Premer-ministr Oljas Bektenov Perizat Qairat isine qatysty pikir bildirdi, dep habarlaidy Dalanews.kz.
Úkimet basshysynyń sózinshe, biýdjet aqshasynan bólek, halyqtan qaiyrymdylyq úshin jinalǵan aqsha da qoldy bolyp ketip jatyr.
"Perizat Qairattyń isi soǵan dálel. Biraq Bektenov budan da asqan jaǵa ustatarlyq jaǵdailar baryn aitady. Mundai keleńsizdikterdi tiiý úshin, ashyqtyq pen baqylaý kúshti bolý qajet dep esepteidi. Bul rette Úkimet pen quqyq qorǵaý organdary zańǵa túzetýler engizý úshin usynystar beredi degen úmittemin", - dedi premer.
Eske salaiyq, kúni keshe 14 shildede Perizat Qairat pen anasyna qatysty basty sot otyrysy bastaldy. Astanadaǵy sotta prokýrorlar Perizat Qairattyń sý tasqynynan zardap shekken qazaqstandyqtarǵa kómek retinde jinalǵan aqshany qalai iemdengeni jónindegi tergeý nusqasyn jariia etti.
"Tabiǵi apat saldarynan qoǵamda haos pen emotsiialar beleń alyp jatqan tusta adamdar aldaýǵa beiim bolatynyn túsine otyryp, Perizat Qairat pen Ǵaini Alashbaeva ózge adamdarmen aldyn ala sóz bailasa otyryp, qaiyrymdylyq kómek kórsetý syltaýymen halyqtyń senimin teris paidalanyp, aqshalai qarajatty alaiaqtyq jolmen jymqyrý týraly jańa qylmystyq nietke barǵan", – dedi prokýror Arman Kezeken.
Perizat Qairat osy syltaýmen 2,8 mlrd teńge qarajat jinaǵan. Tergeý nusqasyna sai, sonyń 1,9 mlrd teńgesin aiyptalýshylar jeke maqsatqa jumsaǵan, al 920 mln teńge ǵana shynymen zardap shekkenderge kómektesý úshin paidalanylǵan.
