Memleket jáne qoǵam qairatkeri, Qazaqstan Ulttyq ǵylym akademiiasynyń akademigi Myrzatai Joldasbekov Astananyń alǵashqy qalyptasý jyldary týraly esteligin bólisti, dep habarlaidy dalanews.kz.
Ǵalymnyń aitýynsha, ol 2000 jyly arnaiy shaqyrtýmen Astanaǵa kóship kelgen. Sodan beri shirek ǵasyrǵa jýyq ýaqyt ishinde elordanyń qalai boi kóterip, úlken qalaǵa ainalǵanyna kýá bolǵan.
Myrzatai Joldasbekov bul týraly Astana qalasy ákimdiginiń "Rýhaniiat" kommýnaldyq memlekettik mekemesine bergen suhbatynda aitty.
Suhbat barysynda akademik elordany damytý kezeńindegi jumys qarqyny men Nursultan Nazarbaevtyń Astanaǵa qatysty jospary týraly sóz qozǵady.
"Jaǵalaýda "Pioner úii" degen bar, basqa baratyn jer joq. Sol jyly Prezident memleket qyzmetindegi, elge eńbegi sińgen adamdardyń bárin shaqyrdy. Astananyń keleshegi týraly áńgime qozǵady. Sol jaǵalaýda túk joq, jylan jalaǵandai edi. Sol jerde turyp, Nurekeń "anaý bolady, mynaý bolady" dep bárin jyrdai qylyp aitty. Ishimnen "sóz degen aityla beredi eken ǵoi, munyń bárin kim isteidi, qashan bolady?" dep oiladym. Al qazir qarasań, qala ósip barady", – dedi ol.
Myrzatai Joldasbekovtiń sózinshe, Astananyń qazirgi kelbeti – úlken eńbektiń nátijesi.
"Statistikaǵa qarasam, Astananyń halqy 2 millionnan asypty. Buǵan deiin tas úi salǵandy kórdik, zaýyt salǵandy kórdik. Biraq qala salǵandy, onyń ishinde Astana salǵandy kórgenimiz joq. Bul ǵasyrda biz siiaqty astana salǵan memleket joq. Sol jaǵalaýda qazir kúni-túni adam kóp. Jastardyń júrgen jeri – oiyn-kúlki, toi. Bul – jaqsylyqtyń belgisi", – dedi akademik.
