Omar Jáleldiń burynǵy áieli Liazat Myrzash kúieýin sotqa beretinin málimdedi, dep habarlaidy Dalanews.kz.
Liazat Myrzashtyń sózinshe, Omar Jáleldi sotqa berýine onyń jazbasy sebep bolǵan.
"Bárińiz jarysa tań azanmen joldaǵan Omardyń postyn oqydym jáne óz sózine ózi jaýap bere almaǵandyǵy úshin balalary úshin jaýapkershilikten bas tartyp otyrǵany úshin sotqa beremin dep sheshtim. Óz balalaryn, meniń 9 ai kóterip, tolǵatyp týǵan urpaqty qunsyzdandyrǵany úshin sotqa beremin-dep sheshtim. Biyl maskalar sheshiletin jyl! Maǵan járdem bere alatyn advokattar bolsa jekege shyǵyńyz, nemese osynda belgileńizdershi", - deidi Myrzash.
Kúni keshe Omar Jálel toqal alýǵa qatysty jazba jariialaǵan bolatyn.
"Meniń ainalamda toqal alyp ońǵan adamdy kórgenim joq. Sonyń biri - menmin. Biz ádette nápsiniń qalaýyn urpaq, otan, t.b. biik uǵymdarmen kólegeileimiz. Urpaq kerek bolsa, - bir áielden de órbitýge bolady. Nápsińe ie bolsań, energiiańdy syrtqa shashpasań - urpaǵyń kóp bolady.
Buryn toqal alý - qajettilik bolǵan, qazir - nápsiniń qalaýy, qumarlyq, qala berdi - maqtan. Buryn men osy máseleni kóp kóterdim. Aittym. Aitqan nárse mindetti túrde júzege asady eken.Urpaq dedik. Negizgi uranymyz osy boldy. Biraq berekeni oilamadyq. Oilaýǵa shamamyz da bolmady. Basy qatty nápsimizdi toqtata almadyq. Qairatymyz jetpedi", - deidi Omar Jálel.
Jálel basynan ótken oqiǵa - "ashy tájiribe bolǵanyn" aitady.
"Biraz adamdarǵa jel berdim. Áli kúnge deiin biraz jigitter "Sizdiń osy áńgimeńiz unaidy" deidi. Nápsilerine unap turǵanymen sharýasy joq. Qyzba bastar kórgisi keledi. Artyn oilap jatqan eshkim joq. Olarǵa bul - qyzyq. Shyjyǵyn eshkim oilap jatqan joq. Al men, "toqal almańdar" deimin. Óz ashy tájiribemnen aityp otyrmyn. Otbasynyń shyrqyn buzbańdar. Alǵan jarlaryńdy qadirleńder. Urpaq kerek bolsa, solar- aq týyp beredi. Bul sózdi men aitýǵa tiispin. Úitkeni kóp jigitter meniń sózime erdi. Meniń sózim olarǵa demeý boldy. Eldiń aldynda júrgen soń ár sózińe jaýap berýiń kerek. Men osylai ózimniń qate aitqan sózime jaýap berip otyrmyn", - deidi ol.
Omar Jáleldiń sózinshe, ol "óz ideiasynyń qurbany".
"Eger meniń áserimnen otbasy buzylsa, iilip turyp keshirim suraimyn. Men - óz ideiamnyń qurbanymyn. Bul ideia is júzinde óziniń durys emestigin kórsetti. Buryn toqaldy báibisheler ózderi alyp beretin. Bul másele ómirlik qajettiligi bolǵandyqtan ǵana danalyqpen sheshiletin. Ol zaman endi kelmeske ketti. Zaman ózgerip ketti. On toǵyzynshy ǵasyrdyń ideiasy qazir ótpeidi. Men osyny aitaiyn dep edim. Men osyny aitýǵa tiis edim. Buny meniń aitýǵa haqym bar. Óitkeni bul "qyzyqty" molynan basymnan ótkerdim. Shákárimshe aitsaq, apanǵa qulap ketip, "apanǵa túspeńder!" dep aiqalasam, meniń ne kinám bar?!", - deidi Omar Jálel.
