كەلەلى باسقوسۋدا رەسپۋبليكا كۇنى مەرەكەسىنىڭ ءمان-ماڭىزى، ەلىمىزدىڭ تاۋەلسىزدىك جىلدارداعى نەگىزگى جەتىستىكتەرى، قوعامدا تۇراقتىلىقتى ساقتاۋعا باعىتتالعان ماسەلەلەر تالقىلاندى.
جيىنعا عالىمدار، ۇكىمەتتىك ەمەس ۇيىم مۇشەلەرى، مەملەكەتتىك ورگانداردىڭ، ەتنومادەني بىرلەستىكتەردىڭ، جاستار قاناتىنىڭ وكىلدەرى قاتىستى.
كەزدەسۋدە العاش بولىپ ءسوز العان تۇركىستان وبلىسى قوعامدىق دامۋ باسقارماسىنىڭ باسشىسى اڭسار وسەربايەۆ قازاقستاننىڭ ەگەمەندىگى تۋرالى دەكلاراسيا تاۋەلسىزدىككە قاراي جاسالعان العاشقى قادام ەكەنىن، ونىڭ قابىلدانۋى ەلىمىز ءۇشىن وڭ وزگەرىستەر اكەلگەنىن جەتكىزدى.
– بيىل پرەزيدەنتىمىزدىڭ باستاماسىمەن 25 قازان – رەسپۋبليكا كۇنى ۇلتتىق مەرەكە رەتىندە اتالىپ وتىلەدى. ءدال وسى كۇنى 1990 جىلى قازاقستاننىڭ ەگەمەندىگى تۋرالى دەكلاراسيا قابىلداندى. بابالارىمىز ءۇش عاسىر ارمانداعان تاۋەلسىزدىك قۇجات رەتىندە تىركەلدى. وسى دەكلاراسيانىڭ ارقاسىندا ەلىمىزدىڭ جەكە تەرريتورياسى، حالىقارالىق قاتىناستارداعى دەربەستىگى، مەملەكەتتىك رامىزدەرى بەكىتىلدى. رەسپۋبليكا كۇنى وسىنداي تاريحي قۇندىلىعىمەن باعالى، – دەدى اڭسار جاڭاباي ۇلى.
باسقارما باسشىسى سونداي-اق بيىل وبلىستا رەسپۋبليكا كۇنىن اتاپ وتۋدە ەلدىك پەن بىرلىكتى دارىپتەيتىن قايىرىمدىلىق، ەكولوگيالىق جانە پاتريوتتىق اكسيالارعا باسىمدىق بەرىلىپ وتىرعانىن جەتكىزدى. بۇل رەتتە، ۇلتتىق مەرەكەنىڭ تۇجىرىمداماسى نەگىزىندە تۇركىستان وبلىسىندا 30 ءىس-شارادان تۇراتىن جوسپار بەكىتىلگەن. مەرەكە اياسىندا اۋدان، قالالاردا وتەتىن 1200-دەن استام شارا جوسپارلانىپ وتىر. سونىمەن بىرگە مەرەكە قارساڭىندا تۇركىستان وڭىرىندە جاڭا الەۋمەتتىك نىساندار ەل يگىلىگىنە تاپسىرىلادى. مۇنىڭ بارلىعى مەرەكەنىڭ ماڭىزىن ارتتىرۋعا باعىتتالعان.
سونداي-اق جيىندا ءسوز العان ق ر پرەزيدەنتىنىڭ جانىنداعى مەملەكەتتىك باسقارۋ اكادەمياسىنىڭ تۇركىستان وبلىسى بويىنشا فيليالىنىڭ ديرەكتورى اينۇر يدريسوۆا 25 قازاندى جاڭا قازاقستان قۇرۋ جولىنداعى ماڭىزدى كۇن دەپ اتاپ ءوتتى.
– سوڭعى 13 جىلدان بەرى ەلەۋسىز قالعان اتاۋلى كۇندى، ەل پرەزيدەنتى قايتا جاڭعىرتتى. ەلىمىزدىڭ تاۋەلسىزدىگى راسىمەن دە وسى كۇننەن باستاۋ الادى. سوندىقتان، بۇل كۇننىڭ ۇلتتىق مەرەكە رەتىندە بەكىتىلۋى تاۋەلسىزدىك تۇعىرىن اسقاقتاتا تۇسەتىن ماڭىزدى قادام. بۇل مەرەكەنى تاريحىمىزدى، ءداستۇرىمىز بەن ءتىلىمىزدى، قۇندىلىقتارمىزدى دارىپتەۋ دەپ قابىلداۋىمىز كەرەك، - دەدى ول.
جيىندى قورىتىندىلاعان باسقارما باسشىسى قاتىسۋشىلاردى رەسپۋبليكا كۇنى مەرەكەسىمەن قۇتتىقتاپ، ەلدىك پەن بىرلىكتىڭ جولىندا كۇش بىرىكتىرىپ، ەلگە قىزمەت ەتە بەرۋگە شاقىردى.
