Bul video áp-sátte áleýmettik jelige tarap, qazaqstandyqtar Chocolife kompaniiasynyń qyzmetin paidalanbaýdy usynyp ári Mýhoriapovtan el aldynda keshirim suraýdy talap etti.
Ol óz pikirinde qazaq tilinde sóilesýdi mádenietsizdik sanaitynyn aityp, «adam orys tilin rasymen bilmese, jaraidy. Qazaqsha sóileý — ultshyldyqtyń kórinisi, mádeniettiń belgisi emes. Dostar, men qazaq tilin qurmetteimin, Qazaqstan – meniń Otanym! Meniń sózderimdi durys túsingenderińizdi qalaimyn. Men kez kelgen qysymǵa qarsymyn» dep kólgirsigen.
Alaida, budan keiin kózi ashyq qoǵam óre túregelip, jan-jaqtan aqparattyq shabýyl jasady. Tipti, uialy telefondarynan Chocolife kompaniiasynyń qosymshasyn óshirip, baikot jariialap jatyr.
Ol ol ma, Mýhoriapovtyń ústinen aryz túsirgender de bar.
Máselen, replikanyń zańdy buzatynyn-buzbaitynyn tekserý boiynsha prokýratýraǵa aryz túsirgen belgili jýrnalist Aibar Oljai «Jańa Qazaqstannyń» túpkilikti ideiasy – zań aiasyndaǵy ádiletti qoǵam qurý ekenin aityp, «Ramil Mýhoriapov zańdy buzdy ma? Basty suraq osy. Oǵan tek qana quzyrly organ arnaiy tekserýden keiin jaýap bere alady.
Biraq ol úshin azamattyq qoǵam quzyrly organǵa júginýi tiis.
Osyndai, tek zańdyq, konstitýtsiialyq printsippen Ramil Mýhoriapovtyń replikasyn QR Qylmystyq Kodeksiniń 174 baby, 1 tarmaǵy boiynsha tekserýdi surap, Almaty qalasynyń Prokýratýrasyna aryz jiberdim. Aryz JT-2022-02543155 nómirimen resmi tirkeldi. 11 qarashaǵa deiin prokýratýra resmi jaýabyn jiberedi», – dedi ol.
Qoǵam belsendileri munymen toqtap qalmaq emes.
Tanymal advokat Lázzat Ahatova Dalanews.kz tilshisine bergen jaýabynda Mýhoriapovtyń ústinen bir adam ǵana emes, qoǵam bolyp aryz túsirý kerektigin jetkizdi.
Lázzat Ahatova, advokat:
Mýhoriapovtyń pikiri boiynsha ákimshilik is te qozǵaýǵa bolady
– Lázzat Kendebaiqyzy, Mýhoriapovtyń reseiliktermen bolǵan kezdesýde aitqan pikirinde shovinizmniń belgileri bar ma?
– Menińshe, shovinistik kózqaras pen piǵyl anyq kórinip tur. Menmendik, mádenietsizdikti ózi kórsetti. Qazaqstanda turyp, qazaq tilin syilamady.
Shyntýaityna kelgende, onyń taýyp otyrǵan tabysy qazaqstandyqtardyń arqasynda kelip otyr. Qazaq aýditoriiasynyń aqparattyq shabýyly ájeptáýir soqqy boldy dep oilaimyn.
Jýrnalist Aibar Oljai prokýratýraǵa aryz túsiripti, Dáýlet Muqaev ta shabýyl jasapty.
Erteń men de Qylmystyq kodekstiń 174-baby boiynsha aryz túsiremin. Munda ákimshilik is te bar.
Ol alaýyzdyq týdyryp otyr. Bir adam emes, qoǵam bolyp kirisýimiz kerek. Resmi aryzǵa resmi túrde jaýap beredi dep oilaimyn.
– Ile-shala Chocolife basshysy Ramil Mýhoriapov keshirim surady. Osy bizde keshirim surai salý ádetke ainalǵan joq pa?
– Keshirim suraǵan beinejazbasyn kórdim. Bireý qazaqsha shala-sharpy jazyp berse kerek. Sony oqyp bergen siiaqty. Mindetti túrde jazaǵa tartylýy kerek. Bálkim, úlken mólsherde aiyppul salý kerek pe? Mundailar qaltasyna salmaq tússe ǵana oilanady.
Qazaqtildi aýditoriia telefondarynan qosymshasyn óshirip tastap, qanshama adam baikot jariialady. Óte durys! Táýbesine tústi ǵoi. Keshirim suraǵanynyń ózi sony bildiredi.
Bular ábden basynyp alǵan. Osyndaida ózimizdiń máńgúrt qazaqtarǵa ókpeleimin. Keide óz tilimizdi ózimiz syilamaimyz. Qazaqsha sóileseń, oryssha jaýap beredi.
Sodan keiin Mýhoriapov siiaqtylar «Qazaqtyń ózi ana tilin syilamai jatsa, bizge ne kerek?» demei me? Ultjandylyq jetispeidi bizge.
Eger qaida júrsek te, qazaq tilin bárinen biik qoiyp, óz tilimizdi qadir tutsaq, eshkim basynbaityn edi. Sol Mýhoriapov basqa elde solai aityp kórsinshi!? Biz tek aityp qana qoisaq, «Bular shýlap-shýlap qoiady» deitin edi.
Shaǵym, aryz túsirip, qosymshasyn joiyp tastap edik, qaltasyna salmaq tústi. Qomaqty tabysynan airyldy. Qarjylyq soqqy boldy.
P.S. Basy daýǵa qalǵan Ramil Mýhoriapov áleýmettik jelidegi paraqshasynda halyqtan keshirim suraǵan video júktedi. Bálkim, ol keshirim surap, másele jyly jabyldy dep oilaityn shyǵar. Alaida, Bas prokýratýra zań normalary buzyldy ma, joq pa, jiti tekserip dúiim jurtqa jariia etýi tiis. Al zań buzylsa, jaýapkershilik kútip tur.
Eger Mýhoriapov siiaqtylar «ańdamai sóilegen aýyrmai óletinin» bilip júrse, keleside álgindei pikirdi oilanyp aitar edi.
