Oblys ákimi Amandyq Batalov tóraǵalyq etken jıynǵa Almaty oblysynyń barlyq aýdan, qala ákimderi men basqarma basshylary qatysty.
Oblystaǵy úsh aýysymdy mektepter máselesin sheshý maqsatynda A. Batalov osy salaǵa jaýapty Almaty oblysy ákiminiń birinshi orynbasary Lázzat Turlashovqa, qurylys jáne bilim basqarmalarynyń basshylaryna naqty tapsyrma berip, 11 mekteptiń jobalyq-smetalyq qujattaryn daıyndaýdy júktedi.
– Qujat daıyndaýdy jyldamdatý kerek. Keler jyly biz úsh aýysymda bilim beretin mektepterdiń sanyn azaıtý úshin jobalyq-smetalyq qujattardy daıyndap, respýblıkadan qarjy bóliný úshin tezirek ótkizilýi tıis. Máselen, qazir 15 mekteptiń qujaty daıyndalyp jatsa, oǵan qosymsha taǵy 11 mekteptiń smetasyn daıyndaýdy tapsyramyn. Bul másele meniń tikeleı baqylaýymda bolady. 2019 jyldyń búdjetinen jalpy 26 jańa mekteptiń qurylysyna qarjy qarastyrý úshin jyldam jumys isteýimiz kerek, – dedi A. Batalov.
Aıta keteıik, búgingi tańda Almaty oblysynda úsh aýysymda bilim beretin mektepter sany 34-ke jetken. 2017 jyly 33 jańa mektep paıdalanýǵa berilgenimen, óńirde úsh aýysymdy bilim oshaqtarynyń sany áli de azaımaı tur. Amandyq Batalov bul jaıtty oblystaǵy demografıalyq ósimmen jáne ishki mıgrasıalyq jaǵdaımen baılanystyrady. Onyń sózinshe, Jetisý jerinde jylyna 50 myńnan asa sábı dúnıege kelip jatyr.
Sondaı-aq, óńir basshysy Almaty oblysynda 100 myńǵa jýyq adamnyń jalaqysy ósetinin atap ótip, oblys ákiminiń orynbasary Jeńis Tuıaqovqa, ekonomıka jáne búdjettik josparlaý basqarmasyna qarjy qajettiligin anyqtap, ony 2019 jylǵa arnalǵan búdjette qarastyrýdy tapsyrdy.
Oblys basshysynyń aıtýynsha, Ekonomıka jáne búdjettik josparlaý basqarmasy qysqa merzimde Elbasynyń «Qazaqstandyqtardyń ál-aýqatynyń ósýi: tabys pen turmys sapasyn arttyrý» atty Qazaqstan halqyna Joldaýyn iske asyrý jónindegi is-sharalar josparyn ázirlep, sol jospar basshylyqqa alynatyn bolady.
– Elbasy Joldaýda Úkimetke 2019 jyldyń 1 qańtarynan bastap eń tómengi jalaqyny bir jarym esege kóterýdi tapsyrdy. Iaǵnı, jalaqy 28 myń teńgeden 42 myń teńgege deıin ósedi. Bul oblystyń 100 myńǵa jýyq halqyna tikeleı qatysty, sonyń ishinde 41 myń búdjettik uıym qyzmetkerlerine eńbekaqy orta eseppen 35%-ke ósedi, – dedi.
Búgingi tańda oblys aýyl sharýashylyǵy jalpy respýblıkalyq ulttyq óniminiń 17%-yn berip otyr. Almaty oblysynyń aýmaǵynda qant qyzylshasy, júgeri jáne maıly daqyldar men mal azyǵy baǵytyndaǵy ósimdikterdi óńdeýdi jáne ulǵaıtý boıynsha jumystar júrgizýdi iske qosylǵan. Atap aıtsaq, mal sharýashylyǵynyń jyl saıynǵy ósýi, qaıta óńdeý deńgeıi 33% -ǵa jetti, al 2021 jylǵa qaraı 68% -ǵa deıin jetkizý josparlanyp otyr.
Qazirgi ýaqytta oblysta 1 mıllıard teńgeden asatyn 50 iri joba júzege asyrylýda, onyń 30-y sheteldik ınvestorlardyń qatysýymen, onyń ishinde 9-y transulttyq kompanıa. Sonyń biri «Mareven Fýd» zaýyty. Ol jergilikti shıkizattan tamaq ónimderin shyǵarýǵa arnalǵan. 500 adamdy jumyspen qamtamasyz etetin óndiristiń jyldyq kólemi 24 mlrd. teńgeni quraıdy, onyń 80% -y «Made in Kazakhstan» brendimen eksporttalatyn bolady.
Elimizde «7-20-25» baǵdarlamasy bastaldy, alaıda bizdi áli kúnge deıin satyp alýshylardyń tolyq pýly qalyptastyrylmaǵan. Ekinshi deńgeıli bankter somasy 849 mln.teńgege 73 ótinim ǵana qabyldaǵan, onyń 53-i maquldanyp, 4 páter berilgen. Sondaı-aq, «Nurly jer» baǵdarlamasy sheńberinde jaldamaly jáne nesıelik turǵyn úılerdiń iske qosylýyn ulǵaıtý qajet. Oblys ákiminiń orynbasarlary L. Turlashov pen A.Baıjanovqa turǵyn úı salý úshin jeke ınvestorlar tartý máselesin pysyqtaýdy, sondaı-aq jeńildetilgen ıpoteka boıynsha alǵashqy jarnany ishinara sýbsıdıalaý boıynsha usynys engizýdi tapsyramyn, – dedi oblys basshysy.
Oǵan qosa jıyn barysynda polısıa qyzmetiniń jumysyn jetildirý, medısına salasyn sıfrlandyrý, búdjettik qyzmetkerlerdiń jalaqysynyń ósýine baılanysty qajetti qarjyny 2019 jyldyń búdjetinde qarastyrý, turǵyn úı-kommýnaldyq sharýashylyq pen tabıǵı monopolıalar qyzmetteri úshin tarıfterdiń belgilenýi men jınalǵan qarjyny jumsaýdyń ashyqtyǵyn qamtamasyz etý, týrızmdi damytý boıynsha arnaıy uıym qurý týraly usynys engizý, bir aı merziminde memlekettik apparatta ońtaılandyrý júrgizip, kelesi jyldyń basynan eńbekaqy tóleýdiń jańa modelin engizý, oblys ekonomıkasyna ınvestorlar tartý, «Nurly jol» jáne «Nurly jer» baǵdarlamalaryn iske asyrý merziminiń 2025 jylǵa deıin uzartylýyna oraı eldi mekenderdiń perspektıvalyq damý josparlaryn eskere otyryp, qosymsha ınfraqurylymdyq jobalar tizbesin qurý júkteldi. Sonymen qatar kelesi jyldyń Jastar jyly bolyp jarıalanýyna jáne "Aýyl – El besigi" arnaıy jobasynyń iske qosylýyna baılanysty da mindetter aıqyndaldy.
Baljan QAIRATQYZY, Almaty oblysy.
