Sátpaevtyń sózinshe, órkeniettiń kósh basynda turǵan 30 eldiń qosynyna ilingisi kelse, bilik óziniń halyqpen jumys isteý tásilin ózgertýi qajet.
«Sóz emes, áreket kerek. Bilik naqty ne bitirdi osy kúnge deiin? Halyqqa paidaly qandai qareket qyldy? Jurttyń jaǵdaiyn jaqsaratyn, turmysyn túzeitin nendei shara qabyldady? Halyqqa keregi osy», – deidi ol.
Aitýynsha, dál osy otyzdyqta júrgen elderdiń basym kópshiliginde bir sózdiń tońyn teris aýdaryp jyl saiyn qaitalai beretin «dástúr» joq.
– Dál solai. Damyǵan elderdiń biligi jurtqa oryndaǵan ýádesi, atqarǵan isimen jaǵady. Halyq qur sózge aldanbaidy, sebebi. Qur sózdi mise tutpaidy olar.
Bularda «aitylǵan sóz, atylǵan oq». Ózi sailaǵan sheneýniktiń sailaýaldy ýádelerin oryndap, jarǵaq qulaǵy jastyqqa timei jumys isteýin talap etedi. Bilikten bolbyr sóz emes, bolatyn is kútedi.
Suralatyn kez kelgende: «Ótkendegi sertiń qaida? Sailaý aldynda bergen ýádeńdi nege sozdyń? Sózderiń nege suiylyp ketti?» dep jaǵasynan alady, – deidi Dosym Sátpaev.
Onyń pikirinshe, jyl saiyn bir máseleniń óńin ózgertip, myń qubyltýdyń qajeti shamaly.
– Qaitalai bergennen múiiz shyqsa, káni? Memlekettik mańyzy bar máselelerdi 3-4 jylda bir ret qorytyp, qaiyra oralyp otyrǵanymyz jón emes pe? Sonyń ózi jetkilikti emes pe? Odan da olardyń oryndalý barysyn baqylaiyq. Halyqtyń aqshasy men ýaqytyn qur bosqa shashqan memlekettiń organdardyń máselesin mai shammen qaraiyq, – deidi saiasattanýshy.
Al Memleket basshysynyń bul jolǵy joldaýyn Sátpaev ádettegi joldaýdan bólek deidi.
– Maǵan salsa muny joldaý dep te aitpas edim. Prezident Úkimet basshysynan bastap ministrlerge deiin bir-bir silkilep aldy. Kemshilikteri men qatelikterin betterine salyq qylyp basty
Muny joldaý emes, Memleket basshysy qatysatyn Úkimettiń jumys otyrysyna kóbirek uqsattym. Ádette mundai jiynda Nazarbaev jalqaýsyp, salaqsyp ketkenderdi bir sybap alatyn. Bul joly da solai boldy. Prezident júktegen sharýany shashyratyp alǵan shendi-shekpendiler sóz estidi, – deidi ol.
Sátpaevtyń aitýynsha, bul jaqsy úrdis.
– Nazarbaev Joldaýda atap kórsetilgen mindetterdi keiinge qaldyrmai der ýaqytynda oryndaýdy tapsyryp otyr. Osy sebepti de Úkimetbasyny, sala ministrlerin ornynan turǵyzyp ózi talai ret toqtalǵan, talai ret tarazyǵa tartqan tapsyrmalardy tiianaqtaityn kez jetkenin aitty. Prezident tarapynan kópten beri syn estimei bosańsyp ketsen úkimettegiler úshin bul jaqsy sabaq boldy, – deidi saiasattanýshy.
Bul joly da talaidan beri túiini tarqatylmaǵan – biznesti qoldaý, áleýmettik salaǵa bólinetin aqshany kóbeitý, mem.organdardyń jumysyn júrdektetý, olardyń tiimdiligin arttyrý máselesi sóz boldy.
– Prezident eń tómengi jalaqynyń mólsherin kóterý týraly tapsyrma berdi. Degenmen, munyń oryndala qoiaryna kúmánim kóp. Kúni keshe Ulttyń bank tóraǵasy antireseilik sanktsiianyń kesirinen aldaǵy jyly infliatsiianyń josparlaǵan dálizden asyp jyǵylaryn aitty ǵoi
Bul baǵa ósedi, qymbatshylyq qysady degendi bildiredi. Tiisinshe, Úkimettiń áleýmettik shyǵyndary kóbeiedi. Bilik bul jaǵdaida ózgerte alsa bir jón, Batys sanktsiialary men qara altynnyń qunyna qarsy Qazaqstan esh qairan qyla almaidy», – deidi Sátpaev.
Daiyndaǵan, Dýman BYQAI
