Jetisý óńiri Polshamen bailanysy nyǵaimaq
Resmi delegatsiiany jyly qabyldaǵan oblys ákimi A. Batalov olardy óńirdiń áleýmettik-ekonomikalyq damý jaiynan habardar etti. Ásirese, oblystyń investitsiialyq tartymdylyǵyna, týristik áleýettiń moldyǵyna erekshe ekpin túsirdi.
– Jetisý jerine qosh keldińizder! Almaty oblysy – respýblikanyń klimaty qolaily, tabiǵaty kórkem, tabiǵi resýrstarǵa bai, investitsiialyq potentsialy joǵary ólkesi. Oblys agrarlyq salaǵa negizdelgenimen, óndiristiń damýyna, sonyń ishinde aýylsharýashylyǵy ónimderin óńdeý isine de erekshe basymdyq bere bastadyq. Aimaqtaǵy iri óndiris oryndarynan «Fýd master», «Danon Berkýt», «Koka Kola Botlers» jáne basqa da álemdik brend ónimderi bar. Oblysqa investorlar tartý maqsatynda qolaily investitsiialyq klimat qalyptastyrýǵa, naqtyraq aitqanda «Qorǵas» HShYO men «Qorǵas – Shyǵys qaqpasy» AEA bazalaryna, sol siiaqty oblystaǵy indýstrialdy aimaqtar men óndiristik alańdarǵa jobalar tartýǵa talpynyp jatyrmyz. Atap ótsek, óńirde asa mańyzdy investitsiialyq jobalar júzege asyryla bastady, sonyń 9-y iri transulttyq kompaniialardyń qatysýymen atqarylýda, – dedi A. Batalov. Sondai-aq óńir basshysy Polsha Respýblikasynyń Liýblin voevodtyǵynyń delegatsiiasymen kezdesý budan ári ekijaqty yntymaqtastyqqa jańa serpin beretinine senim bildirdi. Bailanystar buǵan deiin bastalyp, ótken jyldan beri Almaty oblysynda az qamtylǵan otbasynan shyqqan 17 stýdent Liýblinniń Ekonomika jáne innovatsiia joǵarǵy mektebinde tegin oqyp jatqanyn sóz etti.
Óz kezeginde Liýblin voevodtyǵynyń malshalegi Liýblindegi stýdentterdiń sapaly bilim alýlaryna barlyq jaǵdailar jasalǵanyn atap ótti.
Munan soń Slavomir Sosnovski aldaǵy yntymaqtastyq joldary, sonyń ishinde aýyl sharýashylyǵyndaǵy, bilim berý, meditsina, jihaz jasaý siiaqty salalarda tájiribe jáne tehnologiia almasý týraly oiyn ortaǵa saldy.
Jiyn sońynda Almaty oblysy ákimi men Polsha respýblikasy Liýblin voevodtyǵynyń marshalegi arasynda yntymaqtastyq týraly memorandýmǵa qol qoiyldy. Taraptar bul memorandýmnyń eki el óńirleri arasyndaǵy tájiribe almasýdy jandandyryp, kásipkerlik, mádeniet jáne jastar isi salasynda sátti jobalardy júzege asyrýǵa negiz bolatynyn atap ótti.
Kezdesýden keiin resmi delegatsiia Taldyqorǵandaǵy Kórme kesheninde bolyp, Almaty oblysy taýar óndirýshileriniń kórmesimen tanysty. Qonaqtardyń nazaryna ekonomikanyń barlyq salalarynda – qurylys, ónerkásip, aýylsharýashylyǵy, farmatsevtika, qoǵamdyq tamaqtaný jáne basqa da salalaryndaǵy jetistikter usynyldy.
Delegatsiia músheleri, ásirese «Qainar AKB» zaýytynyń ónimderine erekshe qyzyǵýshylyq tanytty. Polshalyqtar óz elderinde avtokólikterge arnalǵan elektrli batareialar óndirýdi qolǵa alý oilarynda bar ekenin, eger osy baǵytta óndiris jolǵa qoiylatyn bolsa, taldyqorǵandyqtarmen tájiribe almasýǵa nietti ekendikterin jetkizdi.
Osy kúni poliaktar Taldyqorǵandaǵy Saltanat saraiynda ótken investorlardyń óńirlik keńesine qatysty. Jiynda qos tarap ta óz múmkindikterine, damý baǵyttaryna keńinen toqtaldy.
Oblysta áleýetti investorlarǵa jasalatyn jaǵdailar týraly oblys ákiminiń orynbasary Jeńis Tuiaqov aityp berdi. Biznes-qaýymdastyq ókilderi de sóz alyp, oilaryn ortaǵa saldy. Olardyń qatarynda «Apple word» kompaniiasynyń bas direktory B. Kúntaev, «Abdi Ibrahim Global Farm» kompaniiasynyń bas direktory Z. Gasanov ta bar. «Qorǵas» HShYO aýmaǵynda júzege asyrylyp jatqan jobalar, aýmaqty damytý josparlary týraly «Qorǵas» HShYO» AQ prezidenti Qaharman Jazin baiandady.
Polsha delegatsiiasy atynan Liýblin voevodtyǵynyń Ekonomika jáne halyqaralyq yntymaqtastyq departamentiniń qyzmetkeri Magda Olifirovich sóilep, óńirdiń áleýmettik-ekonomikalyq damýy týraly aitty.
Ózara pikir almasqan qos tarap mundai kezdesý jańa múmkindikterge, jańa jobalarǵa, yntymaqtastyqty nyǵaitýǵa jol ashatynyn jetkizdi. Jiyn sońynda Taldyqorǵan qalasyndaǵy kóp salaly aýrýhana men Biala Podliaskadaǵy voevodtyqtyń mamandandyrylǵan aýrýhanasy arasynda ózara yntymaqtastyq týraly memorandýmǵa qol qoiyldy. Keńesti qorytyndylaǵan oblys ákimi A. Batalov:
– Búgingi kezdesý barysynda eki óńirdiń arasynda uqsastyqtar óte kóp ekenine taǵy bir ret kóz jetkizdik. Ózara yntymaqtastyqtyń naqty baǵyttary belgilendi. Bizdi ásirese voevodtyqta óndiriletin aýyl sharýashylyǵy tehnikalary qyzyqtyrdy. Sonymen qatar jemis-jidek óńdeýdegi, jihaz jasaýdaǵy jańa tehnologiialar da nazar aýdarýǵa turarlyq. Al bizde «Qorǵas» HShYO men «Qorǵas – Shyǵys qaqpasy» AEA aýmaǵynda investorlarǵa qolaily jaǵdailar jasalǵan. Máselen, Liýblin voevodtyǵynan saýda úiin ashýǵa múmkindigimiz bar. Jalpy búgingi kezdesýde paidaly pikir almasý boldy dep oilaimyn, – dedi.
