Jańa jabdyqtar ornatýdyń arqasynda balyq zaýytynda qosymsha 10 ónim túri shyǵaratyn múmkindikke ıe bolǵan. Eýropa men kanadalyq tutynýshylar qazirdiń ózinde synaq úlgilerin tutynyp úlgerip, qyzyǵýshylyq tanytqan. Kásiporynda tehnologtar jańa jelini iske qosý jumystaryn aıaqtady, endi eksporttyq jetkizilimderdi jolǵa qoıý týraly kelissózder júrgizilýde.
Tehnolog Nıkıta Kashkarevtyń aıtýynsha, jalpy reseptýrany ázirleýden bastap jańa jeliniń jumysyn jolǵa qoıýǵa deıingi jumystyń bári – ózderiniń tól ıdeıalary.
Ony kásiporynnyń óz qarajaty esebinen satyp alynǵan qajetti qural-jabdyqtardyń kómegimen júzege asyrdy. Balyq ónimderiniń bul jańa túrleri keń kólemde tutynýǵa arnalǵan.
– Balyq – paıdaly taǵamdardyń biri, ol – dárýmenderdiń, mıneraldardyń jáne qanyqpaǵan maı qyshqyldarynyń tabıǵı kózi. Zertteýshiler dıetada balyqtyń úlesin bolar-bolmas arttyrýdyń ózi adamnyń densaýlyǵyna oń áser etetinin aıtady. Sondyqtan biz tutynýshylarǵa balyqtyń birneshe túrin usynyp kórýge bel baıladyq.
Bul – bir jaǵynan tutynýshylardyń talǵamyn qanaǵattandyrý bolsa, ekinshi jaǵynan halyqtyń densaýlyǵyn nyǵaıtýǵa yqpal etedi. Bizdegi balyq vıtamınderiniń kesheni sportshylar úshin erekshe paıdaly, aqyl-oı men fızıkalyq jumys ónimdiligin arttyrýda áseri zor, – dep atap ótti tehnolog.
Shynynda da, balyq zaýyty assortımentiniń tolyqtyrylýy qýantarlyq jaıt. Endi kásiporynda tek tartylǵan balyq pen balyq fılesi túrlerimen qatar aqtaban men alabuǵa pashtetteri, kúrish nemese kartop qosylǵan balyq-ósimdik vıtamın keshenderi, ýyldyryq maıy, balyq shujyqtary, sondaı-aq 8 aıdan bastap qosymsha tamaq retinde berýge bolatyn balalar taǵamynyń 2 túri shyǵarylady.
«Bolashaq Bastaý» JSHS balyq óńdeý zaýytynyń dırektory Dáýren Altybaevtyń aıtýynsha, jańa jabdyqta shamamen saǵatyna salmaǵy 50 jáne 100 gramdyq 2,5 myń dana quty ýyldyryq maıyn óndirýge bolady, bul bir aýysymda ónim kólemi 50 myńǵa deıin jetedi degen sóz. Búkil jeli tolyq avtomattandyrylǵan, óndiris prosesiniń mehanızmi jolǵa qoıylǵan.
Alakól aýdanynda qýattylyǵy jylyna 1400 tonna shıkizat óńdeıtin «Bolashaq Bastaý» JSHS-ny qosqanda barlyǵy 7 balyq sharýashylyǵy, 2 balyq óńdeý kásiporny jáne 2 seh tirkelgen.
Búginde balyq óńdeý kásiporny óńdeý qýatyn arttyrýǵa daıyn, biraq bul balyq aýlaý lımıtin ulǵaıtý máselesine baılanysty. Bul másele Ekologıa jáne tabıǵı resýrstar mınıstrligi mamandarynyń qaraýyna joldanatynyn aıta kele, oblys ákimi Beıbit Isabaev aýdanda balyq sharýashylyǵyn ınvestorlardy tarta otyryp, belsendi damytý qajettigin atap ótti.
Eske salsaq, «Bolashaq Bastaý» JSHS 2016 jyldan bastap jumys isteıdi, nysan muzdatylǵan balyqty óńdeýmen, saqtaýmen aınalysady. Balyq zaýyty táýligine shıkizatqa baılanysty 5-ten 10 tonnaǵa deıin balyq ónimin, sondaı-aq 3 tonnaǵa deıin balyq súıeginiń unyn óndire alady.
Aıtalyq, kókserkeniń, tuqy men basqa da balyq túrleriniń súbesi, sondaı-aq tartylǵan balyq jáne keptirilgen ónimder shyǵarylady. Qaldyqsyz kásiporynda 80-nen astam jumys orny quryldy, bul rette jalaqy mólsheri 150-den 500 myń teńgege deıin jetedi, onyń kólemi óndiriske baılanysty anyqtalady. Daıyn ónimder Belarýs, Germanıa, Chehıa, Danıa jáne basqa da Eýropa elderine eksporttalady. Jańa jeliniń iske qosylýynyń arqasynda jumys oryndarynyń sany arttyrýdyń da, jańa naryq keńistigine shyǵýdyń da múmkindigi artpaq.
https://dalanews.kz/del-qazir/86610-masimovting-kitaptaryn-aqsh-tyng-dokeyl
https://dalanews.kz/news/86575-zhyl-basynan-beri-2741-mlrd-tenggening-zeyne
