Aqtóbe oblysy politsiia departamentiniń kiberqylmysqa qarsy is-qimyl basqarmasy júrgizgen jedel-izdestirý is-sharalarynyń nátijesinde internet arqyly alaiaqtyq jasady degen kúdikpen Aqtaý qalasynyń turǵyny ustaldy, — dep habarlaidy Dalanews.kz Polisia.kz. saityna silteme jasap.
Jedel tergeý barysynda 30 jastaǵy er adamnyń internet platformasy arqyly jalǵan habarlandyrýlar ornalastyrý jolymen azamattardy aldaǵany anyqtaldy. Qazirgi tańda onyń alaiaqtyq áreketterinen zardap shekken alty adam anyqtaldy: úsheýi Aqtóbeden bolsa, qalǵandary Almaty, Túrkistan oblystarynan. Jábirlenýshilerdiń barlyǵy Almaty qalasynan birneshe táýlikke páterdi jalǵa almaq bolǵan. Kúdikti olardan 20 myńnan bastap 130 myń teńgege deiin aldyn ala tólem suraǵan. Aqsha aýdarymyn alǵannan keiin bailanysty toqtatqan. Osyndai jolmen ol azamattardan 300 myń teńgege jýyq aqsha ielengen. Bul qarajatty ol qumar oiyndarǵa jumsaǵan.
Polisia.kz málimeti boiynsha,tergep-tekserý barysynda ustalǵan er adamnyń Almaty qalasynan páterlerdi jalǵa berý týraly habarlamalardy internet-platformasynan taýyp, ózi jalǵa alýshy keipinde páter ielerine habarlasqany anyqtaldy. Ol páter ielerinen úidiń qosymsha fotolary men beinesholýlaryn da alǵan. Keiin ony jalǵa berý týraly óz atynan tartymdy baǵamen habarlama ornalastyrǵan. Barlyq jaǵdaida kúdikti jábirlenýshilermen internet pen messendjerler arqyly bailanys ornatqan. Qazirgi tańda birneshe adamǵa qatysty alaiaqtyq jasaý deregi boiynsha qylmystyq is qozǵalyp, sotqa deiingi tergep-tekserý júrgizilýde. Kúdikti ýaqytsha ustaý izoliatoryna qamaldy.
