Komitettiń málimetinshe, «Diplommen aýylǵa» jobasy iske qosylǵan 12 jyldyń ishinde 85 myńnan astam maman 14,1 mlrd teńge kóleminde kóterme járdemaqy alǵan. Al 40 myńnan astam mamanǵa turǵyn úi satyp alý úshin 123,5 mlrd teńge kóleminde biýdjettik nesie berilgen.
– Jergilikti jerlerde densaýlyq saqtaý, agroónerkásiptik keshen salasyndaǵy mamandar men ákim apparaty qyzmetkerleriniń jetispeýshiligi baiqalady. Ekologtar, aspazshylar, dánekerleýshiler, mehanizatorlar bir sózben aitqanda, kásiptik-tehnikalyq bilimi bar mamandar qajet. Alaida, olar jobanyń tizimine kirmeidi. 2020 jyly aýyl, kent, aýyldyq okrýg ákimi apparatynyń memlekettik qyzmetshileri tizimge kirdi. Alaida olar aýdan ákimdiginiń mamandary týraly umytyp ketken kórinedi, – dedi komitet múshesi, «AMANAT» partiiasynan sailanǵan Májilis depýtaty Mádi Ahmetov.
Odan soń halyq qalaýlysy «Diplommen aýylǵa» jobasyna qatyspaityn monoqalalarǵa toqtaldy. Ol oblys ortalyqtarynan jáne basqa da iri qalalardan 500 shaqyrymnan astam qashyqtyqta ornalasqan Derjavinsk jáne Mamliýtka qalalaryndaǵy jaǵdaidy mysalǵa keltirdi.
– Bul qalalarda «Diplommen aýylǵa» jobasyna qatysýǵa múmkindik joq. Jas mamandarǵa kóterme járdemaqy tólenbeidi jáne turǵyn úige biýdjettik nesieler berilmeidi. Sondai-aq, jalaqy jaqyn mańdaǵy aýylmen salystyrǵanda 25%-ǵa az. Osylaisha azamattardyń teń múmkindikteri qaǵidaty joǵalady, – dedi Mádi Ahmetov.
Sonymen qatar, Partiialyq baqylaý komitetiniń jumys toby 2020-2022 jyldary «Aýyl – el besigi» jobasynyń iske asyrylýyna monitoring júrgizý maqsatynda Soltústik Qazaqstan jáne Aqmola oblystarynda tekserý júrgizdi.
Soltústik Qazaqstan oblysyndaǵy 63 aýylda 102 jobany júzege asyrýǵa 15,2 mlrd teńge bólingen. Eki jylda 34 bilim berý, 10 densaýlyq, 9 mádeniet nysany jáne 35 aýylda 226 shaqyrymnan astam ishki jol jóndelgen. Bul rette birqatar túitkildi másele bar. Máselen, Afonkino aýylynda mektepke júrgizilgen kúrdeli jóndeý jumystary kezinde kóp qatelik oryn alǵan.
Ulttyq ekonomika vitse-ministri Baýyrjan Omarbekovtyń aitýynsha, biyl 576 aýylda jobalardy iske asyrýǵa respýblikalyq biýdjetten 127,9 mlrd.teńge bólingen.
– Qazirgi ýaqytta tujyrymdamalyq sheshimdi qajet etetin birqatar másele bar. Búginde tiisti vedomstvoaralyq úilestirý jumystary joq. Aýyldy damytý jónindegi is-sharalar birneshe ulttyq joba sheńberinde iske asyrylady jáne jaýapty memlekettik organdardyń quzyretin tiisti úilestirýsiz, júielendirmei eldi mekenderdiń ómiri men ekonomikalyq belsendiliginiń ár túrli aspektilerine baǵyttalǵan. Budan basqa, biýdjettik qarjylandyrý úshin jobalardy irikteý tetigi rettelmegen. Jobalardy irikteýdi negizinen jergilikti atqarýshy organdar derbes, keide qarjylandyrý baǵyttary boiynsha tiisti basymdyqsyz júzege asyrady. Sonymen qatar, qoldanystaǵy aimaqtyq standarttar júiesiniń formatyn sapaly etip jańartý qajet, – dedi ol.
Partiialyq baqylaý komitetiniń tóraǵasy, Májilistegi «AMANAT» fraktsiiasynyń múshesi Artýr Platonovtyń aitýynsha, «Aýyl – el besigi» jáne «Diplommen aýylǵa» jobalary boiynsha aqparattyq qamtamasyz etý jumystary mardymsyz. Ol bul olqylyqtardy túzetetin ýaqyt jetkenin aitty.
– Árbir eldi mekenniń jáne árbir naqty qatysýshynyń jeke erekshelikterin eskerý qajet. Jas mamandar úshin qajetti sapaly áleýmettik infraqurylym joq. Kóptegen qurylys jumysy sapasyz, standarttarǵa sai oryndalmaǵan. Tek qana aqsha qurtý siiaqty. Bul júieli formalizmniń jáne memlekettik baǵdarlamalardyń bedelin túsirýdiń kórinisi, – dep túiindedi Artýr Platonov.
