Shýchinsk qalasynda tehnikalyq jáne kásiptik bilim berý uiymdarynyń stýdentteri arasynda Respýblikalyq slet óz jumysyn bastady. Elimizdiń barlyq óńirinen kelgen 100-den astam belsendi jastar jumysshy mamandyqtarynyń bolashaǵyn talqylap, sheberlikterin shyńdap, jańa serpin men shabyt alýǵa jinaldy. Is-iaranyń ashylýyna QR Premer-ministriniń orynbasary Ermek Kósherbaev, oqý-aǵartý ministri Ǵani Beisembaev, Aqmola oblysynyń ákimi Marat Ahmetjanov, QR Parlamenti Májilisiniń depýtattary qatysty.
Premer-Ministrdiń orynbasary Ermek Kósherbaev slet qatysýshylaryn quttyqtap, jumysshy mamandyqtarynyń el damýyndaǵy mańyzdy rólin atap ótti:
– Memleket basshysy 2025 jyldy Jumysshy mamandyqtary jyly dep jariialady. Munda másele tek bir salanyń mamandaryn daiarlaý týraly ǵana emes, jalpy eńbekke degen kózqarasty qaita qaraý týraly bolyp otyr. Uzaq ýaqyt boiy jumysshy kásipterine qatysty qoǵamda stereotipter qalyptasyp keldi. Búginde jaǵdai ózgerdi. Qazirgi jumysshy – jańa tehnologiialardy meńgergen, eńbek naryǵynda suranysqa ie bilikti maman.
Memleket retinde biz eńbekti qadirleý dástúrin qaita jańǵyrtyp, jumysshy eńbegine laiyqty qurmet qaitarý úshin bar kúshimizdi salyp jatyrmyz. Óitkeni indýstriialyq damý, óndiristi jańǵyrtý, ekonomikalyq turaqtylyq – bári eń aldymen sizderdiń eńbekterińizge tikelei bailanysty. Osy ózgeristerdiń ózeginde – sizder, jas mamandar tursyzdar, – dedi Ermek Kósherbaev.
Biylǵy jyldyń basynan beri 8 myńnan astam kásibi baǵdar berýshi maman daiyndaldy, mektepterde 352 beiindik synyp ashyldy, 1300-den astam oqýshy jumysshy mamandyqtarynyń negizderin meńgerip úlgerdi. Sheftik qamqorlyqqa alǵan kásiporyndar sany 7 esege artsa, kásiporyndarmen dýaldy oqytý kelisimsharttarynyń sany 2 esege kóbeidi. 185 kolledjde materialdyq-tehnikalyq baza jańartylyp, stýdentterdiń jataqhanamen qamtylýy 96%-ǵa jetti.
1 qyrkúiekten bastap tehnikalyq jáne kásiptik bilim berý uiymdaryna arnalǵan jan basyna shaqqandaǵy qarjylandyrý kólemi 2 esege ósip, bir stýdentke 437 myń teńgeden 912 myń teńgege deiin ulǵaiady.
– Qazirgi eńbek naryǵynda tek diplom ǵana emes, naqty daǵdy men tájiribe mańyzdy ról atqarady. Qazaqstannyń tehnikalyq jáne kásiptik bilim berý júiesi jańa deńgeige kóterilýde. Biz Qytai, Frantsiia, Túrkiia, Japoniia, Ulybritaniia, Grýziia jáne ózge de eldermen birlesip, 10 halyqaralyq jobany qolǵa aldyq. Alǵash ret kolledjderge halyqaralyq sertifikattaý engizildi. Endi bizdiń stýdentter óz quzyretterin álemdik standarttar boiynsha dáleldep, sheteldik taǵylymdamalarǵa, halyqaralyq eńbek naryǵyna jol ashatyn bolady, – dedi Ǵani Beisembaev.
Sletqa qatysýshylardyń arasynda Jambyl politehnikalyq joǵary kolledjiniń 3-kýrs stýdenti Aiala Baibolat ta bar. Ol memleketten bilim granty negizinde oqidy jáne onyń kolledji internatsionaldandyrý jobasyna alǵashqylardyń biri bolyp engen.
– Prezidentimiz Jumysshy mamandyqtary jylyn jariialaǵan sátte bizdiń eńbegimizdiń mańyzdylyǵy men qajettiligi aiqyndaldy. Búgingi tańda kolledjder – sanaly ári bolashaǵy zor tańdaý. Bizde zamanaýi sheberhanalar, halyqaralyq taǵylymdamalar ashylyp jatyr, eń bastysy – naqty múmkindikter bar. Osyndai senim artqandaryńyzǵa alǵys aitamyn, – dedi stýdent.
Slet 24 shildege deiin jalǵasady. Úsh kún boiy jastar motivatsiialyq kezdesýlerge, sheberlik sabaqtaryna, interaktivti bilim berý bloktaryna, komandalyq tapsyrmalar men mádeni-sporttyq baǵdarlamalarǵa qatysady.
Aita keteiik, elimizde 772 kolledj bar, onda 550 myńnan astam stýdent bilim alýda.
