Almatyda hostelde 13 adamnyń ómirin jalmaǵan órt isi boiynsha sot úkimi ózgerissiz qaldy. Apelliatsiialyq instantsiia soty aiyptalýshylarǵa taǵaiyndalǵan jaza merzimin sol kúii qaldyrý týraly sheshim shyǵardy, dep habarlaidy Dalanews.kz.
KazTag agenttiginiń málimetinshe, sot alqasynyń sheshimimen hostel direktory Ádilbek Muhamediiarov 5 jylǵa bas bostandyǵynan aiyrylyp, órt qaýipsizdigi júiesin ornatqan kompaniia jetekshisi Aleksandr Pekelnik 4 jylǵa sottaldy.
Degenmen sot Pekelnikke qatysty keibir sheshimderdi ózgertti. Atap aitqanda, eki jábirlenýshige moraldyq ótemaqy retinde tóleýge mindettelgen 7 million teńge mólsherindegi somany joiyp, azamattyq talaptardy qaraýsyz qaldyrdy. Qalǵan bóligi boiynsha úkim ózgerissiz qaldyryldy.
Apelliatsiialyq shaǵymdar jábirlenýshiler tarapynan da, sottalýshylar men olardyń qorǵaýshylarynan da túsken. Biraq sot olardyń basym bóligin qanaǵattandyrmady.
Aleksandr Pekelniktiń qorǵaýshylary ony tolyq aqtaýdy suraǵan bolatyn. Olardyń aitýynsha, aiyptalýshy hostel ashylǵanǵa deiin, ǵimarat áli bos turǵan kezde ǵana órt dabyly júiesin ornatqan. Sondyqtan ol qaýipsizdik erejelerin buzý men adamdardyń qazasyna qatysy joq dep esepteidi.
Óz kezeginde Pekelnik te sotta óz kinásin moiyndamaǵan.
"Men ǵimaratta hostel ashylǵanyn tek órtten keiin bildim", - degen ol.
Ekinshi sottalýshy Ádilbek Muhamediiarovtyń qorǵaýshylary aiyptaýdy jeńildetip, keltirilgen zalaldy azaitýdy suraǵan. Al keibir jábirlenýshiler, kerisinshe, sot zalynda direktordyń jazasyn qatańdatýdy jáne moraldyq ótemaqyny kóbeitýdi talap etti.
Birqatar jábirlenýshi Pekelnikke shaǵymy joq ekenin málimdedi.
Eske sala ketsek, alapat órt 2023 jyldyń 30 qarashasynda Almatydaǵy Almaty Hostel jataqhanasynda bolǵan. Tilsiz jaý saldarynan 13 adam, onyń ishinde bir jasóspirim kóz jumdy. Qaza tapqandardyń arasynda Qazaqstan, Resei jáne Ózbekstan azamattary bar. Taǵy 67 turǵyn der kezinde evakýatsiialanyp úlgergen.
