Kúni keshe Aýylsharýashylyǵy vitse-ministri Saparhan Omarov «halyqqa nandy bólshektep satý kerek» dedi. Bólshektep degenimizdiń ózi naqty balama emes, Omarov halyqqa nandy bir-birlep týrap, japyraqtap satý kerektigin aitty, is júzinde. Osy arqyly nannyń qadirine jetedi ekenbiz.
Bilik mundai saýatsyz ári soraqy málimdemelerdi birinshi ret jariialap otyrǵan joq. Biz búginge deiin joǵaryda aitylǵan – bir jaǵynan kúlkiń, bir jaǵynan jylaǵyń keletin birqatar mánsiz málimdemeler men orynsyz usynystardy jinaqtap berdik.
«ShETELDE JASTAR NESIEGE ÓMIR SÚREDI»
– Iá, bile bilseńizder, shetelde jastar osylai isteidi. Olar ózderiniń múmkindiginshe ómir súredi. Olar nesie alyp, ómir súredi. Kolledjde bilimdi de nesiemen alady. Sodan keiin qalai bolǵanda da jumys tabýǵa tyrysady. Olar stýdenttik jyldarynda sabaqqa deiin ne keiin daiashy nemese qyzmet kórsetýdiń basqa da salalarynda jumys isteidi. Osylaisha nesielerin aqyryndap óteidi. Al odan keiin baspana qajet bolǵanda jaldamaly úi alady.
Biz ne deimiz: Siz bir jyldary Jastar ministri bolǵanyńyz bar eken, Birǵanym Sariqyzy. Bizde nesiege ómir súrmek túgil, ailyqqa ómir súrýdiń ózi ońai emes, bilesiz be?
«NAN SYRADAN ARTYQ EMES»
– Shynymdy aitsam, nannyń qymbattaýynan eshqandai tragediia kórip turǵanym joq. Iá, jaǵdaiy tómen otbasylarǵa kómek kórsetilip, ótemaqy tólenýi tiis. Bar bolǵany osy. Al bizder men sizder nan baǵasynyń 35 nemese 55 teńgege qymbattaýyn baiqamai da qalamyz. 300-500 teńge degen ne? Ári ketse bir shisha syranyń baǵasy...
Biz ne deimiz: Dál osy málimdemesinen keiin Azimov ornynan ketti deidi. Ketetindei bar...
«YDYS JÝǴAN SÝMEN, EDEN JÝADY»
«Eger baǵany kótersek, sen sýdy únemdei bastaisyń, únemdegen bolsań bálkim az tóleýiń de múmkin. Biraq, biz qaitemiz. Sýdy tógip-shashamyz, jaryqty qosyp qoiamyz, qaǵazdy ketiremiz. Alaida bul bizdiń aǵashtar jáne bizdiń sýymyz. Búgin biz balalarymyzdyń, bolashaq urpaǵymyzdyń esebinen únemdemeimiz. Mine, bul dúnieni de bizge túsindirý kerek».
...
«Men Germaniiada oqyǵam. Ol jaqtaǵy jaǵdai mynadai – kommýnaldyq qyzmet mamandary bir úige keledi. Kelýi tegin emes, olar ol úide bireý ólip qalǵan ba dep oilaidy, sebebi, kommýnaldyq tóleminiń quny óte az. Al ol úide apa turady jáne barlyǵyn únemdeidi. Aldymen ydys-aiaq jýady, artynan sol sýmen eden jýady. Sýǵa túskende aldymen balalaryn jýyndyrady, artynan sol sýǵa ózderi túsedi. Mine, olar solai únemdeidi».
...
«Germaniiada túnde jylý batareiasyn óshirip, janyna sý qoiyp qoiady. Sý salqyndai bastaǵan ýaqytta qaitadan qosady. Úi ystyq kezde tańerteń sharshap turasyń. Al sýyq kezde adam jaqsy demalady, úi sýyq bolsa adam denesiniń temperatýrasy da tómendeidi. Temperatýra tómendese, tiisinshe denemiz demalady.
...
Biz ne deimiz: Baýyrjan Qydyrǵaliuly, sýdy qoldansaq, jaryq pen jylýdy qossaq, bolmasa ózińiz aitqandai, qaǵazdy ketirsek, bul – bizdiń ómir súrip jatqanymyzdyń belgisi. Másele, memleketi qandai bolsa, halqy da sondai. Úkimet únemdeýdi nege ózinen bastamaidy?
«ONYŃ NUR-SÁÝLESI BIZDIŃ JOLYMYZǴA JARYQ TÚSIREDI»
– Búgingi adamdar mynany aitady: bul adamnyń boiynda kún bar, onyń Nur-sáýlesi bizdiń jolymyzǵa jaryq túsirsin. Qurmetti «nurotandyq» partiialastarym jáne sezge jinalǵan qonaqtar! Bizdiń moinymyzǵa damyǵan Qazaqstannyń qabyrǵasyn qalaý mindeti júktelgen. Biz mádenietti, baqytty jáne qýanyshty adamdy býynyn ósirip shyǵamyz. Partiiamyzdy Kóshbasshysy júktegen baǵdarlamany oidaǵydai oryndaimyz. Al bizdiń Kóshbasshy – Nursultan Ábishuly, úlken daryn iesi.
Biz ne deimiz: Nehoroshevtiń Nazarbaevty Kúnge teńegen entýziazmyn eshkim túsingen joq, tipti prezident te...
«I DETEI ETIH – ÝRODOV POKAZAT, INVALIDOV, PÝST SMOTRIaT»
«Menińshe, jasynan erte jaýapsyz jynystyq qatynasqa túsýdiń qandai saldary bolatynyn kórsetý úshin balalardy ara-tura jetimder úiine, múgedek balalarǵa arnalǵan internattarǵa ekskýrsiiaǵa aparyp turý kerek. Olarǵa álgi usqynsyz balalardy, múgedekterdi kórsetý kerek, kórsin! (Orysshasy: «I detei etih – ýrodov pokazat, invalidov, pýst smotriat» – red.). Mundai ádis 10 saǵat lektsiia oqýdan da kúshti áser etedi».
Biz ne deimiz: Muny Dariǵa hanym parlament depýtaty bolǵan tusta aitqan. Biz ne deimiz? Biz emes, el aitsyn. Áleýmettik qoldanýshynyń biri sol kezdegi Dariǵanyń sózine bylai dep jaýap beripti: «Dariǵa, eger siz sondai «aqyldy ári sulý» bolsańyz, depýtattar men spikerlerińizdi qazaq dalasynyń beibit aspanynan geptil tógilip jatqan Baiqońyrǵa ekskýrsiiaǵa aparyńyz. Jazyqsyz balalardyń mýtatsiiaǵa ushyraý sebebin sol jaqtan izdeńiz. Joǵaryda otyryp alyp, poligon jabylsa da onyń irgesindegi aýdandarda synaq ótkizýge ruqsat bergen adam – kemtar. Álgi synaq poligondarynan túsken kapitaldyń igiligin kim kórip jatyr? Al beishara halyq bireýlerdiń kúnásinen zardap shegip otyr».
«...ÁLI PAIDA BOLMAǴAN MAMANDYQTARDY OQYTÝ QAJET»
Qazirgi tańda oqýshylardy, jastardy is júzinde joq (áli paida bolmaǵan) mamandyqtarǵa oqytý qajet. Sebebi, tehnologiialar ár bes jyl saiyn jańaryp turady. Sondyqtan da aldaǵy ýaqytta biz estimegen mamandyqtardyń paida bolatynyn eskerip, balalarymyzdy soǵan qarai beiimdeý kerek».
Biz ne deimiz: Bizdegi bar mamandyqtardyń ózine jumys tabý qiyn, Sárinjipov myrza. Aitpaqshy, «joq mamandyq», ol qandai mamandyqtar? Bizdi qoiyp, sony ózińiz bilesiz be?
«BENZIN BAǴASY EKI ESE ARZANDADY»
«Únemdeý kerek, búkil álem únemdeidi. Álemnen úlgi alý kerek. Men de osyǵan úndeimin. Eger múmkindik bolsa, jumysqa dáý djippen barǵansha (?), ózińizben bir podezde otyratyn, turatyn adamdardyń kóligine otyryp birge jetýge bolady».
...
«Qazaqstanda benzinniń quny eki esege arzandady. Eseptep, bólip kórińiz: ótken jylda baǵa 128 jáne baǵam 150 boldy. 128 teńgege 150, eger dollarmen eseptesek, benzin litrine 80 tsent turǵan. Búgin baǵa – 125, ony 270-ke bólsek, litrine 40 tsent bolyp shyǵady. Dollarmen bul áldeqaida tómen. Alaida biz teńgemen esepteimiz. Sondyqtan bul Reseide eki-úsh aida rýbl baǵamy qansha bolatynyna jáne teńgeniń aldaǵy baǵamyna bailanysty bolyp otyr. Maǵan osyǵan qatysty boljam jasap berseńder, men de benzinmen ne bolaryn boljap beremin. Dollarmen sanaǵandaǵy benzin quny kórshilerimizben salystyrǵanda bizde eń arzan bolyp otyr. Qyrǵyzstan, Belarýs jáne Reseimen salystyrsaq, bizde arzanyraq»
Biz ne deimiz: Kúle de, jylai da almaisyń mundai jaǵdaida. Ol – aqyldy, biz – aqymaqpyz. Shkolnik solai oilaityn siiaqty.
«BIZDE NAN ARZAN»
«Menińshe, Qazaqstanda áleýmettik jaǵdaiy syn kótermeitin turǵyndarǵa ǵana nan arzan satylýy tiis. Qalǵan azamattar bul ónimdi 300 teńgeden satyp alýy tiis. Sebebi, nan arzan satylsa, halyq bul ónimge atústi qarap, nan qaldyǵyn qoqysqa tastaýdy doǵarmaidy. Biz tek osylaisha nannyń qadirin arttyra alamyz».
Biz ne deimiz: Byltyr «meniń sózimdi burmalap jiberdi» degen Aiqyn Qońyrov biyl taǵy da «nan baǵasy burynǵysha qalmaýy tiis» dep jazypty. Qyzyq, halyq qalaýlysy retinde muny halyqtyń pikirimen sanasyp aityp otyr ma, álde...
TAQYRYPTAN TYS
OLAR ÓZGE ÁLEMDE ÓMIR SÚREDI
«Almatylyqtardyń sportqa jany qumar. Olar ár senbi saiyn tikushaqpen taýǵa ushyp baryp, qaitarynda shańǵymen syrǵanaidy. Sosyn golf oinaýǵa barady!»
Qazirgi kúni Qazaqstan Orta Aziianyń Singapýry sanalatyn memleket. Bir kezgi keńestik respýblikalardyń arasyndaǵy eń ozyǵy bizdiń el.
Daiyndaǵan, Dýman BYQAI
