Pýtinniń tilin tapqan áskeriler búginde Prigojin men onyń jendetterin qyspaqqa alýda. Kúni keshe ǵana «Vagnerdiń» jaldamaly sarbazdary tankteri men artilleriialyq gaýbitsiialaryna oq-dári jetpei, qynadai qyrylyp jatqanyn aityp, áskerilerge jalynǵandai bolyp vidoúndeý jariialaǵanyn kórdik.
Ótken jyldyń jeltoqsan aiynda da vagnerlikter áskerilerge úndeý jasaǵany esimizde.
Biraq ol kezde olar boqtyq sózin aralastyryp, áskerilerge doq kórsetip, ózderin qajetti oq-dárimen qamtamasyz etýdi talap etken-di.
Al bul joly jaldamaly jendetter jýasyp qalypty. Áńgime aýanynan agressiia múlde baiqalamaidy.
Kúzde Prigojin Bas shtabtyń bastyǵy Valerii Gerasimovty kekep-muqaǵany esimizde. Bul joly ol Reseidiń maidan shebinde aýyz toltyryp aitatyndai jetistikke jetpeýine «áskeri biýrokrataiia» kináli ekenin aitty.
Reseidegi sońǵy saiasi ahýaldan túigenimiz. Áskeriler men jaldamalylar birneshe aiǵa sozylǵan teke-tirestiń nátijesinde Prigojinniń jeńiliske ushyraǵanyn baiqaýǵa bolady.
Vagnerlikter ázirshe ózderiniń jeńilisin tolyq moiyndaǵan joq. Olar ózderiniń sátti soǵysyp jatqandaryn aityp, aqtalýda.
Prigojin jazda tym erkinsip áńgime aitqanda Sheshenstan basshysy Ramzan Qadyrov ony qoldap, áskerilerdiń aýlasyna biraz tas laqytyp, «áskeriler Pýtindi jerge qaratty» degen syńaida áńgime aitqany esimizde.
Al sońǵy kezderi Qadyrovtyń úni shyqpai qaldy. Osydan-aq, Reseide Prigojin men Qadyrov tandeminiń pozitsiiasy álsirei bastaǵanyny anyq ańǵarýǵa bolady.
Federaldik deńgeidegi dúnielerge qatysty áńgime aityp, pikir bildirýge qumar Qadyrov kúni keshe «jergilikti jerdegi gýbernatorlar anany-mynany áńgime qyla bergenshe, áskeri operatsiia kezinde qaza bolǵan sarbazdardyń otbasylaryna kómek kórsetýge kóbirek kóńil bólýi kerek» oiyn ortaǵa salǵan boldy. Burynǵydai maidan dalasyndaǵy áskerilerdiń qyzmetine baǵa bermedi. Baiaǵy ambitsiia joq.
Jalpy, Pýtinniń Prigojin men Qadyrovtan irgesin aýlaq salýy logikaǵa turǵydan durys sheshim.
Pýtinniń áskeri operatsiiasy sátsizdikke ushyrai bastaǵanda Prigojin Reseidegi túrmelerdiń esigin teýip kirip, qylmyskerlerdi soǵysqa úgittep, Ýkrainany zektermen jaýalap alatyndai eiforiiany bastan keshken-di. Budan basqa Qadrovtyń qolpashtaýy, Siriiada ymy-jymy bir bolǵan Sergei Sýrovikiniń jaýapty áskeri qyzmetke taǵaiyndalǵannan keiin Prigojin ózin Reseidegi eń yqpaldy adam ekenin sezindirgen bolatyn.
Isi kúmándi, Reseidiń ózinde moiyndalmaǵan jeke áskeri kompaniianyń qojaiyny Prigojinniń saiasi arenaǵa kóterilýinen Pýtin úshin qaýipti ekeni anyq.
Jemqorlyqpen aty shyqqan, túrmede otyrǵan Prigojinniń memleket isine aralasa bastaýy Reseidiń quqyqtyq memleket degen (eger solai oilaǵan kúnniń ózinde) ataýdan jurdai bolǵanyn aiqyndai túsetini taǵy bar.
Osy rette Pýtin dereý esin jiyp, Prigojinnen irgesin aýlaq salýdy jón dep tapqandai...
Bolmasa Pýtinniń mundai áreketke barýyn áskeriler kóndirýi bek múmkin. Endi kún ótken saiyn maidan dalasynda «Vagnerdiń» yqpaly azaiyp, Prigojinniń Shoigý men Gerasimovpen astyrtyn júz shaisýy jalǵasa túsýi múmkin.
Resmi Kreml Prigojinnen aiaq asty at-quiryǵyn kesýge dáti jetpeýi múmkin.
Aitalyq, Prigojin túrmelerdi aralap, zekterdi soǵysqa úgittegende olarǵa qomaqty ótemaqy men erkindikti ýáde etkenin bilemiz. Budan qylmyskerler aldynda Prigojinnen bólek Pýtinniń de jaýapkershilikti moinyna alǵanyn ańǵarýǵa bolady.
Eger Prigojinge Pýtin keńshilik jasamasa, ol túrmelerge erkin kirip, qylmyskerlerdi soǵysqa úgittei almas edi.
Demek qarý asynyp, maidan dalasynda qan tógip júrgen árbir zek Pýtinniń óz aldynada jaýapker ekenin tolyqtai sezinedi. Zekterińiz kúnde Solovev pen Simoniannyń propagandasyn tyńdap júrgen ýra patriottarmen áste shatastyrýǵa bolamaidy. Olar óz degeni bolmasa qolyndaǵy qarýyn Kremlge kezenýi múmkin.
Osy jaitty oilaǵan Pýtin qazir Prigojin bastaǵan jendetterdiń Bahmýt qalasyn uzaq ýaqyt boiy ala almai jatqanyn alǵa tartyp, bar báleni ataqty aspazdyń basyna úiip-tógip, aiypty qylýda.
Aldaǵy ýaqytta Kreml «Vagnerdiń» belsendiligin birtindep tómendetýge kúsh salatyny anyq.
Qazirdiń ózinde Prigojin úshin Reseidegi túrmelerdiń esigi tars jabylyp, onyń oiynnan shettetý isi bastalyp ketti.
Aldaǵy ýaqytta Prigojin buǵan qarsy turatyn bolsa, jaǵdai ýshyǵyp, Reseidiń qaýipsizdik kúshteri Prigojindi oqqa bailap berip, bul isti bir jaqty etýi múmkin.
Qalai desek te, bul soǵys – Reseidiń bilik basyndaǵylar arasynda alaýyzdyq týǵyzatyn jańa kezeńge aiaq basqandai...
Bul rette Prigojin de birden berile salmaityny anyq.
Prigojinniń artynda Orys áleminiń ideologiialyq jaqtaýshysy Aleksandr Dýgin men biraz propagandisterdiń turǵanyn da esten shyǵarmaǵan abzal. Osyndai jaittardy eskersek, aldaǵy ýaqytta Kremlde alaýyzdyq týyndap, Pýtinniń ainalasy biriniń etin biri jei bastaýy bek múmkin.
N.ÁÝBÁKIR
