Tarihqa kóz salsaq, ushaqty basqarǵan qazaq qyzdary da bolǵanyn bilemiz. Ekinshi dúniejúzilik soǵysta erler men qatar názik jandylar da jaýǵa qarsy oq boratyp, maidan dalasynda shaiqasqan.
Qazaqtyń batyr qyzy, Halyq qaharmany Hiýaz Dospanova fashist áskerine qynadai tiip, 300-den astam áýe shaiqastaryna qatysyp, sol kezdiń ózinde teńdessiz erligi úshin «qanatty qyz» atanǵan edi.
Búginde beibit ómirde, áskeri salada eńbek etip, názik jandylarǵa tańsyq, tipti er azamattardyń júregi daýalamaityn áskeri ushaqty áýe qalyqtatqan 100 jańa esim jobasynyń jeńimpazy, bizdiń búgingi keiipkerimiz Ardana Botai.
Qazaqtyń qarshadai qyzy Qazaqstan Respýblikasy Qarýly kúshteriniń tuńǵysh áskeri ushqysh qyzy. Ardana bala kezinen áskeri ushqysh bolýdy armandaǵan.
Búginde ol aviiatsiialyq eskadriliadaǵy joiǵyshtyń aǵa ushqyshy. Qazirgi tańda «Sý-ZOSM» jańa býyn joiǵysh ushaǵymen ushyp júr.
Sý - 30SM kópfýnktsionaldy joiǵysh. Áýe kemesi kúndiz-túni kez kelgen aýa raiy jaǵdaiynda ushýǵa qabiletti jáne áýeden barlaýǵa, áýedegi, jerdegi jáne teńizdegi nysanalardy joiýǵa arnalǵan.
Asa manevrli joiǵysh ushaǵyn ushýǵa ruqsat alý úshin ushqyshtar birneshe ai boiy teoriialyq sabaqtardan ótip, arnaiy Sý-30SM trenajerynda jattyǵyp, shtýrman retinde ushyp shyǵady.
Kóptegen synaqtar men emtihandardan sátti ótkennen keiin ǵana, ushaqpen ushýǵa múmkindik alady. Ushqysh qyzymyz oqý-jattyǵýǵa arnalǵan áskeri L-39 ushaǵymen alǵash ret 2018 jyldyń sáýir aiynda ushty. Qazaqstandaǵy áskeri aviatsiianyń jalǵyz áiel ushqyshy Qaraǵandy aviabazasynda qyzmet etedi.
Ardana Botai birneshe ai boiy Taldyqorǵan aviatsiia bazasynda arnaiy daiyndyqtan ótken.
«Men alǵash ushqysh bolamyn dep oqý ornyna kelgende, barlyǵy tańqalǵan bolatyn. Kóp adamdarǵa ersi kórindi. Alaida tańǵalarlyq tabandylyq tanytyp, áiel adam da áskeri ushaqty basqara alatynyn dáleldedim. Qazir eńbegimniń jemisin kórýdemin» deidi batyr qyz Ardana.
Ol bala kezinen ushqysh bolýdy armandaǵan. Osy arman on alty jastaǵy boijetkendi aviatsiialyq ortalyqqa jetelep kelgen. Onda úzdikterdiń biri bolǵan kýrsant aldymen jeńil motorly ushaqtardy júrgizýdi úirenedi. Búgingi kúnge deiin áýede 270 saǵat ushyp úlgergen eken.
Aldaǵy ýaqytta jas ushqyshtarǵa tálimger bolýdy qalaitynyn jetkizdi. Qazaq armiiasy sapynda áskeri qyzmet atqaryp júrgen Ardana Botai ushqysh bolý – bul tek ádemi kórinis pen qiial ǵana emes, saǵattar boiy jattyǵý zalynda tógilgen ter ekenin alǵa tartady.
«Áskeri aviatsiiada júrgen jalǵyz qyz retinde birinshi kezekte jaýapkershilik joǵary turatynyn aitqym keledi. Men ózgelerge úlgi bola alýym kerek. Sebebi men siiaqty ushqysh bolǵysy keletin, bolashaǵyn aviatsiia salasymen bailanystyrǵysy keletin názik jandylarda aramyzdan kórip qalýymyz múmkin.
Sondyqtanda olar talpynysyn meniń eńbegime, jaýapkershiligime, tabandylyǵyma qarap baǵalaidy degen oidamyn» degen óz oiyn bildirdi.
Ardana aldaǵy ýaqytta ushý sheberligin shyndaýǵa ázirlenip júr.
Er azamattyń da júregi daýalap, qolynan kele bermeitin sheberlikti meńgergen arý qazir áýe kóligin ózi basqarady.
Osydan eki jyl buryn áskeri ushaqty basqarýdy úirenip júrgen Ardana Botai bul joly áýe kemesin óz betimen basqarady.
Biylǵy jyldyń tamyz aiynda Qazaqstandaǵy áskeri aviatsiianyń jalǵyz áiel ushqyshy ekipaj komandiri atandy. Óz sheberligin Ardana Botai tájiribelik emtihan barysynda dáleldegen. QR QK Áýe qorǵanysy kúshteriniń bas qolbasshysy, aviatsiia general-leitenanty Nurlan Ormanbetov derbes ushýǵa ruqsat beretin praktikalyq emtihandy qabyldap, oń baǵasyn bergen.
Ardana áýe kemesin óz yrqyna baǵyndyryp qana qoimai, Sý-30SM jaýyngerlik ushaǵynda ekipaj komandiri retinde derbes ushýdy alǵash ret áiel adam retinde Qazaqstan Respýblikasy Qarýly Kúshteriniń tarihynda aty altyn áriptermen jazyldy.
Endi ol kók aspandy baǵyndyrýǵa degen umtylysyn, joiǵysh ushqysh retinde memleketimizdiń áýe shebin kúzetýdegi mindetterdi oryndap, jaýyngerlik aviatsiiadaǵy erlermen teń dárejede kúrdeli mindetterdi atqarmaq.
«Ushaqty jalǵyz basqarý - árbir ushqyshtyń eńbek jolyndaǵy mańyzdy kezeńderdiń biri. Ushqyshtar ortalyǵynda 40 saǵat ushyp, odan keiin azamattyq aviatsiia akademiiasynda júrgenimde ulttyq gvardiiaǵa shaqyryldym, ol jaqta men An-26 ushaǵymen áýege kóterildim. Sý-30SM ushaǵymen jeke ushý men úshin kásibi turǵyda qalyptasýǵa jasaǵan úlken qadam.Al ómirdegi eń basty armanym - ǵaryshty baǵyndyrý», - deidi qazaq qyzdary arasynda tuńǵysh áskeri ushqysh.
Tártip pen tabandylyqtyń arqasynda armanyna qol jetkizgen Ardana Botai kóp jastarǵa úlgi bolmaq.
Qýanysh Rahmetollauly
