Partiialyq ustanymy men óz kózqarastaryna toqtalmastan buryn, Amangeldi Tileýberdiuly aldymen óz ómirbaianyna az-kem toqtaldy.
- Men Talǵar aýdanyna 1986 jyly Shyǵys Qazaqstan oblysy Aqsýat aýdanynan kóship keldim. Armanymyz - aýyldy kórkeitý bolǵan soń agronom mamandyǵyn tańdap, Talǵar qalasynyń aýylsharýashylyq tehnikýmyna oqýǵa túsip, ony 1990-shy jyly támamdadym. Onyń aldynda Sovettik ásker qatarynda boldym. Tehnikýmdy bitirgeli Talǵar qalasynda áke-sheshemmen, bala-shaǵammen turyp jatqan jaiym bar. 1991 jyldan bastap Talǵar qalasynda ártúrli qyzmette jumys istedim. Qazirgi ýaqytta aýylsharýashylyǵymen ainalysamyn. Ákemniń atynan «Tileýberdi» dep ashylǵan sharýa qojalyǵy bar. Mal bordaqylaimyz, sút ónimderin shyǵaramyz. Odan bólek qurylys salasynda da atqaryp jatqan tirligimiz bar. 2015 jyly elimizdegi biregei partiia – «Nur Otan»-dy qalap, múshelikke óttim. Sol partiiasy atynan VI shaqyrylymdaǵy aýdandyq máslihat depýtattyǵyna sailaýǵa tústim. Mine, búginde jańa sailaýǵa bailanysty Almaty oblystyq máslihat sailaýyna ózimdi usynyp, depýtattyqqa túsip jatyrmyn, - deidi ol.
Ol aýdan deńgeiindegi máselelerge aralasyp, kórgen-bilgeni, oilap-túigeni , «Nur Otan» partiiasy sheńberinde jinaǵan tálim-tájiribesi oblystyq deńgeidegi máslihatta óz tiimdiligin tanytatyndyǵyna senimdi.
- Oblys deńgeiinde qarastyrylýy tiis aýyldyń máseleleri bar. Keibir jerde oblystyń eldi-meken problemalary uqsas bolyp keledi. Mine, sol máselelerdiń sheshimine at salysyp, óz tájiribemmen bólise otyryp, partiiamyzdyń halyq aldynda alǵan jaýapkershiligi men mindettemelerin oryndaýǵa, ony nasihattaýǵa at salysyp, oǵan bir kisidei óz úlesimdi qossam ba degen mende tilek bar. Árine, depýtattyqqa ótsem, eń birinshi kezekte qolǵa alsam degen janymda birneshe másele bar. Sonyń biri – densaýlyq máselesi. Ózderińiz bilesizder, pandemiiadan soń bul salanyń tompaq tustary ózdiginen bilinip qalyp jatty. Osyǵan bailanysty ákimdikke usynys jasaý úshin jinaqtalǵan birtalai qujattar bar. Ol júielik, zańnamalyq máselelerdi qamtidy. Tehnikýmnan soń eki joǵary bilim alyp, zańger jáne ekonomist mamandyǵyna ie boldym. Osy bilimderim másele sheshiminde tolyqtai qoldanýǵa múmkindik bolady dep senemin, - deidi ol.
Onyń aitýynsha, agrobizneske qazir memleket tarapynan úlken qarjy bólinip jatyr. Tek sol múmkindikti kóp adam bilmestikten, paidalana almai júr.
- Ata-babamyz mal baqqan, sonymen tirshilik keshken. Sondyqtan bul ata kásip qazaqqa maidai jaǵýy tiis. Agroónerkásip salasy boiynsha aqyl-keńes suraityndar bolsa, men kómektesýge árqashan daiynmyn. Bul jaǵymnan biligim de, bilimim de jeterlik.
Depýtat aitsa, másele ózdiginen sheshiledi degen, árine bolmaidy. Ár depýtattyń artynda mindetti túrde qoldaityn qalyń jurty bolýy tiis.
- Memleket basshysy Qasym-Jomart Toqaevtyń «Halyq únine qulaq asatyn memleket» tujyrymyna sáikes, bilik pen qarapaiym halyq arasyndaǵy altyn kópir ári halyq únin memleketke jetkizýshi depýtattar dep bilemin. Qazirgi aqparattyq tehnologiia damyǵan zamanda bul ábden múmkin nárse. Meniń áleýmettik jelilerde paraqshalarym bar, óz elektoratyma sai oǵan jazylýshylar da jeterlik. Sol arada jekege jazylǵan ózekti máselelerdi bilik aldyna jetkizip, onyń sheshimine at salysýǵa, árine daiynmyn. Azamattyq qoǵamnyń ashyq adamy retinde sailaýshylaryma esigim de, jelidegi paraqshalarymnyń dairegi de árdaiym ashyq, - deidi ol.
