Ermegiiaev týraly búkil jurtshylyq 2012 jyly Londonda ótken olimpiada kezinde keńirek bildi. Onyń ákesi, belgili metsenat, biliktiń ár satysynda qyzmet etken, «Almatyqurylys» kompaniiasyn uzaq jyldar basqarǵan, «Otan» partiiasyn qurýshylardyń biri (qazirgi «Nur Otan»), saiasi ári iskerlik álemde aty elge tanymal Amangeldi Ermegiiaev jaiynda búkil el jaqsy biledi. Onyń bastamashyl, halyqshyl kózqarastary men qazaqy qundylyqtarǵa demeýshi bola bilgen paiymdylyǵy jóninde aqparat quraldary jii jazyp júrdi. Alaman aitystarda jii tóbe kórsetip, Júrsin Ermannyń júirikterine taali temir tulpardy mingizgenniń biri osy – Ermegiiaev.
Al Talǵat Ermegiiaevti London olimpiadasy kezindegi Qazaqstan quramasynyń eren jetistigimen birge tanyp, búkil el jas ta isker basshynyń bolashaǵyna úlken úmitpen qarady. Ánuranymyz London tórinde jeti ret shyrqalǵan sát – biz úshin áli de airyqsha merei. Mundai jetistikke jetýdiń bir syry – sportshylardyń úzdiksiz daiyndyǵy, qajyr-qairaty bolsa, ekinshisi – basshylyq qyzmetkerlerdiń tynymsyz eńbegi edi.
[caption id="attachment_14255" align="alignright" width="300"]
Sol kezde BAQ-tarda Talǵat Ermegiiaevtiń jarqyn beinesi somdalyp, onyń áýleti týraly, ol ósken orta jaily jyly pikirler aityla bastaǵan. Ásirese, jastaiynan zerek, qaǵylez, ultjandy, ainalasyna senimdi serikterin toptastyra biletin, qandai sharýa bolsa da top bastaýǵa beiim ekenin aityp, bolashaqta budan da zor biikterge jeterine senim artqan. Kóp ótpei EKSPO-nyń tóraǵalyǵyna sailandy.
Klanaralyq qaqtyǵys pa?
Kópshiliktiń pikiri, ásirese joǵarǵy saiasi elitanyń arasyndaǵy shym-shytyryq bailanysty jaqsy biletin adamdardyń aitýynsha, sońǵy jyldary qamalǵan iri sheneýnikterdiń bári klanaralyq qaqtyǵystardyń qurbany. Buǵan kúni keshe 8 jylǵa bas bostandyǵynan aiyrylǵan eks-premer-ministr Serik Ahmetovtiń isin dálelge tartady. Kóptegen saiasattanýshylar bul iste iri saiasi klandardyń arasyndaǵy «úlken kisiniń» mańyna toptasyp, senimine kirý» protsesiniń qiturqy áreketi dep baǵalaidy.
Talǵat Ermegiiaev te solar sekildi iri qarjygerlerdiń tolaiym aqsha úshin talasynyń kesirinen zardap shekti degen pikir bar.
Munyń sebebi de joq emes. EKSPO – el ekonomikasynyń negizgi qainaryn buryp otyrǵan joba. Oǵan bólinetin qarjynyń qomaqtylyǵy sonshalyq, buǵan búkil qarjylyq toptar aralasýǵa múddeli. Tipti, EKSPO ǵimarattary salynyp jatqan aimaq, onyń infraqurylymdary júretin jer, oǵan ketetin árbir qurylys materialdary úshin qyzý talas qazirdiń ózinde toqtaǵan joq, áli de talai bylyqtyń beti ashylady deidi biletinder.
Keibireýler Ermegiiaev komandasy óziniń úlesin alyp, syrttan baqylap otyrýǵa nietti asa yqpaldy adamdardy ishke engizbegen, sol úshin aiaqtan shalýdy olar aldyn ala josparlaǵan dep qaraidy. Munyń saldary – EKSPO isi boiynsha tergeýge alyp keldi. Bul uzaqqa sozylǵan protsess týraly aldaǵy sot kezinde talai qiturqy áreketter bolýy múmkin.
Ermegiiaev keshirim surai ma?
Baiqasańyzdar, Ahmetov pen Ermegiiaev isiniń arasynda bir uqsastyq bar. Ekeýi de – iri sheneýnik, ekeýi de – iskerligimen elge tanylǵan, bilikke kelmei turyp-aq ózindik dáýletin eselegen jandar. Olardy bilikke shaqyrmasa da, qoǵamda belgili kásipkerler retinde talai sharýanyń basyn qaiyrar edi. Bizdegi biliktiń kemshiligi – isker azamattardy sheneýniktik qyzmetke shaqyryp, keiin olardy klandar arasyndaǵy soǵysqa aidap salatyndyqtary.
«Serik Ahmetov aqtalar» degen úmit selge ketti. Ol birneshe ret el Prezidentinen keshirim surap, qatty ókinetindigin bildirdi. Biraq, júie bosaǵan joq.
Ermegiiaev she? Onyń uzaq ýaqytqa sozylǵan tergeý jáne tergeý materialdarymen tanysý barysynan-aq bul istiń kúrmeýi ońai tarqamaityny belgili syńaily.
Endi Ermegiiaev te keshirim surasa... ne bolady? Bizdińshe, solai etken jaǵdaida Prezident oǵan taǵy bir múmkindik berýi múmkin ekenin joqqa shyǵarmaidy sarapshylar. Sebebi, Ermegiiaev isi Ahmetov isindei saiasi sipatqa jatpaidy. Bul jerde taza ekonomikalyq múdde bar. Eger «iri shonjarlardyń» kóńilin taba alsa, araaǵaiyndyq jumystary durys baǵytta júrse, kúni erteń bosap shyǵýy múmkin. Árine, memlekettiń qarjysyn tolyqtai qaitartýy, saiasi karerasyn shekteýi ábden múmkin.
Ahmetov te, Ermegiiaev te – Prezident komandasynyń músheleri. Olar osy júieniń tól týyndysy. Mánsapqa osy júie jetkizgen ári olardy qalyptastyrǵan da osy júieniń ishki «tájiribesi».
Biz Amangeldi Ermegiiaev týraly joǵaryda aittyq. «Otan» partiiasyn qurýshy ári sol partiiany memleketshil qosyn retinde saiasi baǵytyn anyqtaýshy tulǵa. Prezident Nazarbaev osy partiianyń quramyna ótip, Tóraǵasy bolǵan kez de – Amangeldi Ermegiiaevtiń partiia basshylyǵynda júrgen kezi.
Búgin «Nur Otan» – eldegi saiasi júieni qolynda ustap otyrǵan birden-bir saiasi uiym. Bilik partiiasynyń búgingi jetistigine Amangeldi Ermegiiaevtiń qosqan úlesi zor. Endeshe, ózge-ózge, Prezident burynǵy senimdi adamdarynyń bárin ysyryp tastaýy neǵaibyl.
Nede bolsa, anyq-qanyǵyn aldaǵy sotta biletin bolamyz. Keibir derek kózderi Ermegiiaev isine asa belsendilikpen kirisip, qalaida ony osy shyrǵalańǵa toly naýqan arqyly bosatpaýǵa qulshynyp otyrǵan bir emes, birneshe top bar dep boljanady.
Árine, bárin bir adam – jalǵyz qamqorshy sheshedi...
