Qazaqstan qarjygerleri qaýymdastyǵynyń (QQQ) Taldaý ortalyǵy qarjy naryǵynyń kásibı qatysýshylary arasynda júrgizgen kezekti saýalnama nátıjelerin jarıalady. Onda, negizinen, 2025 jylǵy maýsymdaǵy makroekonomıkalyq kórsetkishterge qatysty boljamdar berilgen, dep habarlaıdy Dalanews.kz.
Bazalyq mólsherleme
Aılyq ınflásıa kórsetkishteriniń úsh aı qatarynan baıaýlaýynyń tirkelýine baılanysty saýalnamaǵa qatysqan sarapshylardyń 79%-y Ulttyq bank 5 maýsymda ótetin aldaǵy otyrysynda bazalyq mólsherlemeni ózgerissiz qaldyrady dep kútedi.
Naryqtyń qalǵan qatysýshylary shamaly ósimge jol beredi: 16,75% deıin. Muny olar 2025 jyly ınflásıany 10-12% maqsatty dıapazon sheginde ustaý, sondaı-aq ulttyq valúta baǵamyn odan ári turaqtandyrý turǵysynda aqsha-nesıe saıasatyn qatańdatý talabynyń týyndaý yqtımaldylyǵymen túsindiredi.
Inflásıa
Saýalnama nátıjesi boıynsha, mamyrda 12 aıǵa arnalǵan ınflásıalyq kútýler bir aı burynǵy boljamdy 11,8%-dan 11,1% - ǵa deıin tómendedi.
"Bul, kóbinese birtindep baıaýlap kele jatqan naqty ınflásıa, valúta naryǵynyń salystyrmaly túrde turaqtanýy jáne birjolǵy tarıftik sheshimder tarapynan bolǵan qysymnyń tómendeýimen baılanystyrylady", - deıdi qaýymdastyqtaǵylar.
Bazalyq mólsherlemege baılanysty ınflásıalyq kútýlerdi qaıta qarastyrýǵa baılanysty bir jyldan keıingi deńgeı burynǵy 15,75% - dan 15,5% - ǵa deıin tómendetile otyryp, túzetildi. Osy jaǵynan alǵanda, ekonomıkadaǵy naqty mólsherleme 4,4% (buryn - 3,95%) bolýy múmkin, bul teńge túrindegi aktıvterdiń tartymdylyǵyn arttyra túseri sózsiz.
Valúta baǵamy
"Mamyr aıynda azdap tómendeýden keıin (0,3% - ǵa) maýsymda teńgege shaqqandaǵy 1 AQSH dollarynyń quny 516,3 teńgege deıin ósýi múmkin. Bul rette Ulttyq qordan alynyp, satylatyn shetel valútalary kóleminiń tómendeýi, salyq kezeńi tarapynan qoldaýdyń bolmaýy, jyl ortasyndaǵy dástúrge saı belsendi demalys maýsymy jáne búdjet qarajatyn ıgerýdi jedeldetý shetel valútasyna degen suranysty kúsheıtedi", - deıdi sarapshylar.
Al bir jyldan keıin 1 AQSH dollary boıynsha kútiletin baǵam 539,7 teńge bolýy múmkin.
Oǵan,negizinen, munaı baǵasynyń joǵarylaý yqtımaldylyǵy, ınflásıalyq kútýler kórsetkishiniń tómendeýi yqpal etpek.
Munaı
Bir jyldan keıin kútiletin Brent munaıynyń bir barreliniń ortasha baǵasy 65,4 dollardy (burynǵy boljam - 64,9) quraıdy. Buǵan AQSH-taǵy burǵylaý belsendiliginiń baıaýlaýy, Taıaý Shyǵystaǵy kúrdeli geosaıası jaǵdaı, Ýkraınadaǵy soǵysty retteýde oń nátıjeniń bolmaýy túrtki ekeni aıtylady.
Ekonomıkalyq ósim
Bir jyldan keıin elimizdiń JİÓ ósimi 4,1%-dy (3,9% - burynǵy boljam) quraıdy dep boljanady. Bul rette ekonomıkany jeńildetilgen qarjylandyrýdy ulǵaıtý arqyly aýqymdy kólemde qoldaý jospary, ınfraqurylymdyq jobalardy iske asyrý jáne elimizde shıkizat óndirisi kólemin ulǵaıtý mańyzdy ról atqarmaq.
