اقتوبە وبلىسى پوليسيا دەپارتامەنتىنىڭ كيبەرقىلمىسقا قارسى ءىس-قيمىل باسقارماسى جۇرگىزگەن جەدەل-ىزدەستىرۋ ءىس-شارالارىنىڭ ناتيجەسىندە ينتەرنەت ارقىلى الاياقتىق جاسادى دەگەن كۇدىكپەن اقتاۋ قالاسىنىڭ تۇرعىنى ۇستالدى، — دەپ حابارلايدى Dalanews.kz Polisia.kz. سايتىنا سىلتەمە جاساپ.
جەدەل تەرگەۋ بارىسىندا 30 جاستاعى ەر ادامنىڭ ينتەرنەت پلاتفورماسى ارقىلى جالعان حابارلاندىرۋلار ورنالاستىرۋ جولىمەن ازاماتتاردى الداعانى انىقتالدى. قازىرگى تاڭدا ونىڭ الاياقتىق ارەكەتتەرىنەن زارداپ شەككەن التى ادام انىقتالدى: ۇشەۋى اقتوبەدەن بولسا، قالعاندارى الماتى، تۇركىستان وبلىستارىنان. جابىرلەنۋشىلەردىڭ بارلىعى الماتى قالاسىنان بىرنەشە تاۋلىككە پاتەردى جالعا الماق بولعان. كۇدىكتى ولاردان 20 مىڭنان باستاپ 130 مىڭ تەڭگەگە دەيىن الدىن الا تولەم سۇراعان. اقشا اۋدارىمىن العاننان كەيىن بايلانىستى توقتاتقان. وسىنداي جولمەن ول ازاماتتاردان 300 مىڭ تەڭگەگە جۋىق اقشا يەلەنگەن. بۇل قاراجاتتى ول قۇمار ويىندارعا جۇمساعان.
Polisia.kz مالىمەتى بويىنشا،تەرگەپ-تەكسەرۋ بارىسىندا ۇستالعان ەر ادامنىڭ الماتى قالاسىنان پاتەرلەردى جالعا بەرۋ تۋرالى حابارلامالاردى ينتەرنەت-پلاتفورماسىنان تاۋىپ، ءوزى جالعا الۋشى كەيپىندە پاتەر يەلەرىنە حابارلاسقانى انىقتالدى. ول پاتەر يەلەرىنەن ءۇيدىڭ قوسىمشا فوتولارى مەن بەينەشولۋلارىن دا العان. كەيىن ونى جالعا بەرۋ تۋرالى ءوز اتىنان تارتىمدى باعامەن حابارلاما ورنالاستىرعان. بارلىق جاعدايدا كۇدىكتى جابىرلەنۋشىلەرمەن ينتەرنەت پەن مەسسەندجەرلەر ارقىلى بايلانىس ورناتقان. قازىرگى تاڭدا بىرنەشە ادامعا قاتىستى الاياقتىق جاساۋ دەرەگى بويىنشا قىلمىستىق ءىس قوزعالىپ، سوتقا دەيىنگى تەرگەپ-تەكسەرۋ جۇرگىزىلۋدە. كۇدىكتى ۋاقىتشا ۇستاۋ يزولياتورىنا قامالدى.
