Qujat – adamnyń qoǵam aldyndaǵy ainasy, memleket aldyndaǵy mártebesi. Ol barda esik te ashyq, múmkindik te mol. Al onsyz ómir súrý – óz elińde ózińdi bóten seziný sekildi. Osyndai taǵdyr taýqymetin tartyp júrgen Moiynqum aýdanynyń turǵyny, 70 jastan asqan aqsaqal Mýsin Malybaevtyń hikaiasy búginde adam janyn jylytatyn, júrekke jetetin mysalǵa ainaldy, dep habarlaidy Dalanews.kz
Malybaev Mýsin Kasataevich – túbi qazaq, 1985 jyly Qyrǵyzstannan ata qonysyna, týǵan jeri Qazaqstanǵa qonys aýdarǵan. Sol kezde ómir jańa arnaǵa burylyp, Moiynqum topyraǵynda otbasyn qurǵan. Qazir eki ul, bir qyz ósirip, nemere súiip otyrǵan aqsaqal sol jyldary sharýashylyqpen, mal baǵýmen ainalysqan. Qarapaiym tirshilik, adal eńbek – ómiriniń máni bolǵan.
Alaida 1996 jyly Mýsin aqsaqaldyń shańyraǵyna aýyr synaq tústi. Maldyaýyldaǵy úii órtenip, bar qujattarymen birge kúlge ainaldy. Sol sátten bastap ol qujat rásimdeý isin keiinge qaldyryp, kúnkóris qamymen ketedi.
«Nápaqa tabý kerek boldy, balalar kishkentai, úi de, jaǵdai da qiyn edi. Sol sebepti qujat izdeýge mursha bolmady», – deidi ol.
Jyldar óte berdi, ýaqyt syrǵyp, tirshiliktiń tolqyny talai synaqtan ótkizdi. Tek 2000-jyldardan beri qujat máselesin sheshýge talpynys jasai bastaǵanymen, ár mekemeden «anyqtama kerek», «jaýap kútemiz» degen jaýaptarmen is ilgerilemei kelgen.
Tek osydan úsh ai buryn Mýsin aqsaqal Moiynqum aýdandyq politsiia bóliminiń basshysy Almas Kópbaevtyń jeke qabyldaýynda bolyp, kómek suraidy. Sol sátten bastap is shyn máninde qozǵalady. Politsiia bólimi Qyrǵyzstan Respýblikasyna onyń derekterin rastaý jóninde suranys joldaǵanymen, mardymdy jaýap ala almaidy. Degenmen, bul joly másele aiaqsyz qalmaidy.
Jambyl oblysynyń kóshi-qon qyzmeti, aýdan ákimdigi jáne politsiia bóliminiń birlesken jumysynyń arqasynda Mýsin Malybaevtyń Qazaqstanda 40 jyldan astam ýaqyt turaqty turǵany kýágerlerdiń jaýabymen rastalyp, tiisti qujattar jinalady. Sonyń negizinde oǵan jeke kýálik rásimdelip, aqsaqal ysylǵan eńbeginiń, adal ómiriniń zańdy qujatyna qol jetkizdi.
«Qujatsyz árine qiyn, qaida barsań da qabyldamaidy. 1996 jyly úiim órtenip ketkende bári joǵaldy. Keiin amal qylyp kórdim, biraq nátije bolmady. Endi, mine, aýdan ákimi Ermek Karentaevqa, politsiia bóliminiń basshysy Almas Kópbaevqa, kóshi-qon qyzmetiniń aǵa inspektory Janserik Abikeevke, Birlik aýylynyń ákimi Qýanysh Ospanovqa jáne kórshilerime alǵys aitamyn. Qolyma jeke kýálik tidi. Endi buiyrsa, zeinetaqymdy rásimdep jatyrmyz. Osyndai halyqtyń muń-muqtajyn tyńdaityn, kómektesetin jandar kóp bolsyn. Alǵystan basqa aitarym joq», – deidi aqsaqal tolqyp.
Politsiia bóliminiń basshysy Almas Sadyqbaiuly Kópbaev bul istiń erekshe nazarda bolǵanyn aitady.
«Aǵamyz úsh ai buryn qabyldaýymda boldy. Birden oblystyq kóshi-qon basqarmasymen jáne aýdan ákimdigimen birlesip jumys bastadyq. Qiyndyqtar boldy, sebebi Qyrǵyzstan tarapynan qajetti derekter kelmei qaldy. Biraq toqtap qalmadyq, óz tarapymyzdan barlyq zańdy jolmen sheshtik. Endi aǵamyzdyń zeinetaqy alýyna qajetti qujattaryn rettep jatyrmyz. Buiyrsa qarasha aiynda alǵashqy zeinetaqysn alady. Sonymen qatar, alda qys maýsymy, sondyqtan aǵamyzdyń úiine kómir túsirip bersek degen nietimiz bar», – deidi Almas Kópbaev.
Osy igi iste bir jaǵadan bas, bir jeńnen qol shyǵarǵan aýdan ákimdigi men politsiia qyzmetkerleriniń qamqorlyǵy – shynaiy memlekettik qyzmettiń úlgisi. Qaǵazǵa bailanyp qalmai, adamnyń taǵdyryna úńile bilgen mundai jandardyń áreketi – qoǵamdaǵy senim men izgiliktiń kórinisi.
Mýsin aqsaqaldyń oqiǵasy – qujattyń jai qaǵaz emes, adamnyń ómir jolyn, taǵdyryn aiqyndaityn eń mańyzdy dúnie ekenin dáleldedi. Eń bastysy, bul jaǵdai bir adamnyń máselesin ǵana emes, el ishinde osyndai taǵdyrdy bastan keship júrgen azamattarǵa da úmit syilady.
Moiynqum jerinde memlekettik qyzmet pen adamdyq paryzdyń toǵysqan tusy dál osyndaida baiqalady. Bir adamnyń qýanyshy – bútin eldiń abyroiy. Al osyndai meiirim men jaýapkershilikke toly ister kóbeise, qoǵamnyń da júzi jyly, bolashaǵy nurly bolmaq.
