.
Qarjy ministrligine qoldanystaǵy júieler men pilottyq jobalardy jeńildetýge nazar aýdarý jáne basqa júielermen qaitalanýdy boldyrmaý maqsatynda «Elektrondyq shot-faktýralar» aqparattyq júiesi negizinde taýarlardyń qadaǵalanýyn qamtamasyz etý usynylady.
