Qazaqtildi ortada "qiiaq murt" atanyp ketken Másimovtiń eks-prezidentke eliktep kitap jazatyn ádeti bar-tyn. Dalainside onyń komitetti basqaryp turǵanda "Amanat" dep atalatyn baspa úiin ashqanyn anyqtady. Baspanyń ataýy qazaqsha bolǵanmen, jaǵrafiiasy Qazaqstannan jyraqta – Vashingtonda tirkelgen.
Baspa úiiniń qonys-mekeni etip, AQSh astanasyn tańdap alýy tegin emes. Alys qurlyqta Másimovty qoldaityn yqpaldy lobbi bar.
Buǵan sál keiinirek toqtalamyz, "Amanat-qa" qaityp oralaiyq.
Baspanyń korporativtik saity jyp-jylmaǵai, kúdik týǵyzarlyq dáneńe joq. "Amanat" ózin eshkimniń sózin sóilemeitin, derbes kompaniia retinde tanystyrady. "Suranysqa ie úzdik týyndylardy jariialaýǵa árkez daiar ekenin" málimdeidi.
Solai bola tura, osy kúnge deiin baspadan nebári 3-aq kitap jaryq kórgen. Túsingen bolarsyz, úsheýi de Másimov áýletine tiesili.
"Amanat" baspasynan Másimovtyń – "Tamyr" jáne "Álemniń kelesi qojaiyny: jasandy intellekt" atty kitaby basylyp shyqqan.
Al úshinshi kitaptyń egesi – Kárimniń ákesi marqum Qajymuqan aqsaqal. "Estelikter" dep atalatyn kitapta Másimovter áýletiniń ótkeni men ketkeni baiandalǵan.
Dalainside budan da tereńge úńgip, Másimovtiń AQSh-taǵy sybailasyn tapqan. UQK-nyń burynǵy basshysynyń tól týyndylaryn keńinen taratýǵa, ári onyń AQSh-taǵy jaǵymdy obrazyn qalyptastyrýǵa Ýkrain azamaty bolysyp otyrǵan.
Akseniia Krýpenko ýkrain týmasy jáne bizdiń boljam boiynsha Másimovke tiesili "Amanat" baspasyna tikelei qatysty tulǵa, tipti osy baspanyń qojaiyny bolýy da ǵajap emes.
Baspa úiiniń veb-saitynda onyń esim-soiy joq, alaida quryltaishylardyń qujatynda – Krýpenko mekemeniń beldi qyzmetkeri dep kórsetilgen.
Másimovtyń qolymen jazylǵan týyndylardy AQSh-taǵy yǵai men syǵaiǵa taratý jumysy tikelei Krýpenkoǵa júktelgen deýge negiz bar.
Akseniianyń quzireti munymen shektelmeidi. Dalainside onyń álemjelidegi paraqshalaryn aqtaryp, kelesidei qyzyqty maǵlumat tapty.
Krýpenko Másimovtyń dáýirlep turǵan shaǵynda Vashintonǵa túrli maqsatpen at sabyltyp keletin sheneýnikter men diplomattarǵa arnap agenttik ashqan.
Bylaisha aitqanda, VIP klientterge qyzmet kórsetken. Olarǵa oqqaǵar usynǵan, qonaq úige ornalastyrǵan, at-kóligi men as-sýyn qamdaǵan.
Baspanyń korporativtik qujatynda Krýpenkodan ózge Másimovtyń uly – Eskendir Kárimniń de aty-jóni júr.
Álbette, Krýpenko Másimovtyń háli múshkil ekenin jaqsy biledi, oǵan janashyr ekeni jasyryn emes. Ýkrainaǵa basyp kirgen Pýtin Krýpenkonyń "Kárimge qol ushyn sozsam..." degen josparyn buzǵan tárizdi.
Kseniia qazir atajurtyna járdemdesýge bilek túre kirisken. Onyń uiytqy bolýymen Ýkrainaǵa gýmanitarlyq kómek jóneltetin arnaiy qor qurylypty. Álbette, munysy quptarlyq is. Dese de, bizdi Másimovtyń máselesi kóbirek qyzyqtyrady.
Dalainside anyqtaǵanyndai Krýpenko Másimovtyń tól týyndylaryn AQSh-tyń ishki-syrtqy saiasatyn aiqyndaityn birtalai yqpaldy tulǵalarǵa arnaiy tartý etken. Osyǵan qarap-aq amerikalyq elita da óz tarapynan "murttymen" bailanys ornatýǵa múddeli bolǵanyn ańǵaramyz. Álgi kitaptar bul arada "oramal ton bolmaidy, jol boladynyń" degen isharanyń rólin atqaryp tur.
Sonda munyń túpki máni nede? Kárimniń kóńilin tabýǵa tyrysqandar neni kózdedi? Ilgeride aitqanymyzdai, alys qurlyqta Másimovtiń máselesine bei-jai qaramaityn myqty lobbi bar. Másimovke kimder arasha túsýde?
Zertteýdiń 2-shi taraýynda bul másele ary qarai jalǵasady. Arnaǵa tirkelip alyńyz
