Almatyda uly aqyn Abai Qunanbaiulynyń týǵanyna 180 jyl tolýyna orai jolshylar arasynda óleń oqý baiqaýy ótti. Óleńsúier qaýymdy jinaǵan shara Abai murasyn ulyqtaýǵa arnalǵan.
Igi sharany uiymdastyrǵan – «Jol aktivteri sapasynyń ulttyq ortalyǵy» Almaty filialy men QazjolǴZI mekemesi. Baiqaý osy eki uiymnyń qyzmetkerleri arasynda ótti. Qatysýshylar qazaqtyń kemeńger aqynynyń óleńderin jatqa oqyp, rýhani merekege ainalǵan sharada óz ónerlerin pash etti.
Baiqaýǵa arnaiy qurylǵan komissiia qazylyq etti. Qazylar alqasynyń múshesi Ǵaliia Temirhanqyzynyń aitýynsha, mundai sharalardyń negizgi maqsaty – Abai shyǵarmashylyǵyn nasihattaý arqyly qyzmetkerlerdiń rýhani dúniesin baiytý, olardyń ádebietke degen qyzyǵýshylyǵyn arttyrý.
“Bul – aqynǵa degen qurmet, bul – aqyl-oidyń, parasattyń shyńy sanalatyn dana Abaiǵa taǵzym. Mundai baiqaýlar jol salasynda eńbek etip júrgen, ásirese, jol sapasyn tekserýshi mamandar men ǵylymmen ainalysyp júrgen qyzmetkerler úshin asa mańyzdy. Qatysýshylardyń Abai óleńderine degen qyzyǵýshylyǵy erekshe qýantty”, – deidi QazjolǴZI filialy direktorynyń orynbasary.
Saiysta uly aqynnyń keń tanymal óleńderi men ánderi jatqa aityldy. Qatysýshylardyń ishinen erekshe ónerimen kózge túsken – JASUO Almaty qalalyq filialynyń bólim basshysy Aidar Beispekov. Ol Abaidyń «Kózimniń qarasy» ánin naqyshyna keltire oryndap, kórermenderdiń ystyq yqylasyna bólendi.
“Abai óleńderin jatqa oqý – bul jai ǵana jattyǵý emes, bul – rýhani tárbie, bul – oidy tereńdetý men tildi damytý joly. Abaidyń árbir sózi – ómirlik ustanymǵa ainalatyn dana sózder. Ýaqyt ótken saiyn onyń shyǵarmalary óz qundylyǵyn joǵaltpaidy”, – deidi jeńimpaz Aidar Beispekov.
Baiqaý qorytyndysy boiynsha:
•I oryn – Aidar Beispekov (JASUO Almaty filialy),
•II oryn – Gúlnar Abdyrahmanova (QazjolǴZI),
•III oryn – Galina Nazarenko (QazjolǴZI).
Jeńimpazdar aqshalai syilyqtarmen, kýboktarmen jáne arnaiy diplomdarmen marapattaldy.
Abai murasy – máńgilik. Onyń óleńderi árbir qazaqtyń júreginde saqtalyp, bolashaq urpaqqa jol kórsetetin rýhani shamshyraq.
