Onyń pikirinshe osydan tórt jyl buryn bilikke Shavkat Mirziiaev kelgen tusta odaqqa qosylý týraly talqylaýlar qaita qyzǵan.
Biliktegi jabyq otyrystarda odaqtyń artyq-kem tusy tarazyǵa tartylyp, osynaý uiymnyń Ózbekstannyń saiasi júiesine qanshalyqty áser eteri elekten ótken.
"Diskýssiianyń derligi joǵaryda júrdi. Halyq bul talqylaýdan tysqary qalǵan edi. Tek 2019 jyly pikirtalas qoǵamdyq deńgeige kóterilip, belsendiler osy odaqqa qatysty oiyn ortaǵa salýǵa múmkindik aldy.
Byltyr Ózbekstanda parlament sailaýy ótti. Sailaýdan soń Mirziiaevtyń ainalasy bilikti birjolata qolyna aldy. Óz-ózine degen senimi kúsheidi. Táýelsiz, derbes sheshim qabyldai alaryna kózi jetti ári strategiialyq mańyzy bar máselege kelgende qoǵamdyq pikirge qulaq asý kerektigin túsindi", – deidi ol.
Bilik odaq týraly halyqtan surady
Eýraziialyq odaqqa kirý-kirmeý týraly pikirtalas byltyrǵy jyldyń ekinshi jartysynda sharyqtaý shegine shyǵypty. Osynaý uiymnyń olqylyqtary ashyq aityla bastaǵan. Basym tustary da tys qalmaǵan.
Ergashevtiń aitýynsha merzimdi basylymdarda, telearnalarda, internet-keńistikte odaq týraly pikir bildirýge keńshilik jasalyp, bul eldegi osy kúnge deiin buǵaýda jatqan qoǵamdyq sanany oiatqan.
"Bilik eshkimniń aýzyn býǵan joq. Aqyr aiaǵy bul bastama nátijesin berdi.
Osyǵan deiin úkimettik deńgeide ótip kelgen talqylaýda "Ózbekstan tezdetip Eýraziialyq odaqqa qosylady" degen pikir jii aitylatyn. Tipti keibir sheneýnikter: "Ózbekstan 2020-2021 jylǵa deiin osy odaqqa ótedi" dep senimdi sóilep júrdi.
Alaida bul másele qoǵam talqysyna túskennen álgindei áńgime sap tiyldy.
Mirziiaev el ishinde Ózbekstannyń osy odaqqa qosylǵanyn quptamaityn, salmaqty, sanasýǵa turarlyq qoǵamdyq kúshtiń bar ekenin kórdi. Olar joǵaryǵa damýdyń ózge jolyn usyndy. Mirziiaev olardyń ýájin tyńdady jáne qabyl aldy.
Biylǵy jyldyń basynda Ózbekstan prezidenti Eýraziiadyq odaqqa qosylýdy keiinge qaldyratynyn, buǵan baiyppen, asyqpai-aptyqpai kelý kerektigin aitty.
Strategiialyq máni bar sheshimge kelgende ózbek biligi óz degeninde turdy", – deidi saiasattanýshy.
Eýraziialyq odaq ózbektiń avtólik óndirisin kúlge kómedi
Onyń atap ótkenindei parlamenttiń qos palatasy da Ózbekstannyń Eýraziialyq odaqta baqylaýshy statýsymen shektelýin quptaǵan. Sarapshynyń paiymdaýynsha baqylaýshy pozitsiiasynda Ózbekstannyń utar tusy kóp. Osy odaqtyń olqylyqtaryn, basymdyqtaryn baǵamdap, odaqqa qosylǵan elderdiń qateliginen sabaq alatyn múmkindigi bar.
"Baqylaýshy statýsy bizdiń elge tiimdi. Óz basym bolashaqta Ózbekstannyń osy odaqqa birjolata ótip ketpei, erkin saýda aimaǵymen ǵana shektelýin qoldaimyn. Osynyń ózi jetkilikti.
Álbette ózbekterdiń óz arasynda osy odaqqa qosylýdy quptaityndar kóp. Olardyń ýáji: "ázir Reseide jan baǵyp júrgen 2,5 mln-ǵa tarta ózbek migranty (buǵan Qazaqstandaǵy ózbektiń 500 myńǵa jýyq jumys kúshin qosyńyz) jarytyp jalaqy alyp, jumys jaǵdaiyn jaqsartýǵa múmkindik alady".
Ózbekstannyń toqyma-tigin óndirisi, bylǵary daiyndaityn, aiaq kiim tigetin óndirýshiler taýaryn odaq naryǵyna shyǵarýǵa qulshynyp otyr. Biraq taiaqtyń eki ushy bar emes pe?
Eýraziialyq odaqqa óter bolsa, ózbektiń avtokólik óndiris japa shegedi.
Jylyna 200 myń kólik qurastyratyn Ózbekstannyń áleýetin dál osy aralyqta 2 mln kólikti saýdaǵa shyǵaratyn Reseimen salystyrýǵa bolmaidy. Mundaida ádil báseke týraly aitýdyń ózi orynsyz.
Ózbekstan osy odaqqa ótse, kúlli ekonomikanyń kúretamyry sanalatyn kólik óndirisin kúlge kómedi", – deidi saiasattanýshy.
Ózbekstan odaqqa ótse júz myńdaǵan adam jumyssyz qalady
Onyń pikirinshe Ózbekstannyń kólik tasymaly da Reseimen teń emes. Ózbek kásipkerlerine tiesili júk kólikteriniń sany sanaýly ǵana. Reseidegi dál osyndai kompaniiada eki myńǵa tarta júk tasymaldaityn kólik bar.
"Bul turǵyda biz qazaq kásipkerlerimen de teń emespiz. Odaqqa ótip alyp, erteń básekege tótep bere almasaq, myńdaǵan, on myńdaǵan adam dalada qalady. Júk tasymaldaýshylar bankrotqa ushyraidy. Sondyqtan asyǵyp-aptyǵýdyń qajeti shamaly. Erteń opyq jeýimiz múmkin", – deidi ol.
Ergashevtiń atap ótkenindei, bul arada Ózbekstannyń ulttyq múddesin bárinen joǵary qoiǵan Mirziiaev durys sheshim qabyldady.
Eýraziialyq odaqqa qosylýdan bas tartyp, onyń olqylyqtaryn kóre bildi jáne sonyń nátijesinde júz myńdaǵan jumys ornyn saqtap qaldy.
Ázirlegen, Dýman BYQAI
