قۇجات – ادامنىڭ قوعام الدىنداعى ايناسى، مەملەكەت الدىنداعى مارتەبەسى. ول باردا ەسىك تە اشىق، مۇمكىندىك تە مول. ال ونسىز ءومىر ءسۇرۋ – ءوز ەلىڭدە ءوزىڭدى بوتەن سەزىنۋ سەكىلدى. وسىنداي تاعدىر تاۋقىمەتىن تارتىپ جۇرگەن مويىنقۇم اۋدانىنىڭ تۇرعىنى، 70 جاستان اسقان اقساقال مۋسين مالىبايەۆتىڭ حيكاياسى بۇگىندە ادام جانىن جىلىتاتىن، جۇرەككە جەتەتىن مىسالعا اينالدى، دەپ حابارلايدى Dalanews.kz
مالىبايەۆ مۋسين كاساتايەۆيچ – ءتۇبى قازاق، 1985 جىلى قىرعىزستاننان اتا قونىسىنا، تۋعان جەرى قازاقستانعا قونىس اۋدارعان. سول كەزدە ءومىر جاڭا ارناعا بۇرىلىپ، مويىنقۇم توپىراعىندا وتباسىن قۇرعان. ءقازىر ەكى ۇل، ءبىر قىز ءوسىرىپ، نەمەرە ءسۇيىپ وتىرعان اقساقال سول جىلدارى شارۋاشىلىقپەن، مال باعۋمەن اينالىسقان. قاراپايىم تىرشىلىك، ادال ەڭبەك – ءومىرىنىڭ ءمانى بولعان.
الايدا 1996 جىلى مۋسين اقساقالدىڭ شاڭىراعىنا اۋىر سىناق ءتۇستى. مالدىاۋىلداعى ءۇيى ورتەنىپ، بار قۇجاتتارىمەن بىرگە كۇلگە اينالدى. سول ساتتەن باستاپ ول قۇجات راسىمدەۋ ءىسىن كەيىنگە قالدىرىپ، كۇنكورىس قامىمەن كەتەدى.
«ءناپاقا تابۋ كەرەك بولدى، بالالار كىشكەنتاي، ءۇي دە، جاعداي دا قيىن ەدى. سول سەبەپتى قۇجات ىزدەۋگە مۇرشا بولمادى»، – دەيدى ول.
جىلدار وتە بەردى، ۋاقىت سىرعىپ، تىرشىلىكتىڭ تولقىنى تالاي سىناقتان وتكىزدى. تەك 2000-جىلداردان بەرى قۇجات ماسەلەسىن شەشۋگە تالپىنىس جاساي باستاعانىمەن، ءار مەكەمەدەن «انىقتاما كەرەك»، «جاۋاپ كۇتەمىز» دەگەن جاۋاپتارمەن ءىس ىلگەرىلەمەي كەلگەن.
تەك وسىدان ءۇش اي بۇرىن مۋسين اقساقال مويىنقۇم اۋداندىق پوليسيا ءبولىمىنىڭ باسشىسى الماس كوپبايەۆتىڭ جەكە قابىلداۋىندا بولىپ، كومەك سۇرايدى. سول ساتتەن باستاپ ءىس شىن مانىندە قوزعالادى. پوليسيا ءبولىمى قىرعىزستان رەسپۋبليكاسىنا ونىڭ دەرەكتەرىن راستاۋ جونىندە سۇرانىس جولداعانىمەن، ماردىمدى جاۋاپ الا المايدى. دەگەنمەن، بۇل جولى ماسەلە اياقسىز قالمايدى.
جامبىل وبلىسىنىڭ كوشى-قون قىزمەتى، اۋدان اكىمدىگى جانە پوليسيا ءبولىمىنىڭ بىرلەسكەن جۇمىسىنىڭ ارقاسىندا مۋسين مالىبايەۆتىڭ قازاقستاندا 40 جىلدان استام ۋاقىت تۇراقتى تۇرعانى كۋاگەرلەردىڭ جاۋابىمەن راستالىپ، ءتيىستى قۇجاتتار جينالادى. سونىڭ نەگىزىندە وعان جەكە كۋالىك راسىمدەلىپ، اقساقال ىسىلعان ەڭبەگىنىڭ، ادال ءومىرىنىڭ زاڭدى قۇجاتىنا قول جەتكىزدى.
«قۇجاتسىز ارينە قيىن، قايدا بارساڭ دا قابىلدامايدى. 1996 جىلى ءۇيىم ورتەنىپ كەتكەندە ءبارى جوعالدى. كەيىن امال قىلىپ كوردىم، ءبىراق ناتيجە بولمادى. ەندى، مىنە، اۋدان اكىمى ەرمەك كارەنتايەۆقا، پوليسيا ءبولىمىنىڭ باسشىسى الماس كوپبايەۆقا، كوشى-قون قىزمەتىنىڭ اعا ينسپەكتورى جانسەرىك ابيكەيەۆكە، بىرلىك اۋىلىنىڭ اكىمى قۋانىش وسپانوۆقا جانە كورشىلەرىمە العىس ايتامىن. قولىما جەكە كۋالىك ءتيدى. ەندى بۇيىرسا، زەينەتاقىمدى راسىمدەپ جاتىرمىز. وسىنداي حالىقتىڭ مۇڭ-مۇقتاجىن تىڭدايتىن، كومەكتەسەتىن جاندار كوپ بولسىن. العىستان باسقا ايتارىم جوق»، – دەيدى اقساقال تولقىپ.
پوليسيا ءبولىمىنىڭ باسشىسى الماس سادىقباي ۇلى كوپبايەۆ بۇل ءىستىڭ ەرەكشە نازاردا بولعانىن ايتادى.
«اعامىز ءۇش اي بۇرىن قابىلداۋىمدا بولدى. بىردەن وبلىستىق كوشى-قون باسقارماسىمەن جانە اۋدان اكىمدىگىمەن بىرلەسىپ جۇمىس باستادىق. قيىندىقتار بولدى، سەبەبى قىرعىزستان تاراپىنان قاجەتتى دەرەكتەر كەلمەي قالدى. ءبىراق توقتاپ قالمادىق، ءوز تاراپىمىزدان بارلىق زاڭدى جولمەن شەشتىك. ەندى اعامىزدىڭ زەينەتاقى الۋىنا قاجەتتى قۇجاتتارىن رەتتەپ جاتىرمىز. بۇيىرسا قاراشا ايىندا العاشقى زەينەتاقىسن الادى. سونىمەن قاتار، الدا قىس ماۋسىمى، سوندىقتان اعامىزدىڭ ۇيىنە كومىر ءتۇسىرىپ بەرسەك دەگەن نيەتىمىز بار»، – دەيدى الماس كوپبايەۆ.
وسى يگى ىستە ءبىر جاعادان باس، ءبىر جەڭنەن قول شىعارعان اۋدان اكىمدىگى مەن پوليسيا قىزمەتكەرلەرىنىڭ قامقورلىعى – شىنايى مەملەكەتتىك قىزمەتتىڭ ۇلگىسى. قاعازعا بايلانىپ قالماي، ادامنىڭ تاعدىرىنا ۇڭىلە بىلگەن مۇنداي جانداردىڭ ارەكەتى – قوعامداعى سەنىم مەن ىزگىلىكتىڭ كورىنىسى.
مۋسين اقساقالدىڭ وقيعاسى – قۇجاتتىڭ جاي قاعاز ەمەس، ادامنىڭ ءومىر جولىن، تاعدىرىن ايقىندايتىن ەڭ ماڭىزدى دۇنيە ەكەنىن دالەلدەدى. ەڭ باستىسى، بۇل جاعداي ءبىر ادامنىڭ ماسەلەسىن عانا ەمەس، ەل ىشىندە وسىنداي تاعدىردى باستان كەشىپ جۇرگەن ازاماتتارعا دا ءۇمىت سىيلادى.
مويىنقۇم جەرىندە مەملەكەتتىك قىزمەت پەن ادامدىق پارىزدىڭ توعىسقان تۇسى ءدال وسىندايدا بايقالادى. ءبىر ادامنىڭ قۋانىشى – ءبۇتىن ەلدىڭ ابىرويى. ال وسىنداي مەيىرىم مەن جاۋاپكەرشىلىككە تولى ىستەر كوبەيسە، قوعامنىڭ دا ءجۇزى جىلى، بولاشاعى نۇرلى بولماق.
