Keleli basqosýda Respýblıka kúni merekesiniń mán-mańyzy, elimizdiń táýelsizdik jyldardaǵy negizgi jetistikteri, qoǵamda turaqtylyqty saqtaýǵa baǵyttalǵan máseleler talqylandy.
Jıynǵa ǵalymdar, úkimettik emes uıym músheleri, memlekettik organdardyń, etnomádenı birlestikterdiń, jastar qanatynyń ókilderi qatysty.
Kezdesýde alǵash bolyp sóz alǵan Túrkistan oblysy qoǵamdyq damý basqarmasynyń basshysy Ańsar Óserbaev Qazaqstannyń egemendigi týraly deklarasıa táýelsizdikke qaraı jasalǵan alǵashqy qadam ekenin, onyń qabyldanýy elimiz úshin oń ózgerister ákelgenin jetkizdi.
– Bıyl Prezıdentimizdiń bastamasymen 25 qazan – Respýblıka kúni ulttyq mereke retinde atalyp ótiledi. Dál osy kúni 1990 jyly Qazaqstannyń egemendigi týraly Deklarasıa qabyldandy. Babalarymyz úsh ǵasyr armandaǵan táýelsizdik qujat retinde tirkeldi. Osy deklarasıanyń arqasynda elimizdiń jeke terıtorıasy, halyqaralyq qatynastardaǵy derbestigi, memlekettik rámizderi bekitildi. Respýblıka kúni osyndaı tarıhı qundylyǵymen baǵaly, – dedi Ańsar Jańabaıuly.
Basqarma basshysy sondaı-aq bıyl oblysta Respýblıka kúnin atap ótýde eldik pen birlikti dáripteıtin qaıyrymdylyq, ekologıalyq jáne patrıottyq aksıalarǵa basymdyq berilip otyrǵanyn jetkizdi. Bul rette, ulttyq merekeniń tujyrymdamasy negizinde Túrkistan oblysynda 30 is-sharadan turatyn jospar bekitilgen. Mereke aıasynda aýdan, qalalarda ótetin 1200-den astam shara josparlanyp otyr. Sonymen birge mereke qarsańynda Túrkistan óńirinde jańa áleýmettik nysandar el ıgiligine tapsyrylady. Munyń barlyǵy merekeniń mańyzyn arttyrýǵa baǵyttalǵan.
Sondaı-aq jıynda sóz alǵan QR Prezıdentiniń janyndaǵy Memlekettik basqarý akademıasynyń Túrkistan oblysy boıynsha fılıalynyń dırektory Aınur Idrısova 25 qazandy Jańa Qazaqstan qurý jolyndaǵy mańyzdy kún dep atap ótti.
– Sońǵy 13 jyldan beri eleýsiz qalǵan ataýly kúndi, el Prezıdenti qaıta jańǵyrtty. Elimizdiń táýelsizdigi rasymen de osy kúnnen bastaý alady. Sondyqtan, bul kúnniń ulttyq mereke retinde bekitilýi táýelsizdik tuǵyryn asqaqtata túsetin mańyzdy qadam. Bul merekeni tarıhymyzdy, dástúrimiz ben tilimizdi, qundylyqtarmyzdy dáripteý dep qabyldaýymyz kerek, - dedi ol.
Jıyndy qorytyndylaǵan basqarma basshysy qatysýshylardy Respýblıka kúni merekesimen quttyqtap, eldik pen birliktiń jolynda kúsh biriktirip, elge qyzmet ete berýge shaqyrdy.
