Naqtyraq aitsaq oblystyq aýrýhanaǵa qarasty kardiohirýrgiialyq ortalyqtyń jumysymen tanysyp qaittyq. Ortalyq osydan eki jyl buryn qyrkúiek aiynda ashylǵan eken. Al biylǵy jyldyń shilde aiynda ortalyq dárigerleri jańa «G» blogyna kóshipti. Aýrýhana basshylary bizge osy blogty tolyqtai tanys etti.
Alaida bul týraly aitpas buryn aldymen óńirdegi eń iri aýrýhananyń búgingi tynys-tirshiliginen habardar etelik. Meditsinalyq mekeme 365 adamdy qabyldai alady. Ázirgi kúni munda 150-ge jýyq dáriger qyzmet etýde. Mańǵystaý oblystyq aýrýhanasy direktorynyń orynbasary Marjan Nurlanovanyń aitýynsha mekeme 4 ortalyqty biriktirip otyr. Atap aitsaq, bul – kardiohirýrgiialyq, neirohirýrgiialyq, somatikalyq jáne hirýrgiialyq ortalyq. Bulardyń árqaisysynyń óz bólimsheleri bar. Aita ketelik, biyl óńirge 50-ge tarta jas maman kelgen. Olardyń kópshiligi qalalyq, aýdandyq deńgeidegi aýrýhanalarǵa ornalasqan.
– Óńirge jas mamandardy tartý úshin eń aldymen áleýmettik pakettiń bolǵany mańyzdy. Bul baǵytta jumys júrip jatyr. Bolashaqta biz aýrýhanamyzǵa shaqyrtý alǵan jas mamandardy baspanamen qamtamasyz etetin bolamyz, – deidi Marjan Nurlanova.
[caption id="attachment_8478" align="alignleft" width="387"]
Al alǵash 2009 jyly «Kardiologiialyq jáne kardiohirýrgiialyq kómek baǵdarlamasy» aiasynda bólimshe retinde ashylǵan kardiohirýrgiialyq ortalyq 15 tósek-orynǵa arnalǵan eken. Ortalyq óz qurylymyna kardiologiia-aritmologiia, qan tamyrlarynyń patologiiasy, kardioreanimatsiialyq, kardiooperatsiialyq blok jáne saýyqtyrý bólimshesin biriktirip otyr. Qazir munda Astanadan, anyqtap aitsaq Ulttyq kardiohirýrgiialyq ortalyqtan shaqyrtý alǵan 20-ǵa tarta (onyń ishinde 5 kardiohirýrg) bilikti maman jumys isteidi.
Qurylǵaly beri munda 1000-ǵa jýyq kardiohirýrgiialyq ota jasalǵan. Onyń ishindegi 50 operatsiia 1 jasqa jetpegen balalarǵa jasalǵanyn bólek aita keteiik.
30 balanyń ómirin qutqarǵan...
[caption id="attachment_8476" align="alignright" width="334"]
Balaǵa ota jasaýǵa tipti tájiribeli hirýrgterdiń ózi bata bermeidi. Bul úshin dátiń berik, júikeń shydamdy bolǵany mańyzdy. Atalǵan ortalyqtyń kardioreanimatsiia jáne kardioota bóliminiń meńgerýshisi – Timýr Óteǵalievke Mańǵystaý turǵyndarynyń aitar alǵysy sheksiz. Timýr sońǵy 2 jylda júreginde aqaýy bar, bylaisha aitqanda ajal aýzynda turǵan 30 nárestege ota jasap, aman alyp qalypty! Eńbegi elene bermeitin, al kemshiligi bolsa birden kózge túsetin dárigerdiń arasynda da óz kásibine adal azamattar barshylyq ekenine bul joly naqty kóz jetkizdik.
Al Timýr Kenjeshuly «otandyq kardioreanimatsiianyń sheshimin tabýǵa tiisti túitkildi máselesi» kóp deidi.
– Birinshiden, elimizde kardioreanimatologtar jetispeidi. Al bul baǵyttaǵy mamandardyń barlyǵy birdei bilikti emes. Jalpy mundai maman jasap shyǵarý ońai emes. Ýniversitette alǵan bilimi óz aldyna, dárigerdiń ózin sanatyn qarai bóletin bolsaq, bilikti kardiohirýrgty daiyndap shyǵý úshin 10 jyl ketse, kardioreanimatologtarǵa 15 jyl ýaqyt qajet, – deidi ol.
Dáriger Pianyń shákirtteri
[caption id="attachment_8477" align="alignleft" width="301"]
Kardiohirýrgiialyq ortalyqqa Jeńis Qozybaev basshylyq etedi. Onyń aitýynsha, jańadan ashylǵan «G» blogy zamanaýi meditsinalyq tehnologiialarmen jaraqtanǵan. Munda operatsiialyq, reanimatsiialyq blok, tynystap, demalýǵa arnalǵan yńǵaily bólmeler jáne ortalyqtyń óz ashanasy bar. Jańadan ashylǵan blogtyń aýmaǵy 3 myń sharshy metrdi quraidy. Operatsiialyq bloktyń ózi 10 zaldy biriktirse, reanimatsiialyq blok 16 tósek-orynǵa arnalǵan.
– AQSh-ta kardiohirýrgiia jetik damyǵan. Sol sebepti aýrýhanadaǵy, onyń ishinde ortalyqtaǵy meditsinalyq qurylǵylardyń barlyǵy Amerika tehnologiiasy. Árbir naýqastyń aldynda onyń qan qysymyn, júrek qaǵysyn baqylaityn jáne tynys alýyn jeńildetetin qurylǵylar turady. Jaqynda ǵana quny 250 mln. teńge turatyn «Angiograf» qurylǵysyn satyp aldyq. Endigi jerde júrek-qan tamyrlary operatsiiasyn osy qurylǵynyń kómegimen jasaityn bolamyz, – deidi Jeńis Bolatuly.
Ilgeride biz ortalyqta jumys isteitin dárigerlerdiń barlyǵy Astanadan shaqyrtý alǵan bilikti mamandar ekenin aitqan edik. Sonyń biri – Jeńis Qozybaev. Ataqty kardiohirýrg, Ulttyq ǵylymi kardiohirýgiialyq ortalyqtyń tóraǵasy Iýrii Pianyń shákirti.
– Kei kezderi dárigerler para alady, korrýptsiianyń bir ushy osylarda jatyr degen pikirdi jii estimin. Mysalǵa, biz halyqpen etene jumys kásiptiń ielerimiz. Kei kezderi kórsetken qyzmetińe rizashylyq tanytqan azamattar bir qorap kámpiti men sharabyn paketke salyp jumys ornyńa ákep qoiyp ketedi. Biz emdelýshilerden «áldene alyp kel, dámetip otyrmyz» demesimiz anyq qoi. Menińshe, bul halyqtyń kóńili, kórsetken qyzmetińe aitqan riiasyz alǵysy. Biz óz aramyzda muny «vrachpaket» dep ataimyz. Óz basym Iýrii Pianyń shákirtimin. Para alyp jatqanymdy kórse, ol meni eki sózge kelmei jumystan shyǵaryp jiberer edi. Iýrii Vladimiruly «birinshi kezekte emdelýshiniń jaǵdaiyna nazar aýdarý qajet» degen qaǵidany qulaǵymyzǵa quidy. Men úshin bul buljymas bailam», – deidi Jeńis Qozybaev.
Sóz sońynda aitarymyz Mańǵystaý oblystyq aýrýhanasynda «aq halatty abzal jan» degen atqa laiyqty azamattar jumys isteidi eken. Biz buǵan anyq kóz jetkizip qaittyq.
Dýman BYQAI
