Almaty áýejaıynda áıeldi kepilge alǵan azamatqa qatysty sot úkimi shyqty, dep habarlaıdy Dalanews.kz.

Almatyda 7 naýryz kúni áýejaıda áıeldi kepilge alǵan Mashrapbek Baratovqa sot úkimi shyqty. Ol úsh bap boıynsha jaýapqa tartyldy: adamdy kepilge alý, qarý qoldana otyryp buzaqylyq jasaý jáne terorızm aktisi týraly jalǵan habar taratý. Sot prosesi sáýir aıynda bastalǵanymen, zańbuzýshylyqtar anyqtalǵan soń is prokýrorǵa qaıta joldanǵan.

Sot Baratovty barlyq aıyp boıynsha kináli dep tanyp, 11 jylǵa bas bostandyǵynan aıyrý jazasyn kesti.

Eske salaıyq, naýryz aıynda belgisiz er adam Almaty áýejaıynda qyzmetker áıelge pyshaqpen shabýyl jasaǵan. Telegram messendjerinde onyń áıeldi shashynan tartyp, qorqytyp turǵan sáti túsirilgen vıdeo tarady. Qolynda pyshaǵy bar er adamǵa belgisiz bir azamat arasha túsip, qyzdy bosatýdy surap, óz erkimen kepilge barǵan bolatyn.