تاريحقا كوز سالساق، ۇشاقتى باسقارعان قازاق قىزدارى دا بولعانىن بىلەمىز. ەكىنشى دۇنيەجۇزىلىك سوعىستا ەرلەر مەن قاتار نازىك جاندىلار دا جاۋعا قارسى وق بوراتىپ، مايدان دالاسىندا شايقاسقان.
قازاقتىڭ باتىر قىزى، حالىق قاھارمانى حيۋاز دوسپانوۆا فاشيست اسكەرىنە قىناداي ءتيىپ، 300-دەن استام اۋە شايقاستارىنا قاتىسىپ، سول كەزدىڭ وزىندە تەڭدەسسىز ەرلىگى ءۇشىن «قاناتتى قىز» اتانعان ەدى.
بۇگىندە بەيبىت ومىردە، اسكەري سالادا ەڭبەك ەتىپ، نازىك جاندىلارعا تاڭسىق، ءتىپتى ەر ازاماتتاردىڭ جۇرەگى داۋالامايتىن اسكەري ۇشاقتى اۋە قالىقتاتقان 100 جاڭا ەسىم جوباسىنىڭ جەڭىمپازى، ءبىزدىڭ بۇگىنگى كەيىپكەرىمىز اردانا بوتاي.
قازاقتىڭ قارشاداي قىزى قازاقستان رەسپۋبليكاسى قارۋلى كۇشتەرىنىڭ تۇڭعىش اسكەري ۇشقىش قىزى. اردانا بالا كەزىنەن اسكەري ۇشقىش بولۋدى ارمانداعان.
بۇگىندە ول اۆياسيالىق ەسكادريلياداعى جويعىشتىڭ اعا ۇشقىشى. قازىرگى تاڭدا «سۋ-زوسم» جاڭا بۋىن جويعىش ۇشاعىمەن ۇشىپ ءجۇر.
سۋ - 30سم كوپفۋنكسيونالدى جويعىش. اۋە كەمەسى كۇندىز-تۇنى كەز كەلگەن اۋا رايى جاعدايىندا ۇشۋعا قابىلەتتى جانە اۋەدەن بارلاۋعا، اۋەدەگى، جەردەگى جانە تەڭىزدەگى نىسانالاردى جويۋعا ارنالعان.
اسا مانيەۆرلى جويعىش ۇشاعىن ۇشۋعا رۇقسات الۋ ءۇشىن ۇشقىشتار بىرنەشە اي بويى تەوريالىق ساباقتاردان ءوتىپ، ارنايى سۋ-30سم ترەناجەرىندا جاتتىعىپ، شتۋرمان رەتىندە ۇشىپ شىعادى.
كوپتەگەن سىناقتار مەن ەمتيحانداردان ءساتتى وتكەننەن كەيىن عانا، ۇشاقپەن ۇشۋعا مۇمكىندىك الادى. ۇشقىش قىزىمىز وقۋ-جاتتىعۋعا ارنالعان اسكەري ل-39 ۇشاعىمەن العاش رەت 2018 جىلدىڭ ءساۋىر ايىندا ۇشتى. قازاقستانداعى اسكەري اۆياسيانىڭ جالعىز ايەل ۇشقىشى قاراعاندى اۆيابازاسىندا قىزمەت ەتەدى.
اردانا بوتاي بىرنەشە اي بويى تالدىقورعان اۆياسيا بازاسىندا ارنايى دايىندىقتان وتكەن.
«مەن العاش ۇشقىش بولامىن دەپ وقۋ ورنىنا كەلگەندە، بارلىعى تاڭقالعان بولاتىن. كوپ ادامدارعا ەرسى كورىندى. الايدا تاڭعالارلىق تاباندىلىق تانىتىپ، ايەل ادام دا اسكەري ۇشاقتى باسقارا الاتىنىن دالەلدەدىم. ءقازىر ەڭبەگىمنىڭ جەمىسىن كورۋدەمىن» دەيدى باتىر قىز اردانا.
ول بالا كەزىنەن ۇشقىش بولۋدى ارمانداعان. وسى ارمان ون التى جاستاعى بويجەتكەندى اۆياسيالىق ورتالىققا جەتەلەپ كەلگەن. وندا ۇزدىكتەردىڭ ءبىرى بولعان كۋرسانت الدىمەن جەڭىل موتورلى ۇشاقتاردى جۇرگىزۋدى ۇيرەنەدى. بۇگىنگى كۇنگە دەيىن اۋەدە 270 ساعات ۇشىپ ۇلگەرگەن ەكەن.
الداعى ۋاقىتتا جاس ۇشقىشتارعا تالىمگەر بولۋدى قالايتىنىن جەتكىزدى. قازاق ارمياسى ساپىندا اسكەري قىزمەت اتقارىپ جۇرگەن اردانا بوتاي ۇشقىش بولۋ – بۇل تەك ادەمى كورىنىس پەن قيال عانا ەمەس، ساعاتتار بويى جاتتىعۋ زالىندا توگىلگەن تەر ەكەنىن العا تارتادى.
«اسكەري اۆياسيادا جۇرگەن جالعىز قىز رەتىندە ءبىرىنشى كەزەكتە جاۋاپكەرشىلىك جوعارى تۇراتىنىن ايتقىم كەلەدى. مەن وزگەلەرگە ۇلگى بولا الۋىم كەرەك. سەبەبى مەن سياقتى ۇشقىش بولعىسى كەلەتىن، بولاشاعىن اۆياسيا سالاسىمەن بايلانىستىرعىسى كەلەتىن نازىك جاندىلاردا ارامىزدان كورىپ قالۋىمىز مۇمكىن.
سوندىقتاندا ولار تالپىنىسىن مەنىڭ ەڭبەگىمە، جاۋاپكەرشىلىگىمە، تاباندىلىعىما قاراپ باعالايدى دەگەن ويدامىن» دەگەن ءوز ويىن ءبىلدىردى.
اردانا الداعى ۋاقىتتا ۇشۋ شەبەرلىگىن شىنداۋعا ازىرلەنىپ ءجۇر.
ەر ازاماتتىڭ دا جۇرەگى داۋالاپ، قولىنان كەلە بەرمەيتىن شەبەرلىكتى مەڭگەرگەن ارۋ ءقازىر اۋە كولىگىن ءوزى باسقارادى.
وسىدان ەكى جىل بۇرىن اسكەري ۇشاقتى باسقارۋدى ۇيرەنىپ جۇرگەن اردانا بوتاي بۇل جولى اۋە كەمەسىن ءوز بەتىمەن باسقارادى.
بيىلعى جىلدىڭ تامىز ايىندا قازاقستانداعى اسكەري اۆياسيانىڭ جالعىز ايەل ۇشقىشى ەكيپاج كومانديرى اتاندى. ءوز شەبەرلىگىن اردانا بوتاي تاجىريبەلىك ەمتيحان بارىسىندا دالەلدەگەن. ق ر قك اۋە قورعانىسى كۇشتەرىنىڭ باس قولباسشىسى، اۆياسيا گەنەرال-لەيتەنانتى نۇرلان ورمانبەتوۆ دەربەس ۇشۋعا رۇقسات بەرەتىن پراكتيكالىق ەمتيحاندى قابىلداپ، وڭ باعاسىن بەرگەن.
اردانا اۋە كەمەسىن ءوز ىرقىنا باعىندىرىپ قانا قويماي، سۋ-30سم جاۋىنگەرلىك ۇشاعىندا ەكيپاج كومانديرى رەتىندە دەربەس ۇشۋدى العاش رەت ايەل ادام رەتىندە قازاقستان رەسپۋبليكاسى قارۋلى كۇشتەرىنىڭ تاريحىندا اتى التىن ارىپتەرمەن جازىلدى.
ەندى ول كوك اسپاندى باعىندىرۋعا دەگەن ۇمتىلىسىن، جويعىش ۇشقىش رەتىندە مەملەكەتىمىزدىڭ اۋە شەبىن كۇزەتۋدەگى مىندەتتەردى ورىنداپ، جاۋىنگەرلىك اۆياسياداعى ەرلەرمەن تەڭ دارەجەدە كۇردەلى مىندەتتەردى اتقارماق.
«ۇشاقتى جالعىز باسقارۋ - ءاربىر ۇشقىشتىڭ ەڭبەك جولىنداعى ماڭىزدى كەزەڭدەردىڭ ءبىرى. ۇشقىشتار ورتالىعىندا 40 ساعات ۇشىپ، ودان كەيىن ازاماتتىق اۆياسيا اكادەمياسىندا جۇرگەنىمدە ۇلتتىق گۆاردياعا شاقىرىلدىم، ول جاقتا مەن ان-26 ۇشاعىمەن اۋەگە كوتەرىلدىم. سۋ-30سم ۇشاعىمەن جەكە ۇشۋ مەن ءۇشىن كاسىبي تۇرعىدا قالىپتاسۋعا جاساعان ۇلكەن قادام.ال ومىردەگى ەڭ باستى ارمانىم - عارىشتى باعىندىرۋ»، - دەيدى قازاق قىزدارى اراسىندا تۇڭعىش اسكەري ۇشقىش.
ءتارتىپ پەن تاباندىلىقتىڭ ارقاسىندا ارمانىنا قول جەتكىزگەن اردانا بوتاي كوپ جاستارعا ۇلگى بولماق.
قۋانىش راحمەتوللا ۇلى
