پرەمەر-مينيستر ولجاس بەكتەنوۆ پەريزات قايرات ىسىنە قاتىستى پىكىر ءبىلدىردى، دەپ حابارلايدى Dalanews.kz.
ۇكىمەت باسشىسىنىڭ سوزىنشە، بيۋدجەت اقشاسىنان بولەك، حالىقتان قايىرىمدىلىق ءۇشىن جينالعان اقشا دا قولدى بولىپ كەتىپ جاتىر.
"پەريزات قايراتتىڭ ءىسى سوعان دالەل. ءبىراق بەكتەنوۆ بۇدان دا اسقان جاعا ۇستاتارلىق جاعدايلار بارىن ايتادى. مۇنداي كەلەڭسىزدىكتەردى تيۋ ءۇشىن، اشىقتىق پەن باقىلاۋ كۇشتى بولۋ قاجەت دەپ ەسەپتەيدى. بۇل رەتتە ۇكىمەت پەن قۇقىق قورعاۋ ورگاندارى زاڭعا تۇزەتۋلەر ەنگىزۋ ءۇشىن ۇسىنىستار بەرەدى دەگەن ۇمىتتەمىن"، - دەدى پرەمەر.
ەسكە سالايىق، كۇنى كەشە 14 شىلدەدە پەريزات قايرات پەن اناسىنا قاتىستى باستى سوت وتىرىسى باستالدى. استاناداعى سوتتا پروكۋرورلار پەريزات قايراتتىڭ سۋ تاسقىنىنان زارداپ شەككەن قازاقستاندىقتارعا كومەك رەتىندە جينالعان اقشانى قالاي يەمدەنگەنى جونىندەگى تەرگەۋ نۇسقاسىن جاريا ەتتى.
"تابيعي اپات سالدارىنان قوعامدا حاوس پەن ەموسيالار بەلەڭ الىپ جاتقان تۇستا ادامدار الداۋعا بەيىم بولاتىنىن تۇسىنە وتىرىپ، پەريزات قايرات پەن عايني الاشبايەۆا وزگە ادامدارمەن الدىن الا ءسوز بايلاسا وتىرىپ، قايىرىمدىلىق كومەك كورسەتۋ سىلتاۋىمەن حالىقتىڭ سەنىمىن تەرىس پايدالانىپ، اقشالاي قاراجاتتى الاياقتىق جولمەن جىمقىرۋ تۋرالى جاڭا قىلمىستىق نيەتكە بارعان"، – دەدى پروكۋرور ارمان كەزەكەن.
پەريزات قايرات وسى سىلتاۋمەن 2،8 ملرد تەڭگە قاراجات جيناعان. تەرگەۋ نۇسقاسىنا ساي، سونىڭ 1،9 ملرد تەڭگەسىن ايىپتالۋشىلار جەكە ماقساتقا جۇمساعان، ال 920 ملن تەڭگە عانا شىنىمەن زارداپ شەككەندەرگە كومەكتەسۋ ءۇشىن پايدالانىلعان.
