Ǵulama ǵalym, zańǵar tulǵa Qanysh Sátbaevtyń týǵan kúnimen tuspa-tus kelgen Ǵylym qyzmetkerleri kúni merekesinde Memleket basshysy Qasym-Jomart Toqaevtyń tóraǵalyǵymen ǵylym jáne tehnologiialar jónindegi ulttyq keńestiń otyrysy ótti. Atalmysh keńes barysynda el bolashaǵy úshin mańyzdy máseleler kóterilip, talqyǵa salyndy, – dep habarlaidy Dalanews.kz.
Prezidentimiz ózi atap ótkendei, táýelsiz elimiz Qazaqstanda ǵylymǵa jete mán berilmegendikten, elimizdiń burynǵy ǵylymi áleýeti men infraqurylymyn joǵaltyp alǵanymyz ókinishti. Ǵylymnyń jetkilikti deńgeide júzege aspaýy, ǵalymdardyń tartylmaýynyń saldaryn el óńirlerinde oryn alǵan tótenshe jaǵdai – sý tasqynynan kórinip jatqany belgili.
El basshysy Qasym-Jomart Toqaev otyrys barysynda elde bilikti mamandar men ǵalymdardyń tapshylyǵy aiqyn sezilip otyrǵanyna nazar aýdaryp, otandyq ǵylymdy damytýǵa qatysty birqatar ózekti másele kóterdi. Osy turǵyda otyrys barysynda Prezident eń aldymen aldaǵy ýaqytta atqarylýǵa tiis tómendegidei salmaqty máselelerdi sóz ete otyryp, arnaiy mindetter tarsyrdy:
- Tótenshe jaǵdaidyń aldyn alý isindegi olqylyqtar. Buǵan sebep – bilikti mamandardyń tapshylyǵy jáne ǵylymi jumystardyń sapasyzdyǵy. Osy olqylyqtardy retteý úshin aldymen oqý ornyn materialdyq-tehnikalyq turǵydan tolyq jabdyqtaý arqyly Tarazdaǵy gidromeliorativtik-qurylys institýtyn qaita qalpyna keltirý.
- Seismologiia institýtynyń ǵylymi áleýetin arttyrý, seismologiiany jáne seismikalyq rejimdi baqylaý quraldaryn damytý, sondai-aq Almaty aýmaǵyna arnaiy seismologiialyq zertteý júrgizý.
- Ýniversitetterdegi kadr tapshylyǵy, ǵylymi jumystardyń sapasyzdyǵy.
- Eldegi JOO arasynda óńirlik teńsizdik. Óńirlerdegi kadr tapshylyǵyna jol bermeý maqsatynda joǵary bilimniń birtutas damýyn qamtamasyz etý úshin akademiialyq basymdyq ortalyqtaryn qurý.
- Eldegi ǵylymnyń kadrlyq áleýetin kúsheitý týraly sóz qozǵai otyryp, jas ǵalymdardy jan-jaqty qoldaý.
- Magistratýra jáne doktorantýra baǵdarlamasyna arnalǵan granttyń qunyn arttyrý, iri óndiristik kompaniialarmen birge «indýstrialdy PhD» daiarlaý mehanizmin ázirlep, qoldanysqa engizý.
- Óńirlik joǵary oqý oryndarynyń bazasynda ozyq injenerlik mektepter ashý.
Ǵylym jáne tehnologiialar jónindegi ulttyq keńestiń otyrysynda El basshysy Q.J.Toqaev kótergen mindetter júieli oryndalyp, iske asatyn bolsa, damyǵan ǵylymy men qýatty memleketi bar, birligi myǵym elge ainalarymyz sózsiz. Sondyqtan eldi damytý úshin aldymen ǵylymdy qolǵa alý óte mańyzdy ári salmaqty is. Qazaq ǵylymy jasasyn!
Dariǵa KÓKEEVA, Taiaý Shyǵys jáne Ońtústik Aziia kafedrasynyń meńgerýshisi
