Almaty metrosynyń ekinshi iske qosý keshenindegi aralyq tonnelderden qazir árleý jumystary júrip jatyr. Metronyń bul bóligi «Saryarqa». «Baýyrjan Momyshuly» eki beketinen turady. Metropolitenniń birinshi jelisiniń ekinshi kezeginiń ekinshi iske qosý kesheni ýchaskesiniń trassasy Abai dańǵylynyń astynda, Altynsarin dańǵylynan Iassaýi kóshesine deiin batys baǵytta ornalasqan. Qurylys uzyndyǵy eki joldy baǵytta 3,08 shaqyrymdy quraidy.
Ekinshi iske qosý kesheniniń jalpy daiyndyǵy 91%-dy quraidy. Búginde temir-beton konstrýktsiialarynyń qurylysy, aralyq tonnelderdi qazý aiaqtaldy, sáýlet-árleý jumystary, joldyń joǵarǵy qurylysy aiaqtalyp qalǵan. Qalǵan jumystarǵa injenerlik jelilerdi tóseý jáne jabdyqty iske qosý kiredi.
Búginde ortasha táýliktik jolaýshylar aǵyny 30 myń adamdy quraidy. Mamandardyń esepteýi kórsetkendei, ekinshi iske qosý kesheni paidalanýǵa berilgen soń ortasha táýliktik jolaýshylar aǵyny shamamen 86 myń adamǵa jetetin bolady. Bul Abai dańǵylyndaǵy kólik qozǵalysyn edáýir jeńildetýge jáne myńdaǵan qala turǵyndary men qonaqtarynyń mobildiligin arttyrýǵa múmkindik beredi.
«Saryarqa» beketi – tereń tósemdi, pilon tipti. Vestibiýlden, eki kirý tobynan turady. 2 Lift, 8 eskalator ornatyldy. Ol «Femili» saiabaǵynyń janyna, №3-8, 12 shaǵyn aýdandar bar, iaǵni qalanyń eń tyǵyz eldi mekenderiniń birinde ornalasqan.
«Baýyrjan Momyshuly» beketi – usaq qalanǵan, kolonna tipti. Eki jerasty vestibiýlinen, alty kirý tobynan turady. 6 lift, 15 eskalator qarastyrylǵan. Abai dańǵylynyń júris bóliginiń astynda, Momyshuly kóshesiniń batysynda ornalasqan. Beket Jetisý, Jetisý-2, Jetisý-4, Mamyr, Mamyr-5, Mamyr-7 shaǵyn aýdandaryn qamtidy.
Qala ákimi Baqytjan Saǵyntaev jyl sońyna deiin stantsiialardyń tehnikalyq iske qosylýyn qamtamasyz etý úshin qurylys-árleý jumystaryn joǵary qarqynmen júrgizýdi tapsyrdy. Ol úshinshi iske qosý kesheni qurylysynyń barysyn baǵalady.
Metropolitenniń birinshi jelisiniń ekinshi kezeginiń úshinshi iske qosý kesheni ýchaskesiniń trassasy qurylysy júrip jatqan Abai dańǵylynyń astynda, Iassaýi kóshesinen Áshimov kóshesine deiin batys baǵytta ornalasqan. Uzyndyǵy 2,5 shaqyrym qos joldy baǵyttaǵy aralyq tonnelderden jáne usaq tóselgen «Qalqaman» beketinen turady. Qurylysty kelesi jyldyń sońyna deiin aiaqtaý josparlanýda. Eseptik jolaýshylar aǵyny kúnine shamamen 93 myń adamdy quraityn bolady.
