Prezident maqalasy otanshyldyq rýhta jazylǵan
Asyl tekti babalarymyz «Baq baǵalaǵannyń basynda turady» degendi beker aitpasa kerek. Tarihy tereńge tamyr tartqan Táýelsiz elimiz otyz jylda ordaly mekenge ainaldy. Elbasy Nursultan Ábishuly Nazarbaev 7 jyl buryn el Táýelsizdiginiń 23 jyldyǵyna orai ótken jiynda «Ulan-ǵaiyr jeri bar, uly muratty Eli bar, babalar jazǵan uly tarihy men urpaǵy kóz tikken uly bolashaǵy bar meniń halqym – Uly halyq!» degen bolatyn.
Shynymen-aq, osy sózder tamyrynda qazaq qany oinaǵan árbir alash balasynyń rýhyn asqaqtatqany ras. Al, Elbasy – Qazaqstan halqynyń turaqtylyǵy men birliginiń kepiline ainaldy. Bul turǵyda atalmysh maqalada «Osynaý tolaǵai tabystardyń bárine Elbasynyń dara kóshbasshylyǵynyń hám halqymyzdyń danalyǵy men parasatynyń, birligi men yntymaǵynyń, otandastarymyzdyń qajyrly eńbeginiń arqasynda qol jetkizdik. Sondyqtan, Elbasy Táýelsizdigimizdiń máńgi simvolyna ainaldy desek, aqiqatty aitqan bolar edik» delingen.
Ǵasyrlar boiy arman etken egemendikti elimizdiń basyna qonǵan baǵy, tuǵyrǵa ornaǵan taǵy deýge bolady. Keshegi kúnderge kóz júgirter bolsaq, Qazaqstan talai belesterdi baǵyndyrdy. Memleket basshysy elimizdiń osy ýaqytqa deiin jetken jetistikteri men belesterin saralap aita kelip, kemel keleshektiń aldaǵy jyldaryna nyq jospar qoiyp, baǵyttardy aiqyndady: «Aldaǵy tórtinshi onjyldyqtyń bizge júkteitin mindeti – qýatty eldiń iesi jáne kemel halyq bolý. Bul jolda saiasi-ekonomikalyq reformalardy jáne sanany jańǵyrtý úderisin jalǵastyryp, zaman talabyna beiimdelgen ulttyń jańa bolmysyn qalyptastyrýymyz qajet».
Sarabdal oilar qozǵalǵan sanaly maqalada rýhani qundylyqtardy ulyqtaý jáne tól tarih máselesi de qozǵaldy. «Shynyna kelsek, Táýelsizdik jyldarynda birneshe ret qolǵa alynǵanyna qaramastan, ulttyq múddemizge sai keletin kóp tomdyq jańa tarihymyz áli tolyq jazylǵan joq. Onyń tujyrymdamasyn buǵan deiingi olqylyqtardy eskere otyryp qaita qarap, jańa ǵylymi ustanymdar men jańalyqtardyń negizinde tyńnan jazatyn ýaqyt áldeqashan keldi. Barlyq oqýlyqtar osyndai irgeli eńbekke negizdelip ázirlenedi. Bul – ult shejiresin dáripteý turǵysynan alǵanda strategiialyq mańyzy bar másele. Sondyqtan, Qazaqstannyń akademiialyq úlgidegi jańa tarihyn jazýdy dereý bastaý kerek. Túptep kelgende, tarihi sanany jańǵyrtý máselesiniń túiini – osy».
Sonymen qatar, jalyn ieleri jastar da nazardan tys qalmady. Qoinaýy en bailyqtyń besigindei, qut daryp, baq qonǵan elimizdiń erteńi – jasampaz jastardyń qolynda dep jii aitamyz.
Álemdik tájiribede jastar barlyq ózgerister men jańashyldyqtardyń qozǵaýshysy ekendigi áldeqashan moiyndalǵan. Jastardyń kózqarasy, ár jalyndaǵan júrek pen jigerli sanadan týyndaǵan jańa ideiasy bolashaqtyń basty investitsiiasy bolyp tabylady. Elimiz úshin jastar qaýymy ár kezde strategiialyq ári kadrlyq resýrs sanatynan tysqary bolǵan emes. Bul sózimdi memleket basshysynyń tómendegi sózderi aiǵaqtai túseri sózsiz. «Jas kelse – iske» deidi halqymyz.
Jastar – qashanda tyń ideialardyń qainar kózi, oń ózgeristerdiń qozǵaýshy kúshi. Sondyqtan óskeleń urpaqtyń osyndai áleýetin durys arnaǵa baǵyttap, tiimdi paidalanýymyz kerek. Osy oraida Prezident janyndaǵy Jastar keńesiniń qyzmetin jandandyrǵan jón. Ony bilikti ári bilimdi jastardy jumyldyratyn júieli jumys alańyna ainaldyramyz. Budan bólek, men azattyq jyldarynda dúniege kelgen, áli tanylyp úlgermegen talantty jastardy qoldaý maqsatynda «Táýelsizdik urpaqtary» atty grant taǵaiyndaýdy usynamyn». El tarapynan osyndai qoldaýdy sezingen jastar da eńbek pen órleý jolynda aianyp qalmasy anyq.
Barsha óńirdegi jastar atynan, biz de óz kezegimizde dara jolda jaltarmaitynymyzdy aitqym keledi. Erteńgi kúnge qaryshty qadam basyp, mártebeli de tuǵyrly Táýelsizdigimizdiń nyǵaia túsýi jolynda qyzmet atqarýǵa daiyn ekenimizdi bildirgim keledi. Memleket basshysy aitqandai «Táýelsizdik bárinen qymbat» degen eń qasterli uran ár qazaqstandyq jastyń sanasynda saltanat qurady.
Eldar SAPAROV, Almaty oblysynyń jastar saiasaty máseleleri basqarmasynyń basshysy.
