Biri – Erlandy qoldasa, endi biri kúmánmen qarap otyr oǵan. Kúni keshe Asanáli Áshimov pen Nurlan Orazalin bastaǵan birneshe óner adamdary arasha tústi Erlanǵa.
Asanáli aǵa inisin jamanatqa qimaitynyn ashyp aitty.
Erlan Biláldiń basqa da áriptesteri óleń oqyp, kóz jasyna erik bergenine kýá boldyq. Durys qoi. Arasha túskeni oryndy.
Biraq kóz jasyn kól qylyp zań oryndarynyń jumysyna "yqpal" etý qazirgi zamanda aqylǵa syia ma?
Basqa adam jylasa bir jón. Basqa adam jylasa sener edik. Al ártistiń sahnadan bólek minbede turyp jylaǵanyna kim senedi?
Akterlik sheberlik pen shynaiylyqtyń arajigin ajyratý qiyn mundaida...
Eger isti bolǵan adamnyń árbir jaqtaýshysy sot oryndaryna jylap baryp, "qysym" jasai berse, aiypty adamnyń bári jazadan qutylyp kete bermei me?
Kerek deseńiz, bul iske Asanáli aǵamyzdyń aralasýy artyqtaý bolǵan siiaqty. Ata saqaly aýzyna túsken abyz adamdy "advokat" qylýdyń ne qajeti bar?
Erlandy qoldaýshylar ony áldekimderdiń arandatqanyn aityp, oǵan arasha túsýde.
Bizdińshe, Erlan Biláldi áldekimder arandatyp, aiaqtan shalatyndai úlken saiasi tulǵa emes. Óner adamy, ártis árbirden soń. Buǵan bizdiń júieni jetik biletin jandardyń sene qoiýy ekitalai. Al mádeniet salasynda eńbek etip júrgen áriptesteri teatr direktoryna qastyq oilaidy degenge aýzyń barmaidy. Biraq, kim bilgen...
Osy bir daý-shardy syrttan baqylaǵanda elimizdegi óner jáne mádeniet salasyndaǵy qairatkerlerdiń ózderin qorǵaýǵa dármensiz ekenine kóziń jetedi.
Aldyǵa múiizi qaraǵaidai aǵalardy salyp, sońynan ini-qaryndastyń jylap-syqtaýy alty qyrdyń astynda qalǵan eski tásil emes pe?
Jamandyq shaqyrý árbirden soń. Biláldiń kózi tiri. Túrmede emes, úide. Itjekkenge aidalǵan joq. Ol zaman kelmeske ketken.
Bul kúres emes, anyǵynda. Bálkim, basqa jolmen júrgen jón shyǵar. Zamanaýi jolmen, demokratiialyq jolmen...
Ázir Reseide «Gogol-tsentr» teatrynyń jetekshisi Kirill Serebrennikovke qarsy is júrip jatyr. Onda da ártister áriptesin qorǵaýda.
Biraq bizdikiler siiaqty óleń oqyp, jylap-syqtap jurttyń emotsiiasymen oinaǵan ártisti kórmedik.
Serebrennikovtyń tól týyndysy atyshýly «Nýriev» spektaklin sahnalaǵan áriptesteri sahnaǵa rejisserdiń sýreti beinelengen jeidelerdi kiip shyqty kúni keshe. Teatrdyń aldynda kúnde miting. Serebrennikov ázir úi qamaqta. Anyǵy, ony Bilálǵa qaraǵanda áldeqaida aýyr jaza kútip tur.
Biraq onyń áriptesteri kúresti toqtatqan joq. Qaita bul isti saiasilandyrýǵa tyrysýda.
«Eger Kirildy abaqtyǵa qamaýdyń artynda ony shyǵarmashylyǵy tursa bir adym keri sheginbeimiz. Al eger qarjylyq qylmysqa shatylǵany ras bolsa, onda bizdiń bul iske aralasýǵa qaqymyz joq», – deidi Serebrennikovtyń áriptesteri.
Bilsek, Serebrennikov - erkin oily liberaldardyń kórnekti ókili. Onyń jaqtastary «bilik Serebrennikovty sottap, sol arqyly liberaldarǵa qyr kórsetýde» dep joramaldaidy.
Bizdegi jaǵdaiǵa qaita oralsaq. Eger Erlan Biláldiń ómirdegi dostary, ónerdegi áriptesteri aitqandai teatr direktoryna áldekimder tuzaq qurǵany ras bolsa, bul bizdiń quqyq qorǵaý jáne zań oryndaryna úlken soqqy bolatyny sózsiz.
Muny jylap-syqtaýmen, óleń oqýmen dáleldei almaisyń, biraq.
Bárimiz bilemiz, jylap-syqtaýdyń arty ádette Nazarbaevtan arasha suraýmen aiaqtalatynyn...
Nurlan JUMAHAN
