Ár jyldary ata-analar arasynda qyzý talqyǵa túsip júrgen 3-synypqa arnalǵan “Ádebiettik oqý” oqýlyǵyndaǵy Ertai Ashyqbaevtyń “Ǵalamtor týraly” óleńi biyl da nazardan tys qalǵan joq. Keibir ata-analar óleń mazmunyn balalarǵa teris áser etýi múmkin dep synasa, balalar ádebietiniń ókili, aqyn Serikbol Hasan mundai pikirmen kelispeidi. Onyń aitýynsha, atalǵan óleń balalar ádebietinde burynnan bar mazaqtama janrynyń bir úlgisi jáne tárbielik máni zor týyndy. Bul týraly ol Dalanews.kz agenttigine bergen suhbatynda málimdedi.
Óleń ne týraly?
Ashyqbaevtyń “Ǵalamtor týraly” óleńi ǵalamtorǵa táýeldi balanyń atynan baiandalady. Onda keiipker sabaq pen kitap oqýdan bas tartyp, ýaqytynyń bárin telefon men internetke jumsaitynyn aitady.
Bul kitapty alǵash bolyp Dinara Dármen esimdi jeli qoldanýshysy óz paraqshasynda jariialaǵan.
Onda ata-analar “Masqara, qyzym 3 synyp oqidy. Alaida kitapty qaramappyn”, “Qazirden osyndai óleń jattasa, erteń óskende ne isteimiz?” dep túrli pikir qaldyrǵan.
Balalar aqyny óleńge taldaý jasady
Belgili balalar aqyny Serikbol Hasan atalǵan óleńge qatysty óz oiyn bildirdi.
“Ertai Ashyqbaev - balalar ádebietiniń iri ókili, qazirgi tańda balalarǵa arnalǵan mazmundy ári túsinikti shyǵarmalardy turaqty túrde jazyp júrgen qalamger.Bul óleńge qarap Ertai aǵamyzdyń shyǵarmashylyǵyna baǵa berýge bolmaidy. Óleń óte jaqsy, taǵylymdy týyndy. Balalar ádebietin tereń túsinetin adam bul óleńniń mánin uǵa alady. Óitkeni munda ironiia men satira bar. Bul – mazaqtama janryna jatatyn óleń”, – dedi Serikbol Hasan.
Aqynnyń aitýynsha, “mazaqtama” janry qazaq balalar ádebietinde burynnan bar. Mysaly, “Jalqaýdyń armany” siiaqty óleńder arqyly avtorlar jalqaýlyq, buzaqylyq syndy minez-qulyqty synap, balalardy tárbieleýdi kózdegen.
“Bul óleń de sol dástúrmen jazylǵan. Birinshi jaqtan aitylǵandyqtan, ǵalamtorǵa táýeldi balanyń sózi siiaqty áser qaldyrady. Biraq túpki maǵynasy “sondai bolma, ǵalamtorǵa bailanyp qalma” degen oi. Demek, bul óleńde tárbielik mán bar”, – deidi aqyn.
Serikbol Hasan qazirgi ýaqytta keibir adamdardyń ádebi janrlardy ajyrata almaitynyn, sonyń saldarynan óleń maǵynasyn durys túsinbeý baiqalatynyn aitty.
“Biz ádebiet oqymaimyz. Sondyqtan kei janrlardy túsinbei, durys baǵalamai jatamyz. Qazir álem ádebietinde de, bizdiń qoǵamda da qundylyqtardyń orny aýysyp jatyr. Keibir uǵymdar joiylyp, jańa kózqarastar qalyptasyp jatyr. Sol sebepti mazaqtama siiaqty janrlardy kei adamdar balalardy kemsitý dep qabyldaidy. Biraq bul qate pikir. Bul janrdyń tárbielik máni joǵary, óleń balalarǵa arnalǵan satiralyq baǵyttaǵy shyǵarmalardyń biri”, – dedi ol.
Sondai-aq aqyn atalǵan óleńniń túpnusqasy men oqýlyqtaǵy nusqasy arasynda aiyrmashylyq bar ekenin atap ótti.
“Internetten qarasam, Ertai aǵanyń túpnusqasynda óleńniń taqyryby “Meniń synyptasymnyń ǵalamtorǵa táýeldiligi” dep atalǵan eken. Al oqýlyqta qysqartylyp, taqyryby ózgergen. Sonyń saldarynan maǵynasy da sál burmalanǵan. Oqýlyq avtorlary shyǵarmalardy engizer aldynda mindetti túrde avtordyń ózimen aqyldasyp, kelisýi kerek. Óitkeni shyǵarmany qysqartý nemese ataýyn ózgertý túpki maǵynany buzyp jiberedi. Bul - oqýlyq qurastyrýshylardyń qateligi”, – dedi ol.
Sondai-aq Serikbol Hasan qazirgi qoǵamdaǵy qundylyqtar ózgerip, keibir adamdar burynnan bar ádebi tásilderdi “diskriminatsiia” dep qabyldai bastaǵanyn aitty.
“Qazir meniń ózimniń de keibir óleńderim osyndai synǵa ushyrap jatady. Mysaly, “Meniń baǵam” degen óleńim bar. Onda “úsh alǵan bala – osyndai, tórt alǵan jaqsy, bes alǵan óte jaqsy” degen siiaqty joldar jazylǵan. Buryn bul qalypty edi, al qazir muny diskriminatsiia dep qabyldaidy. Iaǵni “úsh alǵan bala da myqty bolýy múmkin” degen jańa kózqaras paida boldy. Bul qoǵamdaǵy ózgeristerdiń kórinisi. Biraq osyndai uǵymdar ádebiettegi dástúrli janrlardyń joiylyp ketýine ákelip jatyr”, – deidi aqyn.
