Jer-jahan indettiń ilmegine ilinip, virýs shartarapty kezip ketken shaqta Otanynan jyraqta ómir súrip jatsa da, eldegi jaǵdaiǵa beijai qarai almaǵan jastarymyz barshylyq.
Bul oraida pandemiia kezinde qazaqstandyq dárigerlerge aqparattyq qoldaý jasaǵan, álemniń túkpir-túkpirinde zertteýmen, ǵylymmen ainalysyp júrgen Qazaqstannyń PhD-qyzdaryn biriktirgen Kzphdgirlsunion eriktiler jobasyn qurǵan Ámina Mirsakievanyń eren eńbegin aitpasqa bolmas.
Ol – «Qazaqstannyń 100 jańa esimi» jobasynyń jeńimpazy, teoriialyq fizik, ǵylymdy nasihattaýshy.
Carl Zeiss nemis kompaniiasynda zertteýshi-ǵalym.
Aita keteiik, atalǵan nemis kompaniiasynda 30 myńnan asa qyzmetker jumys isteidi. Carl Zeiss – EUV-litografiiaǵa arnalǵan qurylǵylardyń bólshekterin jasaityn álemdegi jalǵyz kompaniia.
«Bizdiń uiym pandemiia kezinde ǵalymdardy, dárigerler men meditsinalyq stýdentter men shetelde jumys isteitin nemese oqityn bizdiń eldiń azamattaryn bir maqsat múdde boiynsha biriktirip, kontent quryp, qazaqstandyq dárigerlerge eń zamanaýi aqparattardy, jetekshi eýropalyq meditsinalyq ortalyqtardyń emdeý hattamalaryn, jańa dári-dármekterdiń sipattamalaryn jáne emdeý ádis-tásilderin usynyp, jiberip otyrdyq.
Óitkeni naýqastardyń ómiri úshin kúresip júrgen dárigerlerdiń beldi sheteldik ǵalymdardyń koronavirýs jaily jazǵan maqalalaryn, zertteý jumystaryn izdeitin ýaqyttary bolmady.
Sondyqtan da biz virýsqa bailanysty aqparattardy súzgiden ótkizip, Qazaqstandaǵy aq halatty abzal jandarǵa kómek retinde qamtamasyz etip otyrdyq» deidi ǵalym Ámina.
Qazirgi kezde ol Carl Zeiss kompaniiasynda litografiiada qoldanylatyn qurylǵyǵa arnalǵan materialdar jasap shyǵarýmen ainalysýda. Qarapaiym tilmen aitsaq telefon ne kompiýter siiaqty ártúrli elektronikaǵa arnalǵan chipterdi basyp shyǵaratyn tásil.
Sonymen qatar áleýmettik jelide «Belka i Strelka» podkastyn júrgizedi, ǵylymdaǵy sońǵy jańalyqtardy aityp, kórermenderge jetkizip otyrady. Youtube jobasynda «Baǵdarlamalaý kimge kerek?», «Qyzdar nege kúizeliske kóp túsedi?», «Kúnnen qorǵaý» jónindegi ǵylym», «Geolog qyz metrony qalai soǵady?», «Balamaly otyn», «Qandai tamaq qaýipti?», «Jalǵan ǵylym», «Ǵylymi metriia: Álemde eń aqyldy kim?», «Kosmetikany qalai jasaidy?», Elektrondy jáne jai temekiniń qaisysy qaýiptirek?», «Uly ǵylymi jańalyqty qalai kezdeisoq ashýǵa bolady?», syndy taqyryptyq suraqtarǵa túrli mamandarmen birge jaýap izdeidi.
Bir sózben aitqanda, media salasyna aiaq basyp, ǵylymi jańalyqtardy elge jetkizýde ózindik habarǵa ainalyp keledi.
«Meniń oiymsha, jastar podkasttarǵa qyzyǵýshylyq tanytady.
Jalpy, tyńdaýdy jaqsy kóretinderdiń jáne óte belsendi ómir súretinderdiń bári bir sátte podkasttarǵa keledi dep esepteimin. Munda jas shekteýleri joq. Mazmun sapasyna shekteýler bar shyǵar.
Máselen, eger adam ónerge nemese tarihqa qyzyǵýshylyq tanytsa, onda ol EKO týraly meniń podkastymdy tyńdamaýy múmkin. Sondyqtan da kontent jasaýshylar men, tyńdaýshylar aragidik kezdesip, qandai dúnie qyzyqtyratyny jaily suhbat quryp, pikir almasyp tursa, nur ústine nur bolar edi», – deidi Ámina hanym.
Ǵylymǵa qushtar jan ońtústik astanamyz Almatydaǵy Qazaq-Britan tehnikalyq ýniversitetinde bilim ala júrip, zertteýge qumar boldy, 2-kýrstan bastap zerthanadaǵy ǵylymi izdenisterde belsendilik tanytty.
Atalǵan joǵary oqý ornynda himiia injeneriiasy boiynsha bakalavriat pen magistratýrany bitirdi. Codan soń Shvetsiiadaǵy KTH – Koroldik tehnologiia institýtynyń (Royal Institute of Technology) doktorantýrasyna Material physics salasy boiynsha oqýǵa tústi.
«Men aqyldy bola bastaǵan qoǵamda ómir súrgim keledi. Sol úshin de ǵylymǵa bet burdym. Sebebi tańǵajaiyp álemdi tanyǵym keledi. Jalpy, adamdardyń ǵylymǵa barýynyń jáne onda qalýynyń jalǵyz sebebi osynda shyǵar. Psihologiialyq turǵydan júikege salmaq túsirgenimen, árdaiym, tipti kún saiyn desem artyq aitpaǵanym bolar, jaýaby joq salada jumys isteýge tura keledi. Sol jumbaqty sheshkiń keledi. Ǵylymǵa jańalyq engizý úshin basyńyzdy taýǵa da, tasqa da soǵýyńyz múmkin. Keibiri qiyndyqtarǵa shydamai, kóptegen ǵalymdar basqa salaǵa ketip jatady. Ǵylym ońai emes. Bul óte kúrdeli dúnie» deidi bizdiń keiipkerimiz.
Ámina bolashaqta Qazaqstanǵa kelip, táýelsiz eldiń ǵylymynyń damýyna úles qossam degen armanyn aitty.
Qýanysh Rahmetollauly
