Aýǵanstannan tarihi Otanyna oralǵan bir top etnikalyq qazaq Qazaqstan azamattyǵynan aiyryldy. Sot sheshimimen “qazaq emes” dep tanylǵan 250 adamnyń qatarynda balalar da bar. Bul týraly “El amanat” qorynyń jetekshisi, quqyq qorǵaýshy Baqyt Sarai Azattyq radiosyna málimdedi. Qazir olardyń isi sotta qaralyp jatyr, dep habarlaidy Dalanews.kz.
Azattyq radiosynyń málimetinshe, azamattyǵynan aiyrylǵandardyń biri - 27 jastaǵy Mýradi Ainýddin. Ol Aýǵanstannyń Qundyz qalasynda týǵan, 2016 jyly Qazaqstanǵa oqýǵa kelip, 2019 jyly azamattyq alǵan. Aitýynsha, tiisti organdarǵa qazaq ekenin dáleldeitin barlyq qujatty kórsetken.
Alaida 2022 jyly Aýǵanstandaǵy Qazaqstan elshiligi onyń “qazaq emes” ekeni týraly nota jibergen. Osydan keiin Ainýddinniń qujattary qaita tekserile bastaǵan.
"Ondai bolady dep oilaǵan joqpyn. Elimnen ketpeimin, Otanym úshin sońyna deiin kúresemin. Qazaqstanǵa alǵash kelgen sátimde óz elime jettim be dep kózime jas alǵanmyn. Azamattyq alǵanymda qatty qýandym, eki inimdi de oqýǵa alyp keldim. Olar da azamattyq aldy. Biraq 2024 jyldyń maýsym aiynda zeinetaqy qoryndaǵy aqsham túspei qalǵan kezde azamattyǵym joiylǵanyn bildim", - deidi Mýradi Ainýddin.
Onyń sózinshe, kóshi-qon qyzmeti “Aýǵanstandaǵy elshilikten kelgen notaǵa” súienip, azamattyǵyn joiǵan. Ainýddin bul sheshimmen kelispeitinin aityp, sotqa júgingen.
"Qytaidan, Mońǵoliiadan, Aýǵanstannan kelgen qandastardyń báriniń armany - óz eline eńbek etý. Biz Qazaqstanǵa qyzmet etkimiz keledi. Biraq osyndai jaǵdailar bolashaqta oralmandarǵa kedergi bolýy múmkin. Bul - óte uiat jaǵdai. Sońyna deiin kúresemin", - deidi ol.
