Eske sala ketsek, «DSÝ-14» jáne «Topaz» JShS direktorlary Aleksandr Fedosov pen Bolat Baǵadaev óńirdegi birqatar memlekettik satyp alýlardyń durys ári ashyq ótkizilgendigine óz taraptarynan senimsizdik bildirgen bolatyn.
Olardyń aitýlarynsha, memlekettik organdar memlekettik satyp alýdyń arnaiy tártibin belgileý týraly Úkimet qaýlysynyń 39 pýnktin óz múddelerine qarai burmalaǵan.
Aimaq basshysynyń ókimimen jumys komissiiasynyń quramyna prokýratýra, sybailas jemqorlyqqa qarsy kúres jáne ishki memlekettik aýdit departamentteri, sondai-aq kásipkerler men barlyq tiisti memlekettik organdardyń ókilderi jáne ókiletti qurylymdar men depýttattar kirdi.
Komissiia quramynda «DSÝ-14» jáne «Topaz» JShS-niń direktorlary Aleksandr Fedosov pen Bolat Baǵadaev ta bar.
– Osy másele boiynsha komissiia qurýǵa sheshim qabyldadym. Bunyń bári Qazaqstan Respýblikasy Zańynyń oryndalýy úshin ári obektivti baqylaý jasalý úshin atqarylyp jatyr. Men barlyq komissiia múshelerinen obektivti bolýǵa, barlyq jaǵdaiǵa Zań turǵysynan qaraýǵa shaqyramyn, – dep atap ótti Danial Ahmetov.
– Men oblys ákimine alǵys aitqym keldi. Vitalii Shaberdi (ShQO prokýrorynyń birinshi orynbasary) birbetkei maman retinde bilemin. Ol óziniń is-áreketine, ákimdik pen basqalardyń áreketterine baǵa bere alady. Sondyqtan men onyń obektivti sheshiminen úmittimin, – dedi Aleksandr Fedosov.
Atap aitar bolsaq, ústimizdegi jyldyń 20 naýryzynda memlekettik satyp alýdyń arnaiy tártibin anyqtaý týraly Úkimettiń jańa qaýlysy shyqqan.
Qaýlynyń 39-tarmaǵynda tapsyrys berýshiniń ákimshilik-aýmaqtyq birlikte bolýynan basqa, jetkizýshiniń zańdy meken-jaiy karantin aimaǵyndaǵy ákimshilik-aýmaqtyq birlikte tirkelse nemese tótenshe jaǵdaidyń engizilýine bailanysty sol aýmaqta shekteýler bolsa, baiqaý komissiiasy jetkizýshini qabyldaýdan bas tartýǵa quqyly delingen.
Alaida, bul tarmaqtyń naqty túsindirmesi joq bolǵandyqtan, memlekettik satyp alýǵa qatysýshylar men tapsyrys berýshiler arasynda túsinispeýshilik týyndap jatyr.
Al oblystaǵy Memlekettik satyp alý jáne kommýnaldyq menshik basqarmasynyń basshysy Rýfat Akramovtyń túsindirýinshe, atalǵan eki kásipker senimsizdik tanytyp otyrǵan konkýrstardyń barlyǵy da zań aiasynda arnaiy tártip boiynsha júrgizilgen.
Atap aitqanda, «Topaz» JShS «Jerasty sýlary qorymen qamtamasyz etý úshin izdeý-barlaý jumystary» nysany boiynsha konkýrstan jeńilgen sebebi, kompaniianyń ótiniminde jumysty tapsyrý orny aýmaǵynda, atap aitqanda Ridder qalasynda, Glýbokoe, Jarma, Kókpekti, Katonqaraǵai, Ulan, Shemonaiha, Aiagóz jáne Altai aýdandarynda resýrstarynyń barlyǵyn rastaityn qujattary bolmaǵan.
Qazir atalǵan konkýrs boiynsha «Topaz» JShS shaǵymyna sáikes oblystyq ishki memlekettik aýdit departamenti aýditorlyq tekserý júrgizýde.
– «DSÝ-14» JShS-ne keler bolsaq, kompaniia 2020 jyldyń basynan beri Óskemen qalasynda ortasha jóndeý boiynsha 10 konkýrsqa qatysty. Olardyń ishinde eki konkýrsqa jiberildi. Alaida, baǵa usynymynda jeńilip qaldy. Qalǵan segiz konkýrsta «DSÝ-14» JShS-niń ótinimi 39 pýnktke sáikes arnaiy tártipti qoldana otyryp, qaitaryldy.
Sebebi, aýmaǵy boiynsha kásiporyn Kókpekti aýdanynyń Samar aýylynda ornalasqan. Sonymen qatar, qosymsha aqparat retinde aita ketsem, «DSÝ-14» JShS-i Kókpekti aýdanynda eki nysan boiynsha arnaiy tártipti qoldaný arqyly konkýrsqa qatysyp, jeńimpaz dep tanyldy.
Birinshisi, Óskemen-Tarǵyn-Samar avtokólik jolynyń 113-133 shaqyrymdaryn ortasha jóndeý, nysan quny – 375 mln. teńge. Ekinshi nysan – Preobrajenka-Shuǵylbai avtokólik jolyn ortasha jóndeý, quny – 301 mln. teńge. Eki konkýrs boiynsha bekitilgen kelisim 646,4 mln. teńgeni quraidy, – deidi Rýfat Akramov.
Jiynda áriptesteriniń óz attaryna qaratyp aitqan narazylyqtaryna qarsy tenderdi jeńip alǵan kásiporyndardyń basshylary da óz pikirlerin bildirdi.
«Vostokvzryvprom» JShS direktory Dmitrii Somov naqaq jala japqany úshin joǵaryda aty atalǵan eki kásipkerge qatysty sotqa talap aryz bergenin málimdedi.
– Bizdiń kompaniiada myńnan asa adam bar jáne 200 birlikke tarta jańa tehnikamyz bar. Tájiribemiz úlken, biýdjetke milliardtap qarjy salyp otyrmyz. Eger salystyryp qarar bolsaq, qazirgi tańda Aleksandr Ivanovich sizdiń shtattyq birligińiz meniń injenerlik-tehnikalyq qyzmetkerlerimnen úsh ese az. Zaýytyńyzdyń kúshi de úsh ese kem. Tehnika parkińiz eski.
Dál osyndai kórinis Baǵadaevta da bar. Bizdiń 15 burǵylaý tehnikamyz qazir jańa. Eki kompaniiany da bizge jala japqany úshin sotqa berip otyrmyn. Alǵashqy otyrys osy aidyń 11 kúni ótedi, – Dmitrii Somov.
«Tereze» JShS óndiristik bólim basshysy Liýdmila Eltsova da óziniń áriptesterine ókpesi bar bop shyqty. Onyń aitýynsha, ótken jyly «DSÝ-14» JShS Samar tas jolyndaǵy jóndeý jumystary barysynda ádiletsizdik tanytyp, «laqtyryp» ketken.
– Men «DSÝ-14» JShS-niń «qaladaǵy eń úzdik qurylys kompaniialarynyń birimiz» dep júrgenin estip, qapalandym. Ótken jyly qosalqy merdiger retinde «DSÝ-14» JShS-gin jumysqa tarttyq. Kelisimshart somasy 595 million teńgeni quraǵan.
Osy kelisimge sáikes, Samar tas jolyna shyǵatyn joldan 950 metr avtomobil jolyna deiin ekiqabatty asfaltbeton jamylǵysy bar jer tósemin tolyǵymen salý kerek boldy ári bul joldy qurylys maýsymy bitkenshe ótkizip, qysqa deiin daiyn bolýy kerek boldy.
Biraq «DSÝ-14» kelisimde turmai, ýáde etilgen 950 metrdiń tek 100 metrge jeter-jetpesine asfalt saldy. Osylaisha, jóndeý jumystaryna ózimiz aralasyp, óz kúshimizben ýaqytynda bitirdik, – dedi Liýdmila Eltsova.
Komissiianyń kelesi otyrysy juma kúni bolady. Barlyq qujattar qamtamasyz etilip, ashyq qaralady. Oblys prokýrorynyń birinshi orynbasary Vitalii Shaber de komissiia jumysynyń ashyq júrgiziletinin málimdedi.
