Halyk Bank Qytaidyń tanymal WeChat — QR WeChat messendjerin qoldana otyryp, qolma-qol aqshasyz tólem jasaýdyń jańa ádisin iske qosty. Endi qazaqstandyq kásipkerler WeChat Pay qosymshasynda banktiń POS-terminaldarynda skanerlenetin ámbebap QR-kod arqyly Qytai azamattarynan tólemder qabyldai alady, dep habarlaidy Dalanews.kz.
Qytailyq týristerge, qazaqstandyq saýdagerlerge de jaqsy
Tólem jasaý úshin smartfonnan WeChat Pay-dy ashyp, QR kodty skanerlep, tranzaktsiiany rastaý jetkilikti. Tólemder Halyk Bank protsessingi arqyly tikelei júzege asyrylady, bul joǵary jyldamdyqqa, qaýipsizdikke jáne qosymsha tólemderdiń alynbaýyna kepildik beredi.
"Biz qytailyq týristerge taýarlar men qyzmetterdi esepteýdiń tanys jáne qoljetimdi ádisin usyna otyryp, tólem jasaýdy jeńildetýge tyrysamyz", — deidi banktegiler.
Qyzmet qazirdiń ózinde elimizdiń birqatar saýda núktelerinde sátti qoldanylýda. Ony qosý úshin kásipkerge Halyk Bank-ten ashqan esep aiyrysatyn shoty men POS-terminal bolýy qajet.
Aita ketsek, WeChat Pay - Qytaidaǵy eń tanymal tsifrlyq tólem sheshimderiniń biri. 2023 jyly platformanyń belsendi paidalanýshylary bir aida 900 millionnan asty, al WeChat ekojúiesinde búkil álem boiynsha 1,3 milliardtan astam qoldanýshy bar. Bul servis qyzmetine iri kompaniialar, sol sekildi jeke saýdagerler tarapynan da suranys joǵary.
Saýda soǵysy jaǵdaiynda Qytai taýarlary Qazaqstanǵa lap qoiýy múmkin be?
Jalpy, qazir tarifter qaqtyǵysy jaǵdaiynda mamandarmen álemdik ekonomikanyń retsessiiaǵa túsýi, Qytai ekonomikasynyń báseńdeýi boljanýda. Eń bastysy, tarif qaqtyǵysy degen buryn mejeli taýar jetkizilim baǵyttaryn buzyp-jarýda. Máselen, 145 paiyzdyq baj salyǵynan soń Qytaiǵa AQSh-qa taýar eksporttaý tiimsiz bolyp qalýda. Taǵysyn taǵy degendei. Iaǵni, buǵan deiingi álem elderi taýarlarynyń aiqyn jetkizilim baǵyty qazir qiian-keski túsiniksiz jaǵdaiǵa ushyraýda. Sonyń ishinde "Qytai AQSh-qa ótpegen óz taýaryn Qazaqstanǵa laq etkizýi múmkin be" degen qaýip te bar. Qalai degenmen de iri óndirýshimen irgede otyrǵandyqtan Qazaqstanǵa, árine mundaida qol jaiyp qarap otyrýǵa bolmaidy. Saýda quraldaryn óristetý mańyzdy. AQSh Qytai taýarlary qozǵalysyn "buǵattap", barlyq esikti jabýǵa tyrysyp jatqanda, árine jaǵrafiialyq jaǵynan yńǵaily ornalasqan Qazaqstan basqa álem úshin urymtal "tereze" ispetti kórinýi múmkin. Árine, osy jaǵynan alǵanda, onlain-saýda, tsifrlyq tólem quraldaryn óristetý arqyly bul múmkindikti utymdy paidalanýymyzǵa bolady. Biraq, munyń artynda ekspantsiia turǵanyn umytpaǵan jón. Mamandar da Qytaidan Qazaqstanǵa eksporttalatyn taýarlar kólemi alda keminde 20 paiyzǵa artatynyn boljaýda. Mundaida tutynýshyǵa jaqsy, baǵa tómendeidi, al otandyq óndirýshiler úshin óte qiyn, básekelestik kúsheiedi.
Qazaqstan onsyz da Qytaimen "Bir beldeý – bir jol" bastamasy sheńberinde tyǵyz ekonomikalyq bailanysta. Jaǵrafiialyq jaǵynan da Qazaqstan qytai eksportynyń potentsialdy benefitsiary ispetti. Eki el arasyndaǵy tranzit jyldan jylǵa artyp keledi: Qorǵas qurǵaq porty, Altynkól temirjol dálizi jáne "Batys Eýropa – Batys Qytai" joldary arqyly. Al, 2024 jyldyń qorytyndysy boiynsha Qazaqstan men Qytai arasyndaǵy taýarainalym kólemi 43,8 mlrd dollardy quraidy.
Eń bastysy, búginderi Qazaqstan sheteldik saýda onlain-platformalarǵa Qazaqstanda tirkelýdi mindettep, alym-salyq tólete alýda. Biraq olardyń qyzmetterine táýeldi bolý da jaqsylyqqa apairmaidy. Sondyqtan bizge ózindik elektrondy saýda alańdaryn quryp, tólem quraldaryn óristetkeni abzal.
Qazaqstanǵa Qytai taýarlary ǵana emes, qyzmetterdiń de kelý yqtimaldylyǵy joǵary
Sondai-aq bul arada týrist sózi de bekerden beker aitylmai otyr dep oilaimyz. Óitkeni Qytaida adamdar jumysyn tsifrlyq ónimder basqaly qai zaman? Iaǵni, kóp jumysty aspan asty elinde qultemirler atqarady. Onyń ústine ekonomika baiaýlap, taǵy jumys oryndary qysqarsa, taýarmen qosa adamdardyń ózi de elimizge jetip alýy ǵajap emes. Máselen, búginderi halqy tyǵyz Almatyda taksi bolyp júrgen Qytai azamattaryn kezdestirýge bolady. Olar qurylys salasynda da tóbe kórsete bastapty.
Qurylys naryǵyndaǵy qyzmet baǵasy túsip ketkenin bizge aitqan almatylyq brigadir Talǵat bul jaitty rastaidy. Onyń aitýynsha, baǵanyń túsýine syrttan kelgen jumysshy kúshiniń áseri bar.
"Sońǵy kezderi tájik azamattar qaptap ketti. Baǵany solar túsirip jatyr. Odan keiin qytailar da bar. Olar baǵany ǵana emes, merzimdi de qysqartýda. Mysaly, meniń brigadam "úsh aida bitiremin" degen jumysty olar bir aida jasaityndaryn aitady. Solai jasaidy da. Óitkeni adamdy qaptatyp jiberedi. Men jumysshy sanyn 10-nan asyra almai jatsam, olar 50 adamdy bir-aq ákelip "tógedi". Sodan keiin de, árine jumystary tez bitedi", - deidi ol.
Osy jaǵynan alǵanda, Halyk Bank qolǵa alyp jatqan shara búgingi kúnniń talabynan týyndaǵan dúnie dep aitsaq ta bolady.
