Májilis depýtaty Murat Ábenov Qazaqstan azamattary bankke óz aiaǵymen baryp, ózi kelisimshartqa qol qoimasa, nesie alaiaqtyq dep sanalyp, ony bank ózi tóleitinin málimdedi. Depýtat áleýmettik jelide usynystary qabyldanǵanyn jetkizdi.
Dalanews.kz ekonomist Baýyrjan Ysqaqovpen osy týrasynda suhbattasty.
Endi qarapaiym adamdardyń kredit alýy qiyndap ketpei me? Bul saýalǵa sarapshy bylai dep jaýap qatty:
"Kredit alý tártibi qatańdaityny anyq. Bankter men mikroqarjyuiymdary klientterdiń jeke basyn, olardyń tabysyn, tranzaktsiia tarihyn tereńirek teksere bastaidy. Onlain ótinishterde biometriia, Egov arqyly rastaýlar, elektron qoltańba jii talap etilýi múmkin. Sondai-aq, ishki qaýipsizdik júieleri de kúsheitiledi. Osynyń bári kredit rásimdeý ýaqytyn uzartyp, ekspress nesieler azaiýyna múmkindik beredi. Degenmen resmi tabysy, turaqty jumysy, talap etilgen qujattary bar adamdar úshin nesie alý múmkindigi saqtalady. Qarapaiym tutynýshylarǵa tekserister men talaptardyń kóbeiýi ǵana áser etýi múmkin".
Sonymen qatar, sarapshy nesie alaiaqtyq jolmen alynǵany qalai tekseriletinin túsindirdi.
"Atyńyzǵa nesie alaiaqtyq jolmen rásimdelgen bolsa, aldymen bankke resmi aryz jazyp, politsiiaǵa shaǵym berýińiz kerek. Iaǵni politsiia tekserý-tergeý aktisin berýi kerek. Tekserý kezinde bank pen quqyq qorǵaý organdary biometriia, elektron tsifrlyq qoltańbanyń sáikestigin, ótinishi berilgen ártúrli derek, kamera jazbalaryn, tranzaktsiia jýrnaldaryn, qyzmetkerlerdiń áreketterin tekseredi. Alaiaqtyq rastalsa, bank qaryzdy óndirip alýdy toqtatady nemese qaryzdy óz moinyna alyp, esepten shyǵarady. Klienttiń kredittik tarihyn túzetedi", - dep túiindedi Baýyrjan Ysqaqov.
Eske salaiyq, buǵan deiin qazaqstandyqtardyń atynan zańsyz rásimdelgen nesieler sotsyz keshiriletini habarlandy.
Keiingi eki jylda bankter 1,4 myń adamnyń 1,9 milliard teńge kólemindegi nesiesin sotsyz joiǵan.
