"Rosatom" kompanıasy Almaty oblysy Jambyl aýdanyndaǵy Úlken aýylynda salynatyn atom elektr stansıasynyń qurylys alańynda jobalaý jáne izdestirý jumystaryn bastady. Bul týraly Atom energıasy agenttiginiń tóraǵasy Almasadam Sátqalıev habarlady, dep habarlaıdy Dalanews.kz.

Sátqalıevtiń aıtýynsha, qazirgi tańda tereńdigi 30-dan 150 metrge deıingi 70-ten astam uńǵyma qazylyp, topyraq úlgileri zerthanaǵa jiberilgen. Sonymen qatar aldyn ala seısmıkalyq jáne kartografıalyq jumystar júrgizilgen. Jınalǵan barlyq derekter jobanyń tehnıkalyq-ekonomıkalyq negizdemesine engizilmek.

"Halyqaralyq atom energıasy agenttiginiń (MAGATE) standarttaryna sáıkes, egjeı-tegjeıli ınjınırıń pen jobalyq qujattamaǵa deıin shamamen 18 aı boıy aldyn ala zertteý jumystary júrgiziledi. Osy kezeńde stansıanyń naqty ornalasý koordınattary anyqtalady. Sondaı-aq negizgi ınjenerlik ınfraqurylymdy tartý, jumysshylar qalashyǵyn ornalastyrý jáne qazaqstandyq qamtý úlesin, ıaǵnı elimizde óndiriletin jabdyqtardyń mólsherin aıqyndaý máseleleri jobalyq qujattamaǵa engiziledi", – dedi Almasadam Sátqalıev.

Onyń aıtýynsha, atom elektr stansıasynyń naqty ornalasý núktesi ázirge belgilenbegen, ol ınjenerlik zertteý nátıjesinde anyqtalady.