اۋعانستاننان تاريحي وتانىنا ورالعان بٸر توپ ەتنيكالىق قازاق قازاقستان ازاماتتىعىنان ايىرىلدى. سوت شەشٸمٸمەن “قازاق ەمەس” دەپ تانىلعان 250 ادامنىڭ قاتارىندا بالالار دا بار. بۇل تۋرالى “ەل امانات” قورىنىڭ جەتەكشٸسٸ, قۇقىق قورعاۋشى باقىت ساراي ازاتتىق راديوسىنا مەلٸمدەدٸ. قازٸر ولاردىڭ ٸسٸ سوتتا قارالىپ جاتىر, دەپ حابارلايدى Dalanews.kz.
ازاتتىق راديوسىنىڭ مەلٸمەتٸنشە, ازاماتتىعىنان ايىرىلعانداردىڭ بٸرٸ - 27 جاستاعى مۋرادي اينۋددين. ول اۋعانستاننىڭ قۇندىز قالاسىندا تۋعان, 2016 جىلى قازاقستانعا وقۋعا كەلٸپ, 2019 جىلى ازاماتتىق العان. ايتۋىنشا, تيٸستٸ ورگاندارعا قازاق ەكەنٸن دەلەلدەيتٸن بارلىق قۇجاتتى كٶرسەتكەن.
الايدا 2022 جىلى اۋعانستانداعى قازاقستان ەلشٸلٸگٸ ونىڭ “قازاق ەمەس” ەكەنٸ تۋرالى نوتا جٸبەرگەن. وسىدان كەيٸن اينۋدديننٸڭ قۇجاتتارى قايتا تەكسەرٸلە باستاعان.
"ونداي بولادى دەپ ويلاعان جوقپىن. ەلٸمنەن كەتپەيمٸن, وتانىم ٷشٸن سوڭىنا دەيٸن كٷرەسەمٸن. قازاقستانعا العاش كەلگەن سەتٸمدە ٶز ەلٸمە جەتتٸم بە دەپ كٶزٸمە جاس العانمىن. ازاماتتىق العانىمدا قاتتى قۋاندىم, ەكٸ ٸنٸمدٸ دە وقۋعا الىپ كەلدٸم. ولار دا ازاماتتىق الدى. بٸراق 2024 جىلدىڭ ماۋسىم ايىندا زەينەتاقى قورىنداعى اقشام تٷسپەي قالعان كەزدە ازاماتتىعىم جويىلعانىن بٸلدٸم", - دەيدٸ مۋرادي اينۋددين.
ونىڭ سٶزٸنشە, كٶشٸ-قون قىزمەتٸ “اۋعانستانداعى ەلشٸلٸكتەن كەلگەن نوتاعا” سٷيەنٸپ, ازاماتتىعىن جويعان. اينۋددين بۇل شەشٸممەن كەلٸسپەيتٸنٸن ايتىپ, سوتقا جٷگٸنگەن.
"قىتايدان, موڭعولييادان, اۋعانستاننان كەلگەن قانداستاردىڭ بەرٸنٸڭ ارمانى - ٶز ەلٸنە ەڭبەك ەتۋ. بٸز قازاقستانعا قىزمەت ەتكٸمٸز كەلەدٸ. بٸراق وسىنداي جاعدايلار بولاشاقتا ورالماندارعا كەدەرگٸ بولۋى مٷمكٸن. بۇل - ٶتە ۇيات جاعداي. سوڭىنا دەيٸن كٷرەسەمٸن", - دەيدٸ ول.
