Búgin Taldyqorǵandaǵy Iliias Jansúgirov atyndaǵy Jetisý ýniversitetinde Italiianyń Marke politehnikalyq ýniversiteti (Marche Polytechnic University) filialynyń kampýsy resmi túrde ashyldy. Bul sharaǵa Jetisý oblysynyń ákimi Beibit Isabaev, QR Ǵylym jáne joǵary bilim ministri Saiasat Nurbek, Italiianyń Qazaqstandaǵy Tótenshe jáne Ókiletti Elshisi Antonello De Riý, sondai-aq, italiialyq jáne jergilikti ǵalymdar, stýdentter qatysty,- dep habarlaidy Dalanews.kz
Marke politehnikalyq ýniversitetiniń filialy Memleket basshysy Qasym-Jomart Toqaevtyń elimizde jetekshi sheteldik joǵary oqý oryndarynyń filialdaryn ashý týraly tapsyrmasyna sáikes óńir ereksheligin eskere otyryp, I. Jansúgirov atyndaǵy Jetisý ýniversitetiniń bazasynda ashylǵan bolatyn. Qazirgi tańda filial «Agronomiia» – «Aýyl sharýashylyǵy ǵylymdary men tehnologiialary» qosdiplomdy bilim berý baǵdarlamalaryn júzege asyrý boiynsha jumys júrgizýde.
"Jetisý oblysynda sheteldik joǵary oqý orny filialynyń ashylýy bizdiń jastarymyz úshin zor múmkindik, sonymen qatar óńirimizdiń agrarlyq sektoryn jańa deńgeige kóterýge serpin beretin mańyzdy bastama. Jetisý – agrarly aimaq bolǵandyqtan, osy salaǵa jańa innovatsiialar men ozyq agrotehnologiialardy engizetin myqty mamandar qajet. Birlesken jobamyz óńirdiń kadrlyq áleýetin arttyryp, eki el arasyndaǵy dostyq qarym-qatynasty odan ári damytýǵa úlken úles qosady dep senemin", - dedi B. Isabaev.
Bul rette «Agronomiia – Aýyl sharýashylyǵy ǵylymdary men tehnologiialary» qos diplomdyq baǵdarlamasy boiynsha oblys ákimdigi bastapqy kezeńde 14 bilim berý grantyn bólip otyr.
Jiynda Ǵylym jáne joǵary bilim ministri Saiasat Nurbek quttyqtaý sóz sóilep, Qazaqstanda eń myqty sheteldik ýniversitetter filialdaryn ashýdyń mańyzyna toqtaldy:
- Máselen, búginde óńirlerde jylyjai sharýashylyǵy damýda. Jylyjailardyń joǵary tehnikalyq deńgeiin qamtamasyz etetin, tsifrlyq platformalaryn, jylyjaidyń jalpy jumysyn júrgizetin mamandar kerek. Sondyqtan jýyrda Taldyqorǵanǵa italiialyq taǵy alty bilgir professor keledi, sóitip agronomiia salasyndaǵy baǵdarlamany iske asyramyz. Aldaǵy ýaqytta magistratýra, doktorantýra oqytý baǵdarlamasyn iske qosý josparda bar, - dedi ministr.
Sol siiaqty Italiianyń Qazaqstandaǵy Tótenshe jáne Ókiletti elshisi Antonello De Riý myrza da bul bastama eki el arasyndaǵy bilim-ǵylym salasyndaǵy bailanystardy nyǵaita túsetin mańyzdy qadam ekenin jetkizdi.
Munan soń resmi qonaqtar kampýstyń ishin aralap, túrli zerthanalarmen, dáris aýditoriialarymen tanysty. Munda filial qabyrǵasynda júrgizilip jatqan agrarlyq saladaǵy birqatar zertteý jobalary tanystyryldy.
Basqarma tóraǵasy - ýniversitet rektory, zań ǵylymdarynyń doktory, professor Ermek Býribaevtyń aitýynsha, Marke politehnikalyq ýniversitetiniń filialynda aldaǵy ýaqytta taǵam injereniiasy, týrizm, ekonomika jáne tsifrlyq tehnologiialar boiynsha bilim berý baǵdarlamalary ashylatyn bolady. Qazirgi kezde Marke politehnikalyq ýniversitetiniń qyzmetkerleri oqytýshylyq qyzmetke tartylyp otyr. Sheteldik ǵalymdar Sara Ruschioni «Agricultural entomology and zoology» (Aýyl sharýashylyǵy entomologiia jáne zoologiiasy), Luca Mazzoni «Fruticulture» (Jemis sharýashylyǵy) boiynsha dáris oqyp, alǵashqy praktikalyq sabaqtaryn júrgizýde.
Munda bilim alyp, oqýdy sátti aiaqtaǵan stýdentterge aýyl sharýashylyǵy ǵylymdary men tehnologiialary salasyndaǵy bakalavr dárejesin taǵaiyndaityn italiialyq jáne aýyl sharýashylyǵy salasyndaǵy bakalavr dárejesin taǵaiyndaityn qazaqstandyq diplom beriledi. Sondai-aq, túlekter birlesken ǵylymi zertteýler júrgizýge, halyqaralyq tájiribe almasý múmkindigine ie bolady.
"Men Marke politehnikalyq ýniversiteti filialynda «Agronomiia jáne aýyl sharýashylyǵy tehnologiialary» mamandyǵy boiynsha 3-kýrsta oqimyn. Bizge sheteldik oqytýshylar dáris beredi. Filial bazasynda túrli zamanaýi qural-jabdyqtar ornatylǵan. Dáristerimiz ben tájiribe sabaqtarynda olardy paidalanyp, bilimimizdi shyńdap jatyrmyz. Sonymen qatar bizde ártúrli onlain kýrstar júredi, sonyń ishinde italian tilin úiretý, Eýropaǵa barar aldyndaǵy beiimdelý kýrstary da bar. Osy oqý ornynda bilim alyp júrgenime qýanamyn", - deidi stýdent Malika Arynova.
