Eske salsaq, aimaq basshysy Janseiit Túimebaev Maqtaaral aýdanyna jasaǵan saparynda iesiz qalǵan sý arnalaryn memleket menshigine iaǵni, «Qazsýshar» mekemesiniń quzyryna berýdi, ony tazalaý, retteý jumystaryn júrgizýdi tapsyrǵan bolatyn.
Osyǵan orai, búginde oblystyq Tabiǵi resýrstar jáne tabiǵatty paidalanýdy retteý basqarmasy Maqtaaral aýdanynda jalpy uzyndyǵy 103 shaqyrym bolatyn 51 kollektordy tazalaý jumystaryn bastap jiberdi. Tazalaý jumystary aldaǵy bir aidyń ishinde aiaqtalýy tiis.
Jalpy, Maqtaaral aýdanynda kolektorlyq júielerdiń uzyndyǵy 700 shaqyrymdy quraidy. Sonyń 400 shaqyrymy 15-20 jyldan beri tazalanbai, qamys basyp ketken bolatyn. Aǵyn sý jiberý qabiletteliginen aiyrylǵan kollektorlar tolyǵymen tazalansa, óńirde aǵyn sý tapshylyǵy edáýir azaiady dep otyr mamandar.
Sondai-aq, kollektorlar júiesin tazartýmen qatar, onda aǵatyn sýdy taza sýmen aralastyryp, nasostar arqyly qaita paidalaný qarastyrylýda. Ol úshin 30 nasos satyp alynǵan. Tik drenajdardan aǵatyn sýdyń quramyn anyqtap, olardy qaita paidalaný – bul jazǵy sýdan jyl saiyn tapshylyq kóretin maqtaaraldyqtar úshin tiimdi bolmaq.
Al ekskavatorlarǵa qiyndyq týǵyzatyn úlken kollektorlar júiesin tazalaý úshin «Vater-master» dep atalatyn tehnikany Qaraǵandy oblysyndaǵy Q.Sátbaev kanalyn qazyp jatqan jerinen arnaiy aldyrtypty. Tehnikanyń tiimdiligi sol – 4-5 ekskavatordyń jumysyn bir ózi atqara alady.
Aita keteiik, aýdanda 300-ge jýyq tik drenaj Qazsýshardyń balansynda bolsa, búginde sonyń 260-y jumys istep tur. 40 shaqtysy biyl qaita jóndeýden ótip, iske qosylmaq. Sondai-aq, 212 tik drenaj Islam damý banki arqyly jóndeýden ótkizilip, PÝID-2 jobasy boiynsha 149 tik drenaj jumysyn bastamaq.
Sondai-aq, biyl óńirimizdegi 37 shaqyrymdyq 12 sý nysandaryna oblystyq biýdjetten 1 mlrd. teńge qarjy qaralyp otyr. Evropa Qaita Qurý jáne Damý Bankiniń qarjylandyrýymen Shardara aýdanyndaǵy Jaýshyqum alqabyn sýlandyrý isi de qolǵa alynýda. Joba tolyǵymen iske assa, Shardara aýdanynda qosymsha 10 myń gektar sýarmaly jerdi ainalymǵa qosýǵa múmkindik týady.
Joǵarydaǵy atalǵan jumystar aiaqtalsa, oblysymyzdaǵy 3005 gektar sýarmaly jerdiń jaǵdaiy edáýir jaqsara túsetin bolady. Odan bólek, 1000 gektar sýarmaly jer jańadan ainalymǵa qosylmaq.
OQO ákiminiń baspasóz qyzmeti
